সোণালী জয়ন্তী বৰ্ষত ভৰি দিয়া অসম তথা উত্তৰ-পূৰ্বাঞ্চলৰ কৃষি শিক্ষাৰ একমাত্ৰ উচ্চ শিক্ষানুষ্ঠান অসম কৃষি বিশ্ববিদ্যালয়ে বিভিন্ন বিষয়ত লাভ কৰা সফলতাৰ বাবে বিশ্ববিদ্যালয়খনে ভাৰতৰ লগতে অসমলৈও এক আশাৰ বতাৰ কঢ়িয়াই আনিছে।
পাঁচটা দশক সম্পূৰ্ণ কৰা বিশ্ববিদ্যালয়খনে কৃষি শিক্ষা-গৱেষণাত অভিৱন সফলতা, নতুন কৃষি প্ৰযুক্তিৰ উদ্ভাৱন, শ্ৰেণীকোঠাত শেহতীয়া তথ্য প্ৰযুক্তিৰ প্ৰয়োগৰ সুবিধা আগবঢ়োৱা, ছাত্ৰ অৱস্থাতে বিদেশত অধিক উন্নত গৱেষণাৰ বাবে পদক্ষেপ গ্ৰহণ কৰাকে ধৰি বিভিন্ন ক্ষেত্ৰত বিশ্ববিদ্যালয়খনে শেহতীয়াকৈ এক নতুন গতি লাভ কৰি সফলতা অৰ্জন কৰিবলৈ সক্ষম হৈছে। ফলত বিগত এটা দশকৰ ভিতৰত কৃষি বিশ্ববিদ্যালয়খনত কৃষি শিক্ষা গ্ৰহণৰ বাবে আগ্ৰহী ছাত্ৰ-ছাত্ৰীৰ সংখ্যা উৎসাহজনকভাৱে বৃদ্ধি পাইছে।
তাৰোপৰি বিশ্ববিদ্যালয়খনত বিশ্বমানৰ গৱেষণাগাৰ, গ্ৰন্থাগাৰ, ছাত্ৰাৱাস আদিৰ সুবিধা আগবঢ়োৱাৰ ফলত বিগত এটা দশকৰ ভিতৰতে ৯ খনকৈ বিদেশী ৰাষ্ট্ৰৰ ছাত্ৰ-ছাত্ৰীয়ে কৃষি শিক্ষা, গৱেষণাৰ বাবে অসম কৃষি বিশ্ববিদ্যালয়ত নামভৰ্তি কৰাটোও বিশ্ববিদ্যালয়খনৰ আন এক সফলতা।
উল্লেখযোগ্য যে ২০১৮ বৰ্ষত ১০৭০.২৩ শতাংশতকৈও অধিক মেধাৱী ছাত্ৰ-ছাত্ৰীয়ে কৃষি শিক্ষা গ্ৰহণৰ অৰ্থে আগ্ৰহ প্ৰকাশ কৰা কথাই প্ৰমাণ কৰিছে যে অসম কৃষি বিশ্ববিদ্যালয়ে সম্প্ৰতি কৃষি শিক্ষাৰ উৎকৰ্ষ সাধনত ফলপ্ৰসূ ব্যৱস্থা গ্ৰহণ কৰিছে।
মন কৰিব লগীয়া যে পূৰ্বতে ইঞ্জিনিয়াৰিং, মেডিকেলত নাম ভৰ্তি কৰাৰ সুবিধা লাভ নকৰিলেহে বহু মেধাৱী ছাত্ৰ-ছাত্ৰীয়ে কৃষি শিক্ষাৰ বাবে আগ্ৰহ প্ৰকাশ কৰিছিল। কিন্তু বৰ্তমান বিশ্ব বিদ্যালয়খনৰ সফলতাৰ বাবে কৃষি শিক্ষাৰ প্ৰতি ক্ৰমাৎ অভাৱনীয় গতিত বৃদ্ধি পাইছে মেধাৱী ছাত্ৰ-ছাত্ৰীৰ আগ্ৰহ।