সমগ্ৰ দেশৰ কাৰাগাৰত বন্দী হৈ থকা কয়দীসকলক জাতিৰ ভিত্তিত কামৰ ব্যৱস্থা কৰাৰ সন্দৰ্ভত বুধবাৰে (৩ জানুৱাৰী) উচ্চতম ন্যায়ালয়ে এক গুৰুত্বপূৰ্ণ পদক্ষেপ গ্ৰহণ কৰিছে। এই বিষয়ত এখন আবেদনৰ শুনানি গ্ৰহণ কৰি উচ্চতম ন্যায়ালয়ে কেন্দ্ৰ আৰু ১১খন ৰাজ্য চৰকাৰলৈ জাননী জাৰি কৰে। উচ্চতম ন্যায়ালয়ত দাখিল কৰা এই আৱেদনত কাৰাগাৰত জাতিভিত্তিক বৈষম্য নিষিদ্ধ কৰাৰ লগতে বিভিন্ন জাতিৰ ভিত্তিত তেওঁলোকক হাতৰ কাম আবণ্টন দিয়া ৰোধ কৰিবলৈ নিৰ্দেশনা দিবলৈ আৱেদন জনোৱা হৈছিল।
উচ্চতম ন্যায়ালয়ত মুখ্য ন্যায়াধীশ ডি ৱাই চন্দ্ৰচুড়, ন্যায়াধীশ জে বি পাৰ্দিৱালা আৰু ন্যায়াধীশ মনোজ মিশ্ৰৰ বিচাৰপীঠে জ্যেষ্ঠ অধিবক্তা এছ মুৰলীধৰৰ যুক্তি বিবেচনা কৰি এই ১১ ৰাজ্যৰ জেল মেনুৱেলত জাতিভিত্তিক কামৰ আবণ্টনৰ অভিযোগৰ ভিত্তিত ৰাজ্যসমূহৰ পৰা প্ৰতিবেদন বিচাৰিছে।
জ্যেষ্ঠ অধিবক্তা মুৰলীধৰে কয় যে, “ক্ষুদ্ৰ জাতিৰ বন্দী আৰু অভ্যাসগত অপৰাধীক জেলত বেলেগ বেলেগ ব্যৱহাৰ কৰা হয়। ক্ষুদ্ৰ জাতিৰ বন্দীক বৈষম্য কৰা হয় আৰু তেওঁলোকৰ জাতি অনুসৰি কাম দিয়া হয়।”
লগতে পঢ়কঃ ভাৰত-দক্ষিণ আফ্ৰিকা: দ্বিতীয় টেষ্টৰ প্ৰথম দিনা ২৩টা উইকেটৰ পতন; ০ৰানত ভাৰতে হেৰুৱালে অন্তিম ৬ উইকেট
ইয়াৰ পাছতে উচ্চতম ন্যায়ালয়ে কেন্দ্ৰীয় গৃহ মন্ত্ৰালয়কে ধৰি অন্যান্যক জাননী জাৰি কৰি ছলিচিটৰ জেনেৰেল তুষাৰ মেহতাক মহাৰাষ্ট্ৰৰ কল্যাণ নিবাসী সুকন্যা শান্তই দাখিল কৰা পিআইএলত উত্থাপিত বিষয়সমূহৰ সৈতে মোকাবিলা কৰিবলৈ আদালতক সহায় কৰিবলৈ কয়।
ছলিচিটৰ জেনেৰেলে কয়, “মই জাতিভিত্তিক বৈষম্যৰ কথা শুনা নাই। কামৰ বিতৰণ সাধাৰণতে আণ্ডাৰট্ৰাইল আৰু দোষীৰ ওপৰত ভিত্তি কৰি কৰা হয়।”
আদালতৰ নিৰ্দেশত যিবোৰ ৰাজ্যলৈ এই জাননী জাৰি কৰা হৈছে, সেইবোৰ হৈছে উত্তৰ প্ৰদেশ, পশ্চিম বংগ, মধ্যপ্ৰদেশ, অন্ধ্ৰ প্ৰদেশ, তেলেংগানা, পঞ্জাব, ওড়িশা, ঝাৰখণ্ড, কেৰালা, তামিলনাডু আৰু মহাৰাষ্ট্ৰ। এই আটাইকেইখন ৰাজ্যলৈ জাননী জাৰি কৰাৰ সমান্তৰালকৈ উচ্চতম ন্যায়ালয়ে চাৰি সপ্তাহৰ পাছত এই গোচৰৰ পৰৱৰ্তী শুনানিৰ দিন নিৰ্ধাৰণ কৰিছে।
আজিও ৰাজস্থানকে ধৰি দেশৰ বহু কাৰাগাৰত ব্ৰিটিছ শাসনৰ জেল মেনুৱেল অনুসৰি কাম আবণ্টন দিয়া হয়। জেলত প্ৰৱেশ কৰা প্ৰতিজন অভিযুক্তক তেওঁৰ জাতিৰ বিষয়ে সোধা হয়। মানৱ অধিকাৰৰ সৈতে জড়িত এটা সংস্থাই দাবী কৰিছিল যে নিম্ন শ্ৰেণীৰ কয়দীসকলক শৌচাগাৰ আৰু কাৰাগাৰ চাফা কৰাৰ দৰে কাম দিয়া হয়।
লগতে পঢ়কঃহোটেলৰ কোঠাত হত্যা মডেলকঃ বিলাসী বাহনত উঠাই নি লুকুৱালে মৃতদেহ
প্ৰতিবেদন অনুসৰি জাতি শ্ৰেণীগত ভিত্তিত তলত থকাসকলে চাফাই কাম কৰে, আনহাতে উচ্চ শ্ৰেণীৰ লোকসকলে পাকঘৰ বা আইনী নথি বিভাগৰ কাম চম্ভালে। আনহাতে, ধনী আৰু প্ৰভাৱশালীসকলে কোনো কাম নকৰে। ব্ৰিটিছ যুগৰ মেনুৱেলত অতি কম সংশোধন কৰা হৈছে। প্ৰতিবেদনত দাবী কৰা হৈছে যে বিভিন্ন ৰাজ্যৰ জেল মেনুৱেলত এতিয়াও এই ব্যৱস্থা অনুসৰণ কৰা হৈছে।
