গুৱাহাটীৰ পাঞ্জাবাৰী অঞ্চলত ম’ব লিঞ্চিঙৰ ঘটনা সংঘটিত হৈছে য’ত মোবাইল চুৰিৰ সন্দেহত এদল লোকে এজন সন্দেহযুক্ত চোৰক নিৰ্দয়ভাৱে প্ৰহাৰ কৰে।
সূত্ৰই জনোৱা মতে, চোৰজনক লাঠি, হাতেৰে আক্ৰমণ কৰাৰ ফলত গুৰুতৰভাৱে আহত হয়।
উল্লেখ্য যে তাজিউৰ আহমেদ (২২) নামৰ ব্যক্তিজনক ততাতৈয়াকৈ চিকিৎসাৰ বাবে গুৱাহাটী চিকিৎসা মহাবিদ্যালয় আৰু চিকিৎসালয়লৈ প্ৰেৰণ কৰা হয়। দিছপুৰ আৰক্ষীয়ে সময়মতে উপস্থিত হৈ ঘটনাস্থলীৰ পৰা পৰিস্থিতি বেয়া হোৱাৰ আগতেই তেওঁক উদ্ধাৰ কৰে। শ্ৰীমন্ত শংকৰদেৱ কলাক্ষেত্ৰৰ সমীপত সংঘটিত হৈছে এই ঘটনা।
বৃহস্পতিবাৰে পুৱা আহমেদক অধিক সোধা-পোছাৰ বাবে দিছপুৰ থানালৈ লৈ যোৱা হয়। অৱশ্যে তেওঁৰ বিৰুদ্ধে কোনো গোচৰ ৰুজু নকৰি মুকলি কৰি দিয়া হয়।
আৰক্ষীৰ সৈতে তাইজুৰৰ এয়া প্ৰথম ঘটনা নহয়। মাত্ৰ দুমাহ পূৰ্বে চুৰিৰ গোচৰত জড়িত হৈ জেলৰ পৰা মুক্তি পাইছিল। খবৰ আহিছে যে হোটেল মেনেজমেণ্ট প্ৰাক্তন ছাত্ৰ তাইজুৰ নিচাৰ কবলত পৰিছে, যাৰ বাবে তেওঁ চুৰিকে ধৰি ক্ষুদ্ৰ ক্ষুদ্ৰ অপৰাধৰ জৰিয়তে ধন অৰ্জে৷
