শিৱসাগৰৰ ঐতিহাসিক শিৱদ’ল প্ৰাংগণত যোৱা ২০ ফেব্ৰুৱাৰিৰ পৰা অনুষ্ঠিত হোৱা শ্ৰী শ্ৰী মহাশিৱৰাত্ৰি আৰু আন্তঃৰাষ্ট্ৰীয় শিৱ উৎসৱৰ দেওবাৰে সমাৰণি পৰে।
শিৱসাগৰ জিলা আৰক্ষী অধীক্ষক অমিতাভ সিনহাই চাৰিদিনীয়াকৈ অনুষ্ঠিত শ্ৰী শ্ৰী মহা শিৱৰাত্ৰি আৰু আন্তঃৰাষ্ট্ৰীয় শিৱ উৎসৱৰ আনুষ্ঠানিকভাৱে সামৰণি পৰা বুলি ঘোষণা কৰে আৰু উৎসৱৰ সফল সমাপ্তিৰ বাবে উদযাপন সমিতি, দ’ল উন্নয়ন পৰিষদ, স্বেচ্ছাসেৱক, নিৰাপত্তাৰক্ষীকে ধৰি সাধাৰণ ৰাইজক ধন্যবাদ জ্ঞাপন কৰে।
উল্লেখ্য যে এইবাৰ শ্ৰী শ্ৰী মহা শিৱৰাত্ৰি আৰু আন্তঃৰাষ্ট্ৰীয় শিৱ উৎসৱত লাখ-লাখ ভক্তৰ সমাগম হোৱা দেখা গৈছে যদিও মেলাত দোকান দিয়া ব্যৱসায়ী সকল লোকচানৰ সন্মুখীন হোৱাৰ লগতে খাদ্যৰ নামত অখাদ্য খাই বহুকেইজন ছাত্ৰ অসুস্থ হোৱাৰ কথা জানিব পৰা গৈছে।
ৰাজ্যৰ লগতে দেশৰ বিভিন্ন প্ৰান্তৰ পৰা অহা প্ৰায় হাজাৰৰো অধিক বেপাৰীয়ে এইবাৰ মেলাত লোকচানৰ সন্মুখীন হোৱাৰ কথা নিজমুখে সাংবাদিকৰ আগত প্ৰকাশ কৰে।
মেলাত দৰ্শনাৰ্থী আৰু ক্ৰেতাৰ সংখ্যা কমা নাছিল। কিন্তু এইবাৰ দ’ল উন্নয়ন পৰিষদে দোকান আৱন্টন প্ৰক্ৰিয়া নিলামৰ জৰিয়তে কৰা প্ৰাৰম্ভিক দৰতকৈ কেইবা গুণ বেছিত ক্ৰয় কৰিব লগীয়া হোৱাত ব্যৱসায়ী সকল লোকচানৰ সন্মুখীন হোৱা বুলি জানিবলৈ দিয়ে।
আনহাতে মহোৎসৱৰ মূল কেন্টিনৰ খাদ্য গ্ৰহণ কৰি বহুকেইজন স্বেচ্ছাসেৱক ছাত্ৰই বমি কৰি অসুস্থ হোৱাৰ কথা জানিব পৰা গৈছে।
বহু অভিযোগৰ পাছতো উদ্যোক্তা সমিতিয়ে এনে নিম্ন মানৰ খাদ্যৰ যোগান ধৰা লোকৰ বিৰুদ্ধে কোনো ব্যৱস্থা গ্ৰহণ কৰা পৰিলক্ষিত নহ’ল। এনে খাদ্য খাই বিগত চাৰি দিনত বহু কেইজন স্বেচ্ছাসেৱী ছাত্র অসুস্থ হৈ পৰে।
আনহাতে শ্ৰী শ্ৰী মহা শিৱৰাত্ৰী আৰু আন্তঃৰাষ্ট্ৰীয় শিৱ উৎসৱৰ শেষ নিশাৰ সাংস্কৃতিক আনুষ্ঠান হিচাপে কমলা গগৈৰ টোকাৰী গীতৰ লগতে ‘হৰি হৰৰ যুদ্ধ আৰু বানৰ’ পৰাজয় ভাওনা প্ৰদৰ্শন কৰা হয়।
চাৰিদনীয়াকৈ অনুষ্ঠিত হোৱা শিৱৰাত্ৰি আৰু আন্তঃৰাষ্ট্ৰীয় শিৱ উৎসৱৰ সামৰণি অনুষ্ঠানত শিৱসাগৰ জিলা আৰক্ষী অধীক্ষক অমিতাভ সিনহা, উদযাপন সমিতিৰ সভাপতি গংগামোহন বৰগোহাঁই, সাধাৰণ সম্পাদক চন্দন ফুকন, শিৱসাগৰ বাণিজ্য মহাবিদ্যালয়ৰ প্ৰাক্তন অধ্যক্ষ কাৰ্তিক চন্দ্ৰ দত্তকে ধৰি বহু গণ্য মান্য ব্যক্তি উপস্থিত থাকে।