অভিনেত্ৰী জেকলিনৰ সৈতে জড়িত সুকেশ; কেৱল কৰ হিচাপে দিব বিচাৰে ৭৬৪০ কোটি টকা!

আৰ্থিক কেলেংকাৰীত জড়িত ব্যৱসায়ী সুকেশ চন্দ্ৰশেখৰৰ সৈতে অভিনেত্ৰী জেকলিন ফাৰ্নাণ্ডেজৰ সম্পৰ্ক চৰ্চিত। যোৱা ডিচেম্বৰ মাহত তেওঁ জেকলিনক এখন আঙুৰৰ বাগিচা উপহাৰ দিছিল। সেই সুকেশে কেতিয়াবা অভিনেত্ৰীগৰাকীক প্ৰমোদ তৰী, কেতিয়াবা পাৰস্যৰ মেকুৰী উপহাৰ দিছে।

সেই সুকেশ আকৌ এবাৰ খবৰৰ শিৰোণামত। এইবাৰ তেওঁ চিঠি লিখিলে কেন্দ্ৰীয় বিত্তমন্ত্ৰী নিৰ্মলা সীতাৰমণলৈ। কি আছে সেই চিঠিখনত?

সুকেশে জনাইছে যে লছ এঞ্জেলছ হোল্ডিংছ ইণ্টাৰনেশ্যনেল, নেভাদাত পঞ্জীয়নভুক্ত স্পীড গেমিং কৰ্প’ৰেশ্যন  অনলাইন বেটিং ব্যৱসায়ৰ সৈতে জড়িত। সেই ব্যৱসায়টো ২০১৬ চনৰ পৰাই চলি আছে। ২০২৪ চনত সেই কোম্পানীসমূহৰ টাৰ্ণঅভাৰ ২.৭০ বিলিয়ন ডলাৰ।

আমেৰিকা, স্পেইন, ব্ৰিটেইন, ডুবাই, হংকঙত তেওঁৰ ব্যৱসায় আছে। তেওঁ ভাৰতৰ ওচৰত থকা সকলো আয়কৰ নিষ্পত্তি কৰিব বিচাৰে। তেওঁ ২০২৪ চনত উপাৰ্জন কৰা আয়ৰ ওপৰত কৰ হিচাপে ভাৰত চৰকাৰক ৭৬৪০ কোটি টকা দিব বিচাৰিছে। তেওঁ ভাৰতত অনলাইন স্কিল গেমিং ব্যৱসায় আৰু প্ৰযুক্তিবিদ্যাত বিনিয়োগ কৰিব বিচাৰে।

চৰকাৰী বিষয়াৰ ৰূপ লৈ প্ৰৱঞ্চনাকে ধৰি বিভিন্ন উপায়েৰে কোটি কোটি টকা আত্মসাৎ কৰিছিল সুকেশে। ইয়াৰ বাবে ২০১৫ চনত দিল্লী আৰক্ষীয়ে তেওঁক গ্ৰেপ্তাৰ কৰিছে। তেওঁৰ প্ৰৱঞ্চনাৰ বলি হৈছে দেশৰ কেইবাজনো প্ৰভাৱশালী ব্যৱসায়ী তথা ব্যক্তি। তেওঁৰ বিৰুদ্ধে আছে ২০০ কোটি টকাৰ হাৱালা লেনদেনৰ অভিযোগ।