আন্ত:ৰাষ্ট্ৰীয় ক্ৰিকেটত অভিষেকৰ পিছতে টি-২০ ক্ৰিকেটত ধাৰাবাহিকভাৱে দপদপনি তুলি অহা ক্ৰিকেট বিশ্বৰ নতুন ‘মিষ্টাৰ ৩৬০’ হিচাপে পৰিচিত হৈ পৰা তাৰকা ক্ৰিকেটাৰ সূৰ্যকুমাৰ যাদৱক আজি ২০২২ বৰ্ষৰ শ্ৰেষ্ঠ টি-২০ ক্ৰিকেটাৰ হিচাপে নিৰ্বাচিত কৰিছে আই চি চি- এ।
বিগত বৰ্ষটোত দাঙি ধৰা অনবদ্য প্ৰদৰ্শনৰ সুবাদত বেটিং তাৰকাগৰাকীলৈ আগবঢ়োৱা হৈছে এই সন্মান। ভাৰতীয় ক্ৰিকেটৰ নিৰ্ভৰযোগ্য তাৰকাগৰাকীয়ে যোৱা বৰ্ষত এটা কেলেণ্ডাৰ বৰ্ষত ১০০০ ৰানতকৈ অধিক ৰান সংগ্ৰহ কৰা ইতিহাসৰ মাত্ৰ দ্বিতীয়গৰাকী বেটাৰ হিচাপে পৰিগণিত হৈছিল।
বিস্ফোৰক বেটিঙেৰে বিপক্ষৰ বাবে ক্ৰীজত বিপজ্জনক হৈ পৰা যাদৱে যাদৱে ২০২২ চনত টি-২০ ক্ৰিকেটত সংগ্ৰহ কৰিছিল সৰ্বাধিক ৰান। ১৮৭.৪৩ৰ অতুলনীয় ষ্ট্ৰাইক ৰেটেৰে তাৰকাগৰাকীয়ে সংগ্ৰহ কৰিছিল ১১৬৪ ৰান।
Presenting the ICC Men’s T20I Cricketer of the Year 2022 👀#ICCAwards
— ICC (@ICC) January 25, 2023
তদুপৰি যাদৱে ২০২২ বৰ্ষত মুঠ ৬৮ টা ছয় কোবাইছিল। টি-২০ ফৰ্মেটৰ ইতিহাসত এটা কেলেণ্ডাৰ বৰ্ষত এইদৰে সৰ্বাধিক ছয় কোবোৱা বেটাৰ হিচাপে পৰিগণিত হৈছিল সূৰ্যকুমাৰ যাদৱ। বৰ্ষটোত আগবঢ়োৱা চমকপ্ৰদ প্ৰদৰ্শনৰ ফলশ্ৰুতিত যাদৱে টি-২০ বেটাৰ ৰেংকিঙত শীৰ্ষ স্থানত আৰোহণ কৰিছিল।
ইফালে মহিলা ক্ৰিকেটত অষ্ট্ৰেলিয়াৰ অলৰাউণ্ডাৰ টাহলিয়া মেকগ্ৰাথক ২০২২ বৰ্ষৰ বৰ্ষশ্ৰেষ্ঠ মহিলা টি-২০ ক্ৰিকেটাৰ হিচাপে নিৰ্বাচিত কৰে আই চি চি- এ। ২০২১ চনৰ অক্টোবৰ মাহত আন্ত:ৰাষ্ট্ৰীয় অভিষেক ঘটোৱা মেকগ্ৰাথ বৰ্তমান আইচিচি মহিলা টি-২০ ৰেংকিঙত শীৰ্ষস্থানৰ বেটাৰ।
