চিকিৎসকে নিৰ্দিষ্ট ব্ৰেণ্ডৰ বাহিৰে আন ঔষধ প্ৰেছক্ৰাইব নকৰে! মাজে মাজে ৰোগী বা তেওঁলোকৰ পৰিয়ালৰ পৰা শুনা যায় এই অভিযোগ। কিন্তু এতিয়াৰ পৰা আৰু তেনেকুৱা নহ’ব। ঔষধ কোম্পানীসমূহৰ অনৈতিক কাৰ্যকলাপ ৰোধৰ বাবে উচ্চতম ন্যায়ালয়ে এক বৃহৎ নিৰ্দেশ জাৰি কৰিছে। ইয়াৰ ফলত সামগ্ৰিক চিকিৎসা ব্যয় হ্ৰাস পাব বুলি আশা কৰা হৈছে।
উচ্চতম ন্যায়ালয়ত এখন আবেদন দাখিল কৰা হৈছিল। দাবী কৰা হয় যে ঔষধ কোম্পানীসমূহে দামী আৰু ব্ৰেণ্ডেড ঔষধ প্ৰেছক্ৰাইব কৰিবলৈ চিকিৎসকক বিপুল উৎকোচ দিছে। ফলত চিকিৎসাৰ খৰচ দ্ৰুতগতিত বৃদ্ধি পাইছে। একে সময়তে অত্যধিক আৰু অপ্ৰয়োজনীয় ঔষধ প্ৰেছক্ৰিপচন কৰাৰ প্ৰৱণতাও বাঢ়িছে। ফলত ৰোগীয়ে ঔষধৰ ওপৰত নিৰ্ভৰশীল হৈ পৰাৰ বিপৰীতে স্বাস্থ্যজনিত বিপদও বৃদ্ধি পাইছে।
এইবাৰ উচ্চতম ন্যায়ালয়ে এইবোৰ বন্ধ কৰিবলৈ ডাঙৰ নিৰ্দেশ দিছে। ন্যায়াধীশ সন্দীপ মেহতা, সঞ্জয় কেৰোল আৰু বিক্ৰম নাথে নিৰ্দেশ দিছে যে এতিয়াৰ পৰা চিকিৎসকে কোনো ব্ৰেণ্ডৰ নহয়, কেৱল জেনেৰিক ঔষধহে প্ৰেছক্ৰিপচন কৰিব লাগিব।
ইতিমধ্যে ৰাজস্থানত এই নিয়ম প্ৰৱৰ্তন কৰা হৈছে। এইবাৰ দেশৰ উচ্চতম ন্যায়ালয়ে সমগ্ৰ ভাৰততে ইয়াক কাৰ্যকৰী কৰিবলৈ আহ্বান জনাইছে। এই সন্দৰ্ভত ন্যায়াধীশ মেহতাই কয় যে যদি সমগ্ৰ দেশতে এই আদেশ কাৰ্যকৰী কৰা হয় তেন্তে ই এক বৃহৎ পৰিৱৰ্তন আনিব।
জানিব পৰা মতে, আবেদনকাৰীসকলে আন কেইবাটাও দাবী উত্থাপন কৰিছিল। চিকিৎসকক ‘বিনামূলীয়া উপহাৰ’ দিয়াৰ প্ৰথা বন্ধ কৰিব লাগে বুলিও দাবী জনায়। এনে অনৈতিক কাৰ্য্যৰ বাবে ঔষধ কোম্পানীসমূহকো জবাবদিহি কৰিব লাগিব।
পূৰ্বৰ শুনানিত ফেডাৰেচন অৱ মেডিকেল এণ্ড চেলছ ৰিপ্ৰেজেণ্টেটিভ এছ’চিয়েশ্যন অৱ ইণ্ডিয়াৰ অধিবক্তাই আদালতত কয় যে ড’লো ৬৫০ ঔষধ নিৰ্মাণ কোম্পানীয়ে কেৱল চিকিৎসকক ‘উপহাৰ’ দিবলৈ ১০০০ কোটি টকা খৰচ কৰিছে! প্ৰাসংগিক তথ্য কেন্দ্ৰীয় প্ৰত্যক্ষ কৰ ব’ৰ্ডৰ এক প্ৰেছ বিজ্ঞপ্তিৰ উদ্ধৃতিৰে তুলি ধৰা হৈছে। সকলো যুক্তি শুনানিৰ পাছত উচ্চতম ন্যায়ালয়ে কেৱল জেনেৰিক ঔষধ প্ৰেছক্ৰিপচন কৰিবলৈ নিৰ্দেশ দিয়ে।
আদালতে কয় যে ‘এইটো আবেদনকাৰীৰ আবেদনৰ সৈতে সামঞ্জস্যপূৰ্ণ। ইতিমধ্যে ৰাজস্থানে এক নিৰ্দেশ জাৰি কৰিছে যে প্ৰতিজন চিকিৎসকে কেৱল জেনেৰিক ঔষধহে প্ৰেছক্ৰিপচন কৰিব লাগিব। কোনো কোম্পানীৰ নাম লিখিব নোৱাৰিব। এইদৰেই বিষয়টো সমাধান হ’ব পাৰে।‘
উচ্চতম ন্যায়ালয়ৰ ন্যায়াধীশসকলে ভৱিষ্যদ্বাণী কৰিছে যে যদি এই সিদ্ধান্ত কাৰ্যকৰী হয় তেন্তে ভাৰতৰ ঔষধ খণ্ডত বৃহৎ পৰিৱৰ্তন আহিব। একে সময়তে চিকিৎসা ব্যৱস্থাত স্বচ্ছতা থাকিব আৰু চিকিৎসাৰ খৰচো হ্ৰাস পাব বুলি আশা কৰা হৈছে।
