বিশ্ববিদ্যালয়ৰ চূড়ান্ত বৰ্ষৰ ছেমিষ্টাৰ পৰীক্ষাসমূহ বাতিল কৰাৰ আবেদন জনাই উচ্চতম ন্যায়ালয় এলানি গোচৰ তৰা হৈছিল। আজি সৰ্বোচ্চ আদালতখনে এই সন্দৰ্ভত ৰায়দান কৰে।
উচ্চতম ন্যায়ালয়ে শুকুৰবাৰে স্পষ্ট কৰি দিয়ে যে পৰীক্ষা নোলোৱাকৈ ডিগ্ৰী প্ৰদান কৰিব নোৱাৰিব।
আনহাতে, ৰাজ্যসমূহে প্ৰয়োজন অনুসৰি বিশ্ববিদ্যালয় অনুদান আয়োগ (ইউ জি চি)ৰ পৰা পৰীক্ষা অনুষ্ঠিত কৰাৰ সময় বৃদ্ধিৰ বাবে আবেদন কৰিব পাৰিব।
যোৱা ৬জুলাইত এক নিৰ্দেশনাযোগে ইউ জি চিয়ে অহা ৩০ ছেপ্টেম্বৰৰ ভিতৰত দেশৰ সকলো বিশ্ববিদ্যালয়ৰ চূড়ান্ত পৰীক্ষাসমূহ অনুষ্ঠিত কৰিবলৈ কৈছিল।
উক্ত নিৰ্দশনাটোৰ বৈধতাৰ বিষয়ে শুকুৰবাৰে পুৱা ১০-৩০বজাত ন্যায়াধীশ অশোক ভূষণকলৈ গঠিত তিনিজনীয়া বিচাৰপীঠে ৰায়দান কৰে।
বিচাৰপীঠখনে স্পষ্ট কৰি দিয়ে যে পৰীক্ষা অনুষ্ঠিত কৰিবই লাগিব। অৱশ্যে সেয়া ৩০ ছেপ্টেম্বৰৰ ভিতৰত নকৰিলেও হ’ব।
বিচাৰপীঠখনে ইয়াৰ বাবে বিশ্ববিদ্যালয়সমূহে ইউ জি চিৰ ওচৰত আবেদন কৰিব পাৰিব বুলি জনায়।
উল্লেখ্য যে কোভিড-১৯ মহামাৰীৰ পৰিস্থিতিত পৰীক্ষা বাতিলৰ আহ্বান জনাই উচ্চতম ন্যায়ালয় দেশৰ বিভিন্ন বিশ্ববিদ্যালয়ৰ ৩১গৰাকী শিক্ষাৰ্থীয়ে আবেদন দাখিল কৰিছিল।
তেওঁলোকে আবেদন জনাইছিল যে আভ্যন্তৰীণ মূল্যায়ন বা পূৰ্বৰ ফলাফলৰ ভিত্তিত শিক্ষাৰ্থীসকলক নম্বৰ হিচাপ কৰি মাৰ্কশ্বীট প্ৰদান কৰা হওক।
শিক্ষাৰ্থীসকলৰ উপৰি ইউজিচিৰ নিৰ্দেশনাৰ বিৰুদ্ধে পশ্চিমবংগ, দিল্লী, মহাৰাষ্ট্ৰ, উৰিষ্যা, পঞ্জাৱকে ধৰি কেইবাখনো ৰাজ্যই আপত্তি দৰ্শাইছিল।
আনহাতে, পৰীক্ষা পতাৰ ক্ষেত্ৰত প্ৰথমৰে পৰাই দৃঢ় আছিল বিশ্ববিদ্যালয় অনুদান আয়োগ। যোৱা ১০ আগষ্টৰ শুনানিৰ সময়ত ছলিছিটৰ জেনেৰেল তুষাৰ মেহতাই স্পষ্ট কৰি দিছিল যে পৰীক্ষাৰ কাৰণে শিক্ষাৰ্থীসকলে প্ৰস্তুতি চলাই যাব লাগিব। যদি পৰীক্ষা নহয়, তেতিয়াহ’লে ডিগ্ৰী প্ৰদান কৰা নহয় আৰু সেইটোৱে আইন।