ছানী দেওলৰ ছবি মানেই বক্স অফিচত এক বিৰাট বিস্ফোৰণ। এই কথাটো পুনৰ এবাৰ প্ৰমাণ কৰিলে বৰ্ডাৰ ২ নামৰ ছবিখনে। মুক্তিৰ মাত্ৰ তিনি দিনৰ ভিতৰতে ১০০ কোটি টকাৰ সীমা অতিক্ৰম কৰি এই ছবিখনে এক নতুন অভিলেখ গঢ়িছে।
সাধাৰণতে সোমবাৰৰ দৰে কৰ্মব্যস্ত দিনত বহুতো ডাঙৰ ছবিৰ ব্যৱসায় কিছু পৰিমাণে কমি যায়, কিন্তু জে পি দত্তৰ উত্তৰসুৰীসকলে সোমবাৰে বক্স অফিচত যি চমক দেখুৱালে, তাক দেখি বাণিজ্য বিশেষজ্ঞসকল আচৰিত হৈ পৰিছে। চতুৰ্থ দিনৰ অন্তত ছবিখন এতিয়া দ্ৰুতগতিত ২০০ কোটি টকাৰ ক্লাবৰ দিশে আগবাঢ়িছে।
ট্ৰেড এনালিষ্টসকলৰ প্ৰাথমিক হিচাপ অনুসৰি, সোমবাৰে প্ৰজাতন্ত্ৰ দিৱসৰ দিনা ছবিখনৰ উপাৰ্জন যোৱা চাৰি দিনৰ ভিতৰত সৰ্বাধিক আছিল। ই প্ৰমাণ কৰিছে যে দেশপ্ৰেমমূলক ছবি আজিও বক্স অফিচত এক সফল সূত্ৰ। চতুৰ্থ দিনা ছবিখনে ৫৬ কোটি টকা উপাৰ্জন কৰিছে, যিটো তৃতীয় দিনৰ উপাৰ্জনতকৈও বেছি। ছবিখনৰ প্ৰথম দিনাৰ উপাৰ্জন আছিল ৩০ কোটি টকা, দ্বিতীয় দিনা ৩৬.৫ কোটি আৰু তৃতীয় দিনা ই ৫৪.৫ কোটিলৈ বৃদ্ধি পাইছিল। সকলো মিলি চাৰি দিনত ছবিখনৰ আনুমানিক উপাৰ্জন ভাৰতীয় বক্স অফিচত প্ৰায় ১৭৭ কোটি টকা হৈছে। আনহাতে বিশ্বজুৰি ছবিখনৰ সংগ্ৰহৰ কথা ক’বলৈ গ’লে ই ইতিমধ্যে ১৮৫ কোটি টকা অতিক্ৰম কৰিছে।
সাধাৰণতে দেওবাৰৰ পাছত সোমবাৰে ছবিৰ উপাৰ্জন যথেষ্ট হ্ৰাস পায়, কিন্তু বৰ্ডাৰ ২ ৰ ক্ষেত্ৰত তেনে কোনো পতন দেখা নগ’ল। ইয়াৰ এটা ডাঙৰ কাৰণ হ’ল প্ৰজাতন্ত্ৰ দিৱসৰ ছুটি আৰু দৰ্শকৰ আবেগ। সানি দেওলৰ লগতে বৰুণ ধাওয়ান আৰু দিলজিৎ দোচাঞ্জৰ যুটিয়ে সকলো বয়সৰ দৰ্শকক ছবিগৃহলৈ আকৰ্ষিত কৰিছে। ছবিখনৰ কাহিনী আৰু শক্তিশালী অভিনেতাৰ দলটোৱে দৰ্শকৰ হৃদয় স্পৰ্শ কৰিবলৈ সক্ষম হৈছে। ছানী দেওলক ইয়াত এজন অভিজ্ঞ সেনা জোৱানৰ চৰিত্ৰত দেখা গৈছে আৰু দিলজিৎ দোচাঞ্জক এগৰাকী ফাইটাৰ পাইলটৰ চৰিত্ৰত দেখা গৈছে। আহান শেট্টীয়ে নৌসেনাৰ জোৱানৰ ভূমিকাত আৰু বৰুণ ধাওয়ানেও এজন সেনা কৰ্মীৰ চৰিত্ৰত অভিনয় কৰিছে।
১৯৭১ চনৰ ভাৰত-পাকিস্তান যুদ্ধৰ প্ৰেক্ষাপটত নিৰ্মিত এই ছবিখনত ভাৰতীয় স্থলসেনা, বায়ুসেনা আৰু নৌসেনাৰ যুটীয়া অভিযানৰ কাহিনী কোৱা হৈছে। যি গতিৰে ছবিখন আগবাঢ়িছে, সেই অনুসৰি অহা বুধবাৰৰ ভিতৰতে এই ছবিখনে ২০০ কোটিৰ ক্লাৱত প্ৰৱেশ কৰিব বুলি ধাৰণা কৰা হৈছে।
চিনেমা হলৰ মালিকসকলৰ মতে সৰু চহৰৰ পৰা ডাঙৰ চহৰলৈকে সকলোতে বৰ্ডাৰ ২ ক লৈ উত্তেজনা তুংগত আছে। অনুৰাগ সিঙৰ পৰিচালনাত নিৰ্মিত এই ছবিখন ২০২৬ চনৰ প্ৰথমটো ব্লকবাষ্টাৰ হিচাপে ইতিমধ্যে পৰিগণিত হৈছে। এই সপ্তাহত আন কোনো ডাঙৰ ছবি মুক্তি নোপোৱাৰ বাবে বক্স অফিচত ছানী দেওলৰ এই জয়যাত্ৰা অব্যাহত থকাটো নিশ্চিত।
