এডিটৰ্ছ গিল্ডৰ সদস্যসকলে সকাহ পালে। তেওঁলোকৰ আবেদনৰ ভিত্তিত উচ্চতম ন্যায়ালয়ে মণিপুৰৰ ৰাজ্য চৰকাৰক জাননী দিছে যে গিল্ডৰ সদস্যসকলৰ বিৰুদ্ধে যাতে কোনো ধৰণৰ দমনমূলক ব্যৱস্থা গ্ৰহণ কৰা নহয়। মণিপুৰ চৰকাৰে তেওঁলোকৰ বিৰুদ্ধে কোনো ধৰণে জোৰ-জবৰদস্তি ব্যৱস্থা ল’ব পাৰে বুলি আশংকা কৰি গিল্ডৰ সদস্যসকলে আদালতত আবেদন জনাইছিল।
উচ্চতম ন্যায়ালয়ৰ তিনিজনীয়া ন্যায়াধীশৰ বিশেষ বিচাৰপীঠে তেওঁলোকৰ বিৰুদ্ধে এনে কোনো ব্যৱস্থা গ্ৰহণ কৰাত কঠোৰ নিষেধাজ্ঞা আৰোপ কৰিছে। ন্যায়াধীশ ডি ৱাই চন্দ্ৰচুড়ে নিজেই বিচাৰপীঠৰ অধ্যক্ষতা কৰে।
উল্লেখ্য যে কিছুদিন পূৰ্বে মণিপুৰ চৰকাৰে এডিটৰ্ছ গিল্ড অফ ইণ্ডিয়াৰ (ইজিআই) বিৰুদ্ধে এজাহাৰ দাখিল কৰিছিল। এডিটৰ্ছ গিল্ডৰ সদস্যসকলে ৰাজ্যত অধিক সংঘৰ্ষ আৰু হিংসাত্মক পৰিস্থিতিৰ সৃষ্টি কৰিবলৈ চেষ্টা চলাইছে বুলি চৰকাৰে দাবী কৰিছিল।
লগতে পঢ়ক: নখ-দন্তহীন বলিং শ্বাহীন বাহিনীৰ! বিৰাট-ৰাহুলৰ দুৰ্দান্ত শতক, কুলদীপৰ পাঁচ উইকেট; বিধ্বস্ত পাকিস্তান
মণিপুৰৰ মুখ্যমন্ত্রী এন বীৰেণ সিঙে কয় যে ‘’মণিপুৰৰ সংকট সন্দর্ভত ‘ফেক্ট ফাইণ্ডিং’ৰ নামত যি বাতৰি প্রকাশ হৈ আছে সেয়া অতি নিন্দনীয়৷ আমি সকলোৱে মিলি ৰাজ্যত শান্তি আৰু স্বাভাৱিকতা ঘূৰাই অনাৰ চেষ্টা কৰিছো। আৰু, এডিটৰ্ছ গিল্ডৰ সদস্যসকলে ইয়াত অধিক হিংসা আৰু বিশৃংখলতা বিয়পাব বিচাৰে। সেয়ে, তেওঁলোকৰ নামত এফআইআৰ দাখিল কৰা হৈছে।‘’
এফআইআৰত অভিযোগ কৰা হৈছিল যে ইজিআইৰ প্ৰতিবেদনত এটা জ্বলি যোৱা ঘৰৰ ছবি প্ৰকাশ পাইছিল। আৰু ফটোখনৰ কেপচনত লিখা আছিল যে জ্বলি যোৱা ঘৰটো এটা কুকি পৰিয়ালৰ। যিটো ৫ মে’ত জ্বলাই দিয়া হৈছিল। কিন্তু এই তথ্য শুদ্ধ নহয়। সেই ঘৰটো চুৰাচান্দপুৰৰ এখন গাঁৱৰ বন বিভাগৰ কার্যালয়ৰ৷ এই অভিযোগৰ পিছত ইজিআইয়ে গোটেই ঘটনাটোত তেওঁলোকৰ ভুল স্বীকাৰ কৰে। এক্স হেণ্ডেলত তেওঁলোকে কয়, ‘’ছবিখন সম্পাদনা কৰাৰ সময়ত এটা ভুল হৈছিল। ইয়াৰ বাবে আমি দুখিত।‘’
উল্লেখ্য যে ৭ আগষ্টৰ পৰা ১০ আগষ্টলৈ ইজিআইৰ তিনিজনীয়া এখন কমিটীয়ে মণিপুৰ ভ্ৰমণ কৰিছিল আৰু এক প্ৰতিবেদন দাখিল কৰিছিল। তাক লৈয়েই বিতৰ্ক।
লগতে পঢ়ক: বন্ধ আছিল বেংগালুৰু, চৰকাৰী বাছত উঠি ঘৰলৈ উভতিল দেশৰ প্ৰাক্তন তাৰকা ক্ৰিকেটাৰ
প্ৰসংগক্ৰমে, যোৱা পাঁচ মাহ ধৰি মণিপুৰত মেইটেই-কুকি জনগোষ্ঠীয় সংঘৰ্ষ চলি আছে। প্ৰায় প্ৰতিদিনেই সেই ৰাজ্যৰ পৰা সংঘৰ্ষ আৰু মৃত্যুৰ খবৰ আহিছে। এতিয়ালৈকে মৃত্যুৰ সংখ্যা ১৯২। আহত হৈছে বহুলোক। উত্তপ্ত পৰিস্থিতিৰ বাবে মণিপুৰৰ ৰাইজে চৰম দুৰ্দশাত দিন পাৰ কৰিছে। ফলত মণিপুৰৰ আইন-শৃংখলা সন্দৰ্ভত উচ্চতম ন্যায়ালয়ৰ সমালোচনাৰ সন্মুখীন হৈছে কেন্দ্ৰ তথা ৰাজ্য চৰকাৰ।
