Supreme Court slams Nupur Sharma: ‘দেশত যি ঘটিছে তাৰ বাবে একমাত্ৰ নুপুৰ শৰ্মা দায়ী’: উচ্চতম ন্যায়ালয়ৰ তীব্ৰ ভৎৰ্সনা
Supreme Court slams Nupur Sharma বিজেপিৰ প্ৰাক্তন মুখপাত্ৰ নুপুৰ শৰ্মা উচ্চতম ন্যায়ালয়ৰ পৰা তীব্ৰ ভৎৰ্সনাৰ সন্মুখীন হৈছে। নবীৰ ওপৰত তেওঁৰ বিতৰ্কিত মন্তব্যৰ বাবে নুপুৰক দলৰ পৰা নিলম্বিত কৰা হৈছে। অৱশ্যে নুপুৰৰ বক্তব্যৰ পৰিপ্ৰেক্ষিতত দেশৰ বিভিন্ন প্ৰান্তত বিক্ষোভ তথা হিংসাত্মক ঘটনা সংঘটিত হৈছে।
এই পৰিস্থিতিত উচ্চতম ন্যায়ালয়ে নুপুৰ শৰ্মাক কয় যে “দেশত যি ঘটি আছে তাৰ বাবে তেওঁৱেই একমাত্ৰ দায়ী”। তদুপৰি উচ্চতম ন্যায়ালয়ে কয় যে নুপুৰ শৰ্মাই টিভিলৈ আহি সমগ্ৰ দেশৰ ওচৰত ক্ষমা বিচাৰিব লাগে।
মন কৰিকৰিবলগীয়া যে নুপুৰ শৰ্মাৰ বিৰুদ্ধে দেশৰ বিভিন্ন ৰাজ্যৰ বিভিন্ন আৰক্ষী থানাত অভিযোগ দাখিল কৰা হৈছিল। নুপুৰ শৰ্মাই অভিযোগবোৰ একত্ৰিত কৰি দিল্লীলৈ স্থানান্তৰ কৰাৰ আবেদন লৈ উচ্চতম ন্যায়ালয়ৰ কাষ চাপিছিল।
তেওঁ আবেদন জনাই দাবী কৰিছিল যে তেওঁৰ জীৱনলৈ সংশয় আছে। অৱশ্যে নুপুৰৰ আবেদন উচ্চতম ন্যায়ালয়ে খাৰিজ কৰি দিলে।
উচ্চতম ন্যায়ালয়ে বিজেপিৰ প্ৰাক্তন মুখপাত্ৰ নুপুৰ শৰ্মাক তীব্ৰ ভৎৰ্সনা কৰি কয় যে নুপুৰৰ “লেকামহীন মুখ”ৰ বাবে দেশত জুই জ্বলিছে। তেওঁ ‘’উদয়পুৰৰ দৰে দুৰ্ভাগ্যজনক ঘটনাৰ বাবে দায়ী।”
শীৰ্ষ আদালতখনে কয়, “আমি সেই বিতৰ্কটো চাইছো। তেওঁ যিধৰণে কথাবোৰ কৈছিল সেয়া দেখিছো। সমগ্ৰ দেশৰ ওচৰত আপুনি ক্ষমা বিচৰা উচিত।‘’
আনহাতে, নুপুৰৰ জীৱনৰ সংশয়ৰ বিষয়টোকলৈ উচ্চতম ন্যায়ালয়ে কয়, “তেওঁ ভাবুকিৰ সন্মুখীন হৈছে নে তেওঁৱেই নিৰাপত্তাৰ বাবে ভাবুকি হৈ পৰিছে?” তেওঁ দেশত অস্থিৰতাৰ পৰিৱেশ সৃষ্টি কৰিছে। আজি সমগ্ৰ দেশতে যি ঘটিছে তাৰ বাবে অকল এই মহিলাগৰাকী দায়ী।‘’