Sri Lanka declares emergency অৰাজকতাৰ দেশত পৰিণত হোৱা শ্ৰীলংকাত জৰুৰীকালীন অৱস্থা ঘোষণা

এক অৰাজক পৰিস্থিতিয়ে বিৰাজ কৰিছে দ্বীপৰাষ্ট শ্ৰীলংকাত। পৰিস্থিতি নিয়ন্ত্ৰণৰ বাহিৰলৈ যোৱা শ্ৰীলংকাত আজি ঘোষণা কৰা হয় জৰুৰীকালীন অৱস্থা। জানিব পৰা মতে ৰাষ্ট্ৰপতি গোটাবায়া ৰাজপাক্ষেই মালদ্বীপলৈ পলায়ন কৰিছে।

শ্ৰীলংকাৰ প্ৰধানমন্ত্ৰীৰ কাৰ্যালয়ে দেশ খনত জৰুৰীকালীন অৱস্থা ঘোষণা কৰাৰ কথা প্ৰকাশ কৰিছে। ইপিনে দেশ খনৰ প্ৰধানমন্ত্ৰীৰ বাসগৃহত প্ৰৱেশ কৰিবলৈ প্ৰতিবাদকাৰীৰ ওপৰত আজি সামৰিক বাহিনীয়ে কন্দুৱা গেছৰ ব্যৱহাৰ কৰে৷ ৭৩ বছৰীয়া ৰাজপাক্ষে, তেওঁৰ পত্নী আৰু দুজন দেহৰক্ষী মালদ্বীপৰ ৰাজধানী মালেলৈ পলাই গৈছে বুলি দেশ খনৰ চৰকাৰী সূত্ৰই প্ৰকাশ কৰিছে।

ইপিনে শ্ৰীলংকাৰ সংসদে ২০ জুলাইত নতুন ৰাষ্ট্ৰপতি নিৰ্বাচন কৰিব। সোমবাৰে অধ্যক্ষ মহিন্দা ইয়াপা আবেৱৰ্ডনাই এইকথা জনায়। আবেৱৰ্ডনাই এক বিবৃতিত কয় যে শুকুৰবাৰে সংসদ পুনৰ আহ্বান কৰা হ’ব আৰু পাঁচ দিন পিছত নতুন ৰাষ্ট্ৰপতি নিৰ্বাচিত কৰিবলৈ ভোটদান অনুষ্ঠিত হ’ব।

বিবৃতিটোত লগতে কোৱা হৈছে, “আজি অনুষ্ঠিত দলৰ নেতাসকলৰ বৈঠকত সন্মত হৈছে যে সংবিধান অনুসৰি নতুন সৰ্বদলীয় চৰকাৰ নিশ্চিত কৰাৰ বাবে এইটো অপৰিহাৰ্য। শাসকীয় দলটোৱে কৈছে যে সৰ্বদলীয় চৰকাৰ গঠনৰ বাবে প্ৰধানমন্ত্ৰী আৰু কেবিনেটে পদত্যাগ কৰিবলৈ সাজু।”