স্নাতকোত্তৰ শ্ৰেণীত কৰ্মৰত চিকিৎসকৰ নামভৰ্তিত সংৰক্ষণৰ ক্ষেত্ৰত উচ্চতম ন্যায়ালয়ে সোমবাৰে সন্মতি প্ৰদান কৰিছে।
সৰ্বোচ্চ আদালতখনে লগতে প্ৰাৰ্থীসকলক কমেও পাঁচ বছৰ গ্ৰাম্যাঞ্চল, পাহাৰীয়া বা আদিবাসী অঞ্চলত কাম কৰিবলৈ প্ৰেৰণ কৰা উচিত বুলি মন্তব্য কৰিছে।
ইয়াৰ বাবে আদালতে ৰাজ্যসমূহক নিয়মাৱলী প্ৰস্তুত কৰাৰ নিৰ্দেশ দিছে।
উচ্চতম ন্যায়ালয়ৰ সাংবিধানিক বিচাৰপীঠে কয় যে সংবিধানত কৰ্মৰত চিকিৎসকলৰ সংৰক্ষণৰ ক্ষেত্ৰত ৰাজ্য চৰকাৰসমূহক বাধা দিয়াৰ কোনো আইন নাই।
চিকিৎসকলৰ সংস্থাসমূহে দাখিল কৰা এলানি আবেদনত সন্মতি প্ৰদান কৰি উচ্চতম ন্যায়ালয়ে কয় যে যিহেতু মেডিকেল কাউন্সিল অফ ইণ্ডিয়াই দায়িত্ব ল’ব পৰা নাই, গতিকে সংবিধান অনুসৰি ৰাজ্য চৰকাৰে ইয়াৰ দায়িত্ব গ্ৰহণ কৰিব পাৰে। সেইদৰে দ্বিতীয় তালিকাত প্ৰয়োজন সাপেক্ষে অন্তৰ্ভুক্ত কৰিব পাৰে।
আদালতখনৰ সাংবিধানিক বিচাৰপীঠে জানিবলৈ দিয়ে যে ৰাজ্য চৰকাৰসমূহে সংৰক্ষণৰ প্ৰাৰ্থীসকলক এটা চৰ্ত দিয়া উচিত। তেওঁলোকে কমেও পাঁচ বছৰ গ্ৰাম্যাঞ্চল, পাহাৰীয়া বা আদিবাসী অঞ্চলত চিকিৎসা সেৱা আগবঢ়াব লাগিব।
অৱশ্যে, ইতিমধ্যে আৰম্ভ হৈ যোৱা নামভৰ্তিৰ প্ৰক্ৰিয়াত এই ৰায়ৰ কোনো প্ৰভাৱ নপৰে বুলি আদালতে স্পষ্ট কৰি দিছে। পৰৱৰ্তী সময়ত স্নাতনকোত্তৰ শ্ৰেণীত নামভৰ্তি কৰিবলগীয়াসকলৰ ক্ষেত্ৰতহে এই ৰায় প্ৰযোজ্য হ’ব।
কেইখনমান ৰাজ্যৰ নিয়মত কোৱা হৈছিল যে অত্যন্ত অনগ্ৰসৰ অঞ্চলত কাম কৰিলে চিকিৎসকসকলক প্ৰতিবছৰৰ বাবে ১০শতাংশলৈকে নম্বৰ ইনছেনটিভ হিচাপে দিয়া হ’ব পাৰে।
চিকিৎসকসকলে উচ্চতম ন্যায়ালয়ত স্নাতকোত্তৰ শ্ৰেণীত চিকিৎসকৰ নামভৰ্তিৰ ক্ষেত্ৰত ইনছেনটিভ নম্বৰৰ সলনি সংৰক্ষণ ব্যৱস্থা বিচাৰি আবেদন জনাইছিল।
