সাধাৰণতে কলেজৰ নামভৰ্তিৰ মেধাৰ তালিকাত বিসংগতি ধৰা পৰাটো আচৰিত কথা নহয়। স্বাভাৱিকতে সৰুসুৰা ভুল থাকিবই পাৰে।
কিন্তু পশ্চিমবংগৰ দক্ষিণ কলকাতাৰ প্ৰসিদ্ধ আশুতোষ কলেজৰ ইংৰাজী বিভাগৰ মেধাৰ তালিকা দেখি সকলোৰে চকু কপালত উঠা অৱস্থা।
কিয়নো সেই তালিকাত দেখা গৈছে যে প্ৰথমতেই আছে ছানি লিয়নিৰ নাম।
চলিত শিক্ষাবৰ্ষত ছানি লিয়নি উত্তীৰ্ণ হোৱা বুলি উল্লেখ কৰা হৈছে। সেয়াই নহয়, মেধাৰ তালিকাত প্ৰাপ্ত নম্বৰো দিয়া হৈছে।
পিচে, মেধাৰ তালিকা দেখাৰ পাছত সকলোৰে প্ৰশ্ন সঁচাকৈয়ে এইখন কলেজত ছানি লিয়নিয়ে নাম ভৰ্তি কৰিব নেকি?
বৃহস্পতিবাৰে আশুতোষ কলেজৰ মেধা তালিকা প্ৰকাশ পাইছিল। সেই তালিকাৰ প্ৰথমতেই আছিল চলচ্চিত্ৰ তাৰকা ছানি লিয়নিৰ নাম।
ছানি লিয়নিৰ আবেদন পত্ৰৰ নম্বৰ হৈছে ৯৫১৩০০৮৭০৪ আৰু ৰোল নম্বৰ হৈছে ২০৭৭৭৭-৬৬৬৬।
বেষ্ট অফ ফ’ৰত তেওঁৰ প্ৰাপ্ত নম্বৰ হৈছে ৪০০ আৰু সেইদৰে প্ৰতিটো বিষয়তে তেওঁ এশ শতাংশ নম্বৰ লাভ কৰিছে।
ছচিয়েল মিডিয়াতো ভাইৰেল হৈ পৰিছে এই মেধাৰ তালিকা।
কলেজখনৰ কেবল ইংৰাজী বিভাগৰে নহয়, কম্পিউটাৰ ছায়েন্স বিভাগৰ মেধাৰ তালিকাতো বহু বিসংগতি ধৰা পৰিছে।
অৱশেষত কলেজ কৰ্তৃপক্ষৰ নজৰলৈ আহে এনে বিসংগতিৰ বিষয়টো। অনিচ্ছাকৃত এনে ভুলৰ বাবে ক্ষমাও বিচাৰিছে কৰ্তৃপক্ষই।
কিন্তু প্ৰসিদ্ধ কলেজখনৰ প্ৰকাশিত এনে মেধাৰ তালিকা দিনটোৰ বাবে সকলোৰে মাজত চৰ্চাৰ কেন্দ্ৰবিন্দু হৈ পৰে।
