অশান্ত মণিপুৰৰ বিভিন্ন সাহায্য শিবিৰত অস্বাভাৱিক মৃত্যু আৰু যৌন নিৰ্যাতনৰ অভিযোগত তাত থকা প্ৰশাসনৰ ওপৰত ক্ষুব্ধ হৈ পৰিছে উচ্চতম ন্যায়ালয়। মণিপুৰ চৰকাৰক তীব্ৰ ভৎর্সনা কৰি উচ্চতম ন্যায়ালয়ে ২৫ জনৰ ৰহস্যজনক মৃত্যুৰ সবিশেষ প্ৰতিবেদন দাখিল কৰিবলৈ ৰাজ্যৰ মুখ্য সচিবক নিৰ্দেশ দিছে। একে সময়তে মৃতকৰ মৰণোত্তৰ পৰীক্ষা আৰু মৃত্যুৰ কাৰণ অৱগত কৰিবলৈও নিৰ্দেশ দিয়া হৈছে।
বৃহস্পতিবাৰে মুখ্য ন্যায়াধীশ সূৰ্য্য কান্ত, ন্যায়াধীশ জয়মাল্য বাগচি আৰু ন্যায়াধীশ ভি মোহনাৰ বিচাৰপীঠে ২০২৩ চনত মণিপুৰত যৌন নিৰ্যাতনৰ অভিযোগ উত্থাপন কৰি দাখিল কৰা একাধিক গোচৰৰ শুনানি গ্ৰহণ কৰি এই নিৰ্দেশ দিয়ে।
মণিপুৰৰ গোষ্ঠীগত হিংসা সন্দৰ্ভত জম্মু-কাশ্মীৰ উচ্চ ন্যায়ালয়ৰ প্ৰাক্তন মুখ্য ন্যায়াধীশ গীতা মিট্টলৰ নেতৃত্বত গঠিত এখন সমিতিৰ প্ৰতিবেদনৰ কথা উল্লেখ কৰে মুখ্য ন্যায়াধীশগৰাকীয়ে। সাহায্য শিবিৰত আশ্ৰয় লোৱা লোকসকলৰ সুৰক্ষা আৰু মৰ্যাদাৰ সন্দৰ্ভত প্ৰতিবেদনত প্ৰকাশ পোৱা উদ্বেগক লৈ ন্যায়াধীশ সূৰ্য্য কান্তে গুৰুতৰ প্ৰশ্ন উত্থাপন কৰে।
প্রাক্তন মুখ্য ন্যায়াধীশ মিট্টলৰ নেতৃত্বত গঠিত কমিটীয়ে যোৱা ৪ জুলাইত ২৫ জনৰ অস্বাভাৱিক বা ৰহস্যজনক মৃত্যুৰ সন্দর্ভত মণিপুৰ চৰকাৰৰ পৰা বিভিন্ন তথ্য বিচাৰিছিল৷ শুনানিৰ সময়ত সেইবোৰ তথ্যকলৈও মণিপুৰৰ মহাধিবক্তাকো জেৰা কৰা হয়।
মুখ্য ন্যায়াধীশগৰাকীয়ে মহাধিবক্তাক কয় যে, “মুখ্য সচিবক কওক যে আদালতক যাতে কোনো কঠোৰ নিৰ্দেশ দিবলৈ বাধ্য নকৰে।”
সূত্ৰ অনুসৰি প্ৰাক্তন ন্যায়াধীশ মিট্টলৰ নেতৃত্বত গঠিত কমিটীয়ে নিজৰ প্ৰতিবেদনত উল্লেখ কৰিছে যে মণিপুৰত সংঘটিত হিংসাত্মক ঘটনাত ৬৪০ জন লোকৰ মৃত্যু হৈছে।
প্ৰতিবেদনত কোৱা হৈছে যে সেই সকলোবোৰ মৃত্যু মণিপুৰৰ আঠখন জিলাৰ সাহায্য শিবিৰত সংঘটিত হৈছে। কিন্তু তাৰ ভিতৰত মাত্ৰ ২০ জনৰ মৰণোত্তৰ পৰীক্ষা কৰা হৈছিল। অথচ প্ৰতিটো গোচৰতে অপৰাধমূলক গোচৰ ৰুজু হৈছিল।
আজি মুখ্য ন্যায়াধীশৰ নেতৃত্বৰ বিচাৰপীঠে প্ৰশ্ন উত্থাপন কৰে যে কিয় মাত্ৰ ২০ জন লোকৰ মৰণোত্তৰ পৰীক্ষা কৰা হ’ল। কিয় মৃতকৰ প্ৰতিটো পৰিয়ালৰ আৰ্থিক সাহায্যৰ পৰিমাণ মাত্ৰ ২০ হাজাৰৰ পৰা ৩০ হাজাৰ টকা?
