ভাৰতৰ উচ্চতম ন্যায়ালয়ে বৃহস্পতিবাৰে এজন অধিবক্তাই দাখিল কৰা এক আচৰিত আবেদন খাৰিজ কৰি দিছে। এই আবেদনখনত অধিবক্তাজনে ২০১৮ চনত ভাৰতৰ তেতিয়াৰ মুখ্য ন্যায়াধীশ দীপক মিশ্ৰক বচাবলৈ ছটাকৈ গোচৰ ৰুজু কৰাৰ বাবদ মাচুল আৰু খৰচ হিচাপে কেন্দ্ৰীয় চৰকাৰৰ পৰা ১ কোটি টকা বিচাৰিছিল। মুখ্য ন্যায়াধীশ সূৰ্য্য কান্ত, ন্যায়াধীশ জয়মল্য বাগচি আৰু ন্যায়াধীশ বিপুল এম পাঞ্চোলিৰ বিচাৰপীঠে এই আবেদনখনক সম্পূৰ্ণ ভুল ধাৰণা বুলি অভিহিত কৰি নাকচ কৰে।
আচলতে এই সমগ্ৰ ঘটনাটো যোৱা বছৰৰ মাৰ্চ মাহত এলাহাবাদ উচ্চ ন্যায়ালয়ৰ লক্ষ্ণৌ বিচাৰপীঠে দিয়া এটা নিৰ্দেশৰ পৰা আৰম্ভ হৈছিল। লক্ষ্ণৌৰ অধিবক্তা অশোক পাণ্ডেই দাখিল কৰা আবেদনখন উচ্চ ন্যায়ালয়ে পূৰ্বতেই খাৰিজ কৰিছিল, য’ত তেওঁ ছটা গোচৰৰ খৰচ হিচাপে ১ কোটি টকা বিচাৰিছিল। সেই নিৰ্দেশক প্ৰত্যাহ্বান জনাই পাণ্ডেই উচ্চতম ন্যায়ালয়ৰ দ্বাৰস্থ হৈছিল। তেওঁ আদালতত কয় যে সেই সময়ত তেতিয়াৰ মুখ্য ন্যায়াধীশ দীপক মিশ্ৰক ৰক্ষা কৰিবলৈ তেওঁ নিজাববীয়াকৈ এই গোচৰসমূহ তৰিছিল।
আবেদনকাৰী অধিবক্তাজনে আদালতত যুক্তি দিছিল যে সেই গোচৰসমূহ চলাবলৈ তেওঁৰ ২ লাখ টকা খৰচ হৈছিল আৰু সেই ধন তেওঁ নিজৰ কন্যাৰ পৰা ধাৰলৈ লৈছিল। তেওঁ ২০১৮ চনৰ জানুৱাৰী মাহত উচ্চতম ন্যায়ালয়ৰ চাৰিজন জ্যেষ্ঠ ন্যায়াধীশে সংবাদমেল সম্বোধন কৰা ঐতিহাসিক ঘটনাটোৰ কথাও উল্লেখ কৰে। তেওঁৰ মতে ন্যায়াধীশসকলে সংবাদমেল পাতি মুখ্য ন্যায়াধীশৰ বিৰুদ্ধে অভিযোগ উত্থাপন কৰাটো নীতিৰ বিৰুদ্ধে আছিল আৰু সেইবাবেই তেওঁ প্ৰতিষ্ঠানটোক ৰক্ষা কৰিবলৈ আইনী যুঁজ দিছিল।
শুনানিৰ সময়ত বিচাৰপীঠে আবেদনকাৰীৰ যুক্তিক লৈ তীক্ষ্ণ মন্তব্য কৰে। মুখ্য ন্যায়াধীশ সূৰ্য্য কান্তই কয় যে যদি তেওঁ এনেদৰে প্ৰতিষ্ঠানটোৰ বাবে কিবা কৰিছে, তেন্তে সেয়া আছিল এক সমাজ সেৱা। সমাজ সেৱা সদায় অমূল্য আৰু ইয়াক ১ কোটি বা ২ কোটি টকাৰে মূল্যায়ন কৰিব নোৱাৰি। আদালতে ধেমেলীয়া সুৰত কয় যে যদি তেওঁক সেৱাৰ বাবে প্ৰশংসা লাগে, তেন্তে আদালতে তেওঁক শলাগ লৈছে, কিন্তু ধন দিব নোৱাৰে।
২০২৪ চনৰ জুলাই মাহত কেন্দ্ৰীয় আইন আৰু ন্যায় মন্ত্ৰালয়েও অধিবক্তা পাণ্ডেইৰ এই ১ কোটি টকাৰ দাবী নাকচ কৰি এক নিৰ্দেশ জাৰি কৰিছিল। সেই নিৰ্দেশকো তেওঁ আদালতত প্ৰত্যাহ্বান জনাইছিল। অৱশেষত উচ্চতম ন্যায়ালয়ে তেওঁৰ সকলো যুক্তি অগ্ৰাহ্য কৰি আবেদনখন খাৰিজ কৰে। ইয়াৰ দ্বাৰা স্পষ্ট হ’ল যে ব্যক্তিগত উদ্যোগত কৰা সমাজ সেৱা বা আইনী কামৰ বাবে চৰকাৰৰ পৰা বৃহৎ অংকৰ ধন দাবী কৰাটো গ্ৰহণযোগ্য নহয়।
