গুজৰাটৰ এগৰাকী নাৰ্ছৰ আত্মহত্যা কাণ্ডৰ বাবে আৰক্ষীয়ে এজন শল্য চিকিৎসকসহ তিনি গৰাকী অভিযুক্তক গ্ৰেপ্তাৰ কৰিছে।
উল্লেখ্য যে যোৱা ২১ অক্টোবৰত ২৮ বছৰীয়া মেঘনা আচাৰ্য নামৰ নৱশাৰী অসামৰিক চিকিৎসালয়ত কৰ্মৰত এগৰাকী নাৰ্ছে ভেজালপুৰৰ নিজ মাতৃ গৃহত আত্মহত্যা কৰে।
মৃত মেঘনাই আত্মহত্যা কৰাৰ পূৰ্বে পাঁচ পৃষ্ঠাৰ এক চুইচাইড নোটছ লিখি থৈ গৈছে। উক্ত টোকাত চিকিৎসালয়খনৰ দুগৰাকী ধাত্ৰী তাৰা গামিট আৰু বিনীতা আৰু চিকিৎসক ডাঃ অবিনাশ ডুবেই তেওঁক কৰ্তব্যৰ সময়ত শাৰীৰিক আৰু মানসিকভাৱে অত্যাচাৰ কৰি আহিছিল বুলি উল্লেখ আছে।
আনকি টোকাটোত তেওঁৰ স্বামী অংকিত খাম্ভাটা আৰু শাহুৱেক জয়শ্ৰী খাম্ভাটাইও মানসিক আৰু শাৰীৰিক অত্যাচাৰ চলাই মাতৃ গৃহৰ পৰা ৫ লাখ টকাৰ দাবী কৰি আহিছিল বুলি লিপিৱদ্ধ কৰি গৈছে। যোৱা ছমাহ ধৰি মেঘনাই স্বামী গৃহ এৰি মাতৃ গৃহতে আছিল।
কৰ্তব্যস্থলী আৰু স্বামী গৃহত ভোগা অত্যাচাৰৰ বাবেই মেঘনা আচাৰ্যই এই চৰম পন্থা লোৱা বুলিও উল্লেখ কৰিছে টোকাটোত। টোকাটোত তেওঁৰ আত্মহত্যাৰ বাবে এই পাঁচজন ব্যক্তিয়েই দায়ী বুলিও লিখি গৈছে মেঘনাই।
মেঘনাই আত্মহত্যা কৰাৰ পিছত যোৱা ২৫ অক্টোবৰত মাতৃ মীনা আচাৰ্যই নৱশাৰী আৰক্ষী থানাত ঘটনাৰ সন্দৰ্ভত এখন এজাহাৰ দাখিল কৰে।
উক্ত এজাহাৰ লাভ কৰি উক্ত টোকাৰ ভিত্তিত আৰক্ষীয়ে পাঁচ গৰাকী অভিযুক্তৰ বিৰুদ্ধে ভাৰতীয় দণ্ডবিধি আইনৰ ৩০৪(খ), ৩০৬, ৩৫৪(ক), ৪৯৮(ক), ১১৪ আদি কেবাটাও ধাৰাৰ অধীনত গোচৰ ৰুজু কৰি তদন্ত আৰম্ভ কৰিছে।
ইতিমধ্যে আৰক্ষীয়ে এজন চিকিৎসকসহ দুই অভিযুক্ত ধাত্ৰীক ক’ৰ’ণা টেষ্ট কৰোৱাই ৰিজাল্ট নিগেটিভ অহাৰ পিছত গ্ৰেপ্তাৰ কৰিছে।
আনহাতে অতি শীঘ্ৰেই আন দুই অভিযুক্ত ক্ৰমে মেঘনাৰ স্বামী আৰু শাহুৱেককো গ্ৰেপ্তাৰ কৰা হ’ব বুলি জানিবলৈ দিছে আৰক্ষীয়ে।
“আত্মহত্যা কৰা মেঘনাৰ চুইচাইড টোকাৰ ভিত্তিত পাঁচজন অভিযুক্তৰ বিৰুদ্ধে আমি গোচৰ ৰুজু কৰিছো। আমি অন্য অভিযুক্তসকলো অতি শীঘ্ৰেই গ্ৰেপ্তাৰ কৰিম।” নৱশাৰী চক্ৰ আৰক্ষী বিষয়া পি জি চৌধুৰীয়ে কয়।
