মুখ্য মন্ত্ৰী সৰ্বানন্দ সোণোৱালে আজি জনতা ভৱনস্থিত মুখ্য মন্ত্ৰীৰ সভাকক্ষত অনুষ্ঠিত এখন বৈঠকত ৰাজহ আৰু দুৰ্যোগ ব্যৱস্থাপনা বিভাগৰ কাম-কাজৰ পৰ্যালোচনা কৰে।
বৈঠকত অহা ২৮ জানুৱাৰিত ৰাজ্যখনৰ ৪০ হাজাৰতকৈ অধিক থলুৱা জনসাধাৰণলৈ ভূমিৰ পট্টা প্ৰদানৰ সিদ্ধান্ত লোৱা হয়।
বৈঠকত মুখ্য মন্ত্ৰীয়ে পৰৱৰ্তী পৰ্যায়ত আৰু অধিক হিতাধিকাৰীক ভূমিৰ পট্টা বিতৰণৰ বাবে উপযুক্ত তথা ক্ষীপ্ৰ পদক্ষেপ লোৱাৰ বাবেও বিভাগক নিৰ্দেশ দিয়ে।
উল্লেখযোগ্য যে, ৰাজ্য চৰকাৰে ১ লাখ থলুৱা ভূমিহীন পৰিয়াললৈ ভূমি পট্টা প্ৰদানৰ বাবে ইতিমধ্যে ক্ষীপ্ৰ পদক্ষেপ গ্ৰহণ কৰিছে।
বৈঠকত অহা মাৰ্চ মাহৰ প্ৰথম সপ্তাহত ‘অৰুন্ধতি’ আঁচনিখন আনুষ্ঠানিকভাৱে শুভাৰম্ভ কৰাৰ বাবেও মুখ্য মন্ত্ৰীয়ে নিৰ্দেশ দিয়ে। এই আঁচনিখনৰ অধীনত আৰ্থিকভাৱে দুৰ্বল পৰিয়ালৰ বিবাহৰ পঞ্জীয়ন কৰা কন্যাক ১০ গ্ৰাম সোণৰ আ-অলংকাৰ ক্ৰয়ৰ বাবে ধন প্ৰদান কৰা হ’ব।
ৰাজ্যখনৰ ১৬০ খন সত্ৰ আৰু দেৱালয়ে ৰাজ্য চৰকাৰৰ পৰা পাই থকা নিয়মীয়া বাৰ্ষিক ভাট্টাৰ উপৰি বছৰেকত ২ লাখ টকাকৈ ৰাজ্য চৰকাৰৰ তৰফৰ পৰা প্ৰদানৰ বাবে সিদ্ধান্ত লোৱা হয়।
বৈঠকত সোণোৱালে ৰাজহ আৰু দুৰ্যোগ ব্যৱস্থাপনা বিভাগক বানপানী ব্যৱস্থাপনা পুঁজিৰ ব্যৱহাৰিক প্ৰমাণপত্ৰ সংশ্লিষ্ট জিলা উপায়ুক্ত সমূহৰ পৰা ক্ষীপ্ৰভাৱে অনাৰ পদক্ষেপ ল’বলৈও নিৰ্দেশ দিয়ে।
সোণোৱালে মুখ্য সচিব কুমাৰ সঞ্জয় কৃষ্ণক পুঁজিৰ ব্যৱহাৰিক প্ৰমাণপত্ৰৰ স্থিতি পৰ্যালোচনা কৰাৰ বাবেও আজিৰ বৈঠকতে নিৰ্দেশ দিয়ে।
মুখ্য মন্ত্ৰীয়ে ৰাজহ আৰু দুৰ্যোগ ব্যৱস্থাপনা বিভাগক বানপ্ৰৱণ জিলা সমূহত সময় সাপেক্ষে সাহায্য প্ৰদানৰ বাবে মাণ্ডলিক ভিত্তিত টাৰপুলিনৰ লেখীয়া অত্যাৱশ্যকীয় সামগ্ৰী মজুতকৰণে মেটেৰিয়েল বেংক স্থাপনৰ দিশত ক্ষীপ্ৰ পদক্ষেপ ল’বলৈও নিৰ্দেশ দিয়ে।
আজিৰ বৈঠকত ৰাজহ আৰু দুৰ্যোগ ব্যৱস্থাপনা বিভাগৰ ৰাজ্যিক মন্ত্ৰী ভৱেশ কলিতা, মুখ্য সচিৱ কুমাৰ সঞ্জয় কৃষ্ণ, অতিৰিক্ত মুখ্য সচিব জিষ্ণু বৰুৱাৰ উপৰি জেষ্ঠ্য বিষয়া সকল উপস্থিত থাকে।