বিশ্বনাথত কাছ সংৰক্ষণৰ পদক্ষেপে সূচনা কৰিছে নতুন দিগন্তৰ ।
বিশ্বনাথ ঘাটৰ Nature Discovery Centre তথা প্ৰকৃতি আবিষ্কাৰ কেন্দ্ৰত Turtle Survival Alliance India আৰু অসম পৰ্যটন বিভাগে গ্ৰহণ কৰিছে বিশেষ পদক্ষেপ ।
কাছ সংৰক্ষণৰ দিশত বিশেষকৈ বৰমুৰীয়া কাছ সংৰক্ষণৰ বাবে প্ৰতিষ্ঠানটোৱে যোৱা তিনি বছৰৰ পৰা অবিৰতভাৱে চলাই আহিছে বিশেষ অভিযান ।
প্ৰাকৃতিক ভাবে জন্ম দিয়াব পৰাকৈ কেন্দ্ৰটোত ইতিমধ্যে বহু সংখ্যক কাছ পোৱালি জন্ম দিয়াৰ লগতে সুৰক্ষিত স্থানত মুকলি কৰি দিয়াত সফলতা লাভ কৰিছে উক্ত প্ৰতিষ্ঠানটোৱে ।
সাম্প্ৰতিক সময়ত ৰাইজৰ মাজত কাছ সংৰক্ষণৰ ক্ষেত্ৰত সজাগতা মূলক বাৰ্তা প্ৰেৰণ কৰিবলৈ বহু কেইটা সজাগতা মূলক অনুষ্ঠানো অনুষ্ঠিত কৰি আহিছে ।
Turtle Survival Alliance India নামৰ অনুষ্ঠানটিৰ সঞ্চালক প্ৰধান ড’ শৈলেন্দ্ৰ সিংৰ নিৰ্দেশনাত প্ৰকল্প বিষয়া হামিদুৰ ৰহমানৰ তত্বাৱধানত ইতিমধ্যে ধৰা লৈ আগমন ঘটিছে ১০০ৰো অধিক এনে আলহীৰ । ভাল খবৰ এয়াই যে কণ কণ কাছ পোৱালি সমূহ সংৰক্ষিত অৱস্থাত লালন পালন কৰি বৰ্তমান চিৰিয়াখানালৈ প্ৰেৰণ কৰাৰ লগতে প্ৰকৃতিৰ বুকুত মুকলি কৰাৰ বাবে যাৱতীয় প্ৰস্তুতি চলাইছে ।
ইতিপূৰ্বে Turtle Survival Alliance India ৰ সংৰক্ষণকাৰী দলটোৱে নাগশংকৰ দেৱলায়ৰ কৰ্তৃপক্ষৰ সহযোগত দেৱালয়খনত সংৰক্ষিত হৈ থকা কাছ সমূহৰ কণী সংগ্ৰহ কৰি বিশ্বনাথঘাটস্থিত সংৰক্ষিত কেন্দ্ৰটোত বৰ্তমান সফল ভাবে জন্ম দিয়াবলৈ সক্ষম হৈছে কাছ পোৱালিৰ ।
এই সমগ্ৰ প্ৰক্ৰিয়াত বিশ্বনাথ বন্য প্ৰাণী সংমণ্ডল আৰু পূব শোণিতপুৰ বন সংমণ্ডলে বিশেষ সহযোগিতা আগবঢ়াইছে বুলি জানিবলৈ দিছে বিষয়াগৰাকীয়ে ।
তেওঁলোকৰ এই প্ৰচেষ্টাই আগন্তুক দিনত কাছ সংৰক্ষণৰ ক্ষেত্ৰত ৰাইজৰ মাজত সজাগতা সৃষ্টিৰ এক সুন্দৰ নিদৰ্শন দাঙি ধৰিবলৈ সক্ষম হ’ব বুলি ধাৰণা কৰা হৈছে।