দুভাগ হ’ল নেকি অসমৰ বৃহৎ জাতীয় সংগঠন অসম জাতীয়তাবাদী যুৱ ছাত্ৰ পৰিষদ?
বুধবাৰে গুৱাহাটী প্ৰেছ ক্লাবত সৃষ্টি হোৱা পৰিৱেশৰ পিছতে এই প্ৰশ্ন উত্থাপিত হৈছে।
পলাশ চাংমাই আৰু ৰাণা প্ৰতাপ বৰুৱাৰ নেতৃত্বতে সংগঠনটোৰ বেছিভাগ নেতা-সদস্য থকাৰ বিপৰীতে “বহিষ্কৃত” কেইজনমান নেতাই তুলিছে সংগঠনটোৰ নেতৃত্ব-দাবী।
বহিষ্কৃত বিৰাজ তালুকদাৰ আৰু ৰিতুল পাঠক হৈছে “আনটো” ফৈদৰ ক্ৰমে সভাপতি আৰু সম্পাদক।
মঙ্গলবাৰে গুৱাহাটী প্ৰেছ ক্লাবত পলাশ চাংমাই আৰু জাতীয়তাবাদী যুৱ ছাত্ৰ পৰিষদৰ মূল বিষয়ববীয়াৰ বিৰুদ্ধে এক সংবাদমেল সম্বোধন কৰাৰ বাবে যো-জা চলাইছিল আনটো ফৈদৰ সভাপতি বিৰাজ তালুকদাৰ আৰু সাধাৰণ সম্পাদক ৰিতুল পাঠকে।
উল্লেখযোগ্য যে, ৰিতুল পাঠকে যোৰহাট জিলা কমিটিৰ সভাপতি হিচাপে কাৰ্য্যনিৰ্বাহ কৰিছিল আৰু যোৱা ১৫ মাৰ্চত তেওঁক অসাংবিধানিক কাম-কাজত জৰিত থকাৰ অভিযোগত অসম জাতীয়তাবাদী যুৱ ছাত্ৰ পৰিষদৰ পৰা বহিষ্কাৰ কৰিছিল।
কিন্তু বুধবাৰে তেওঁলোকক প্ৰেছ ক্লাবত সংবাদমেল অনুষ্ঠিত কৰাত বাধা দিলে পলাই চাংমাই আৰু ৰাণাপ্ৰতাপ বৰুৱাৰ ফৈদে। তেওঁলোকৰ প্ৰায় ১০০গৰাকী সদস্যই ৰিতুল পাঠকৰ ফৈদক প্ৰেছ ক্লাবত প্ৰৱেশ কৰাত বাধা দিবলৈ প্ৰেছ ক্লাবৰ সন্মুখত অৱস্থান কৰিছিল।
ইতিমধ্যে ৰিতুল পাঠকে অসম জাতীয়তাবাদী যুৱ ছাত্ৰ পৰিষদৰ পেড ব্যৱহাৰ কৰি সাংবাদিকসকলক নিমন্ত্ৰণ জনাইছিল। কিন্তু সেই পেড বে-আইনীভাৱে ব্যৱহাৰ কৰাৰ অভিযোগ তোলে পলাশ চাংমাই ফৈদে।
মঙ্গলবাৰে গুৱাহাটী প্ৰেছ ক্লাবৰ সন্মুখত অৱস্থান কৰি থকাসকলৰ মাজৰে কেন্দ্ৰীয় সমিতিৰ সহকাৰী সাধাৰণ সম্পাদক বিজন গায়নে সংবাদ মাধ্যমৰ আগত কয় যে পৰিষদৰ সংবিধান মানি নচলাৰ অপৰাধত ৰিতুল পাঠকক ইতিমধ্যে বহিষ্কাৰ কৰা হৈছে।
“অবৈধ ধনৰ লেনদেন আৰু নাৰীলেংকাৰিৰ সৈতে জৰিত থকাৰ অপৰাধত ৰিতুল পাঠককে ধৰি অন্যান্য বহুকেইজনকে প্ৰাথমিক সদস্য পদৰ পৰা বহিষ্কৃত কৰা হৈছিল। অসম জাতীয়তাবাদী যুৱ ছাত্ৰ পৰিষদৰ নামত কোনোবাই গুৱাহাটী প্ৰেছ ক্লাবত প্ৰেছ মিট দিব, এই কথা মানি ল’ব নোৱাৰি। কি উদ্দেশ্যে অবৈধভাৱে ইয়াত সংবাদমেল দিব?” গায়নে কয়।
তদুপৰি, যোৱা ১৩ জুলাইৰ দিনা পলাশ চাংমাই ফৈদে চান্দমাৰি আৰক্ষী থানাত ৰিতুল পাঠকৰ বিৰুদ্ধে সংগঠনটোৰ বিৰুদ্ধে অনৈতিক কাৰ্য্যত লিপ্ত থকাৰ অভিযোগ তুলি এক গোচৰ ৰুজু কৰিছিল।
আনহাতে, ৰিতুল পাঠকে সংবাদমেল সম্বোধন কৰাক কেন্দ্ৰ কৰি পলাশ চাংমাইয়ে এক প্ৰেছ বিজ্ঞপ্তিযোগে কয়, “সম্প্ৰতি ৰিতুল পাঠকে নিজকে কেন্দ্ৰীয় সমিতিৰ স্বয়ম্ভু সাধাৰণ সম্পাদক হিচাপে ঘোষণা কৰি বিভিন্ন কাম-কাজ অব্যাহত ৰখাৰ অপচেষ্টা কৰিছে।”
আনহাতে, পলাশ চাংমাইৰ ফৈদে এই অভিযোগ উত্থাপন কৰাৰ পাছতেই বহিষ্কৃত ৰিতুল পাঠকে তেওঁৰ বিৰুদ্ধে অনা অভিযোগ সম্পূৰ্ণ ভিত্তিহীন বুলি কয়।
“জাতীয়তাবাদী যুৱ ছাত্ৰ পৰিষদৰ কিছুসংখ্যক নেতাই একনায়কত্ববাদ চলোৱা আৰম্ভ কৰিছে। মোক সংবিধানবিৰোধী কাম-কাজত লিপ্ত হোৱা বুলি কৈছে, কিন্তু কেন্দ্ৰীয় সমিতিৰ মূল বিষয়াববীয়াই সংবিধান মানি চলা নাই। কেন্দ্ৰীয় সমিতিয়ে আলোচনামৰ্মে মোক বহিষ্কাৰ কৰা নাই। কেইগৰাকীমান বিষয়ববীয়াই আক্ৰোশমূলকভাৱে মোক বহিষ্কাৰ কৰিছে। যুৱ ছাত্ৰ পৰিষদত এতিয়া কেইজনমান নেতাৰ একনায়কত্ববাদ চলিছে।”
ইপিনে, “অসম জাতীয়তাবাদী যুৱ ছাত্ৰ পৰিষদৰ প্ৰাক্তন সভাপতি পুতুল দত্তৰ বিৰুদ্ধে মিছাকৈ নাৰী কেলেংকাৰি (ৰ অভিযোগ) আনিছে” বুলি মন্তব্য কৰি তেওঁ কয় “পুতুল দত্তৰ বিৰুদ্ধে মহিলা পৰিষদৰ তিনিচুকীয়াৰ এগৰাকী মহিলাই অভিযোগ আনিছিল যদিও সেই অভিযোগ ইতিমধ্যে মিছা বুলি প্ৰমাণিত হৈছে। পুতুল দত্তই মহিলাগৰাকীক ফোনযোগে বেয়া ব্যৱহাৰ কৰা বুলি অভিযোগ দিছিল যদিও তেওঁ আৰক্ষীক কল ৰেকৰ্ড দিব পৰা নাছিল। কিন্তু পুতুল দত্তই সকলো কল ডিটেইল্স আৰক্ষীক জমা দিছিল। এই কথা মই ডিব্ৰুগড়ৰ কেন্দ্ৰীয় সমিতিৰ সাধাৰণ সভাত ক’ম বুলি ভাবিছিলো। কিন্তু তাৰ পূৰ্বেই মোক ষড়যন্ত্ৰ কৰি দলৰ পৰা বহিষ্কাৰ কৰিলে।”
তদুপৰি, যোৱা মাৰ্চ মাহতে জাতীয়তাবাদী যুৱ ছাত্ৰ পৰিষদৰ সভাপতি, সাধাৰণ সম্পাদক আৰু উপদেষ্টাসকলৰ বিৰুদ্ধে উচ্চ ন্যায়ালয়ত গোচৰ তৰা বুলি তেওঁ কয়।
আনহাতে, তালুকদাৰ-পাঠক নেতৃত্বাধীন নতুন “কেন্দ্ৰীয় কমিটি” যোৱা ১৫ জুলাইৰ দিনা কেন্দ্ৰীয় কাৰ্য্যনিৰ্বাহক বৈঠকত অনুষ্ঠিত কৰি পূৰ্ণাংগ ৰূপত গঠন হৈছিল বুলি জানিবলৈ দিয়ে ৰিতুল পাঠকে।
পাঠকে জনোৱা অনুসৰি উক্ত কমিটিৰ উপদেষ্টাৰ দায়িত্বত আছে দ্বীপেন্দ্ৰ নাৰায়ণ কোঁৱৰ, প্ৰভাস গোস্বামী, নিধিৰাম কাকতি আৰু ভূপেন তালুকদাৰ।
পাঠকৰ দাবী “কেইবাখনো জিলা কমিটি এই কেন্দ্ৰীয় সমিতিৰ ময়মতালিক লৈ অতিষ্ঠ হৈছে। গতিকে ইতিমধ্যে বহুকেইখন জিলা কমিটিয়ে আমাৰ সৈতে যোগাযোগ কৰিছে। প্ৰায় ১৫-২০ খন জিলা সমিতি আমাৰ সৈতে আছে।”
তদুপৰি, ৰঙিয়া, গুৱাহাটী মহানগৰ, দৰং, মাজুলী, যোৰহাট, বোকাখাত, তিনিচুকীয়া, ডিব্ৰুগড়, নলবাৰী, ওদালগুৰিকে ধৰি অন্য জিলা সমিতি নতুনকৈ গঠিত কেন্দ্ৰীয় সমিতিৰ সৈতে চামিল হৈছে বুলি দাবী কৰিছে পাঠকে।
