বুধবাৰে শিৱসাগৰৰ দিচাংমুখৰ গৰাখহনীয়া অঞ্চল সমূহ পৰিদৰ্শন কৰিবলৈ যোৱা অসম চৰকাৰৰ জলসম্পদ মন্ত্ৰী কেশৱ মহন্ত আৰু যোৰহাট লোকসভা সমষ্টিৰ সাংসদ তপন কুমাৰ গগৈয়ে ছাত্ৰ-ছাত্ৰীৰ প্ৰতিবাদৰ সন্মুখীন হয়।
পৰিদৰ্শনৰ সময়ত স্থানীয় চিতলডুবি প্ৰাথমিক বিদ্যালয় আৰু অফলা হাইস্কুলৰ ছাত্ৰ-ছাত্ৰীয়ে হাতত প্লে কাৰ্ড লৈ আমাৰ শিক্ষানুষ্ঠান ৰক্ষা কৰি আমাৰ ভৱিষ্যত ৰক্ষা কৰক, গৰাখহনীয়া ৰোধ কৰক, আদি শ্ল’গান দি খহনীয়া ৰোধৰ স্থায়ী সমাধান কৰিবলৈ মন্ত্ৰীৰ লগতে সাংসদ গৰাকীক আহ্বান জনায়।
অঞ্চলটোৰ শতাধিক ৰাইজ, তিনিখন গাঁৱৰ উন্নয়ন সমিতি আৰু শিৱসাগৰ জিলা টি এম পি কেই গৰাখহনীয়া ৰোধৰ ব্যৱস্থা গ্ৰহণ কৰিবলৈ সাংসদ-মন্ত্ৰীক স্মাৰক পত্ৰ প্ৰদান কৰে।
উল্লেখ্য যে বৃহত্তৰ দিচাংমুখ অঞ্চলৰ অফলা, চৰাইপৰা, মামল গড়ভঙা আদি অঞ্চলত ব্ৰহ্মপুত্ৰ নদীৰ গৰাখহনীয়াই ভয়াৱহ ৰূপ ধাৰণ কৰি আহিছে।
এইবাৰ বানপানীৰ পাছত ব্ৰহ্মপুত্ৰ নদীয়ে শ-শ হেক্টৰ মাটি খহাই নিয়াৰ ফলত উক্ত অঞ্চলৰ ৰাইজৰ মাজত সন্ত্ৰাসৰ সৃষ্টি হৈছিল।
সংবাদ মাধ্যমত এই খবৰ লাভ কৰি বুধবাৰে সাংসদ তপন কুমাৰ গগৈ আৰু মন্ত্ৰী কেশৱ মহন্ত, জিলা প্ৰশাসন আৰু জলসম্পদ বিভাগৰ শীৰ্ষ বিষয়া সকলে খহনীয়া অঞ্চল সমূহ নাৱেৰে পৰিদৰ্শন কৰে।
ইফালে সাংসদ তপন গগৈ আৰু মন্ত্ৰী কেশৱ মহন্তই কণ-কণ ছাত্ৰ-ছাত্ৰী সকলে এই দৰে প্ৰতিবাদ কৰা দেখি দুখ প্ৰকাশ কৰিছে আৰু চলিত বৰ্ষতেই আঁচনি প্ৰস্তুত কৰি খহনীয়া ৰোধৰ ব্যৱস্থা কৰিব বুলি প্ৰতিশ্ৰুতি দিয়ে।
গৰাখহনীয়া পৰিদৰ্শনৰ সময়ত কেশৱ মহন্ত, তপন গগৈৰ উপৰি বিধায়ক কুশল দুৱৰী, যোগেন মহন, জিলা উপায়ুক্ত ডাঃ এচ লক্ষ্মণন আৰু জলসম্পদ বিভাগৰ বিষয়াসকল উপস্থিত থাকে।