বিটিচি নিৰ্বাচন সন্দৰ্ভত আজি ৰাজ্যিক নিৰ্বাচন আয়োগে এখন সংবাদমেল আয়োজন কৰে।
সংবাদমেল সম্বোধন কৰি ৰাজ্যিক নিৰ্বাচন আয়ুক্ত আলোক কুমাৰে ৪ এপ্ৰিলত বিটিচিৰ পৰিষদীয় নিৰ্বাচন অনুষ্ঠিত হ’ব বুলি ঘোষণা কৰে।
ৰাজ্যিক নিৰ্বাচন আয়োগে আজি বিটিচি পৰিষদীয় নিৰ্বাচনৰ অধিসূচনা জাৰি কৰে।
বিটিচি নিৰ্বাচনত প্ৰতিদ্বন্দ্বিতা কৰিবলগীয়া প্ৰাৰ্থী সকলে ১৮ মাৰ্চৰ ভিতৰত নিজৰ মনোনয়ন দাখিল কৰিব লাগিব।
২১ মাৰ্চৰ আবেলি ৩ বজাৰ ভিতৰত প্ৰাৰ্থী সকলে নিজৰ মনোনয়ন প্ৰত্যাহাৰ কৰিব পাৰিব আৰু ৩ বজাৰ পাছত বিটিচি নিৰ্বাচনত প্ৰতিদ্বন্দ্বিতা আগবঢ়াবলগীয়া প্ৰাৰ্থীসকলৰ তালিকা প্ৰকাশ হ’ব।
আনহাতে, ৪ এপ্ৰিলত অনুষ্ঠিত হ’বলগীয়া বিটিচি নিৰ্বাচনৰ ভোটগণনা ৮ এপ্ৰিলত অনুষ্ঠিত হ’ব।
বিটিএডিৰ মুঠ ৪০ টা সমষ্টিৰ বাবে নিৰ্বাচন অনুষ্ঠিত হ’ব আৰু ৩০৭৭ টা পুলিং ষ্টেশ্যনত মুঠ ২৩,৮৬,৩৫৯ গৰাকী ভোটাৰে ভোটদান সাব্যস্ত কৰিব বুলিও সংবাদমেলত উল্লেখ কৰা হয়।
ভোটদান কৰিবলগীয়া ২৩,৮৬,৩৫৯ গৰাকী ভোটাৰৰ ভিতৰত ১২০৯৪৬৮ গৰাকী পুৰুষ ভোটাৰ আৰু ১১৭৬৮৮৭ গৰাকী মহিলা ভোটাৰ।
ৰাজ্যিক নিৰ্বাচন আয়োগে ভোটদান হ’বলগীয়া ৩০৭৭ টা পুলিং ষ্টেশ্যনৰ ভিতৰত ৫২১ টা পুলিং ষ্টেশ্যনক স্পৰ্শকাতৰ হিচাপে চিহ্নিত কৰিছে।
তদুপৰি, বিটিচিৰ সমগ্ৰ নিৰ্বাচন প্ৰক্ৰিয়াত ২৫ হাজাৰৰ পৰা ৩০ হাজাৰ লোক জড়িত হৈ থাকিব বুলি নিৰ্বাচন আয়োগে উল্লেখ কৰি ভোটদান ৰাতিপুৱা ৮ বজাৰ পৰা আবেলি ৪ বজালৈ অনুষ্ঠিত হ’ব বুলি কয়।
বিটিচি নিৰ্বাচনত প্ৰাৰ্থীত্ব আগবঢ়াবলগীয়া প্ৰাৰ্থী সকলে নিৰ্বাচনৰ প্ৰচাৰৰ বাবে ৭ লাখতকৈ অধিক ধন খৰছ কৰিব নোৱাৰিব বুলিও সংবাদমেলত নিৰ্বাচন আয়োগে উল্লেখ কৰে।
ইতিমধ্যে কেন্দ্ৰীয় চৰকাৰ আৰু ৰাজ্য চৰকাৰৰ লগত সুৰক্ষা নিশ্চিত কৰাৰ বাবে ৰাজ্যিক নিৰ্বাচন আয়োগে বৈঠক অনুষ্ঠিত কৰিছে।
বৈঠকত অসমত থকা অৰ্ধ সামৰিক বাহিনীৰ উপৰিও প্ৰয়োজনত কেন্দ্ৰই সশস্ত্ৰ বাহিনী প্ৰেৰণ কৰিব বুলিও আশ্বাস দিছে বুলিও ৰাজ্যিক নিৰ্বাচন আয়োগে কয়।
ইপিনে, বিটিচি নিৰ্বাচনৰ সময়ত অবৈধ অস্ত্ৰৰ ক্ষেত্ৰতো নিৰ্বাচন আয়োগে কঠোৰ হোৱাৰ ইংগিত দিয়াৰ লগতে সামাজিক মাধ্যমৰ ওপৰতো তীক্ষ্ণ নজৰ ৰখা হ’ব বুলি কয়।
