চিজেপি নেতাৰ পিতৃক প্ৰহাৰৰ অভিযোগ; প্ৰতিবাদৰ ৭২ ঘণ্টাৰ ভিতৰতে গ্ৰেপ্তাৰ ইনফ্লুৱেন্সাৰ স্বতন্ত্ৰ

দিল্লী আৰক্ষীয়ে ‘ককৰোচ জনতা পাৰ্টি’ৰ প্ৰতিবাদৰ সময়ত ছাত্ৰ আন্দোলন কৰ্মী নিশু আজাদৰ পিতৃ সঞ্জয় কুমাৰক প্ৰহাৰ কৰাৰ অভিযোগত হিন্দুত্ববাদী কৰ্মী স্বতন্ত্ৰ ভৰদ্বাজক গ্ৰেপ্তাৰ কৰে।

উত্তৰ প্ৰদেশৰ বুলন্দশ্বহৰৰ পৰা তেওঁক গ্ৰেপ্তাৰ কৰা হয়। দিল্লী আৰক্ষীয়ে ৭২ ঘণ্টাৰ ভিতৰত তেওঁক গ্ৰেপ্তাৰ কৰিব বুলি প্ৰতিবাদকাৰীক আশ্বাস দিয়াৰ কেইঘণ্টামানৰ পিছতে এই পদক্ষেপ গ্ৰহণ কৰা হৈছে।

যোৱা ২০ জুলাইত দিল্লীৰ যন্তৰ মন্তৰত হোৱা প্ৰতিবাদৰ পৰিপ্ৰেক্ষিততে এই অভিযোগ উত্থাপন হৈছিল। সঞ্জয় কুমাৰক প্ৰহাৰ কৰাৰ অভিযোগত স্বতন্ত্ৰ ভৰদ্বাজৰ বিৰুদ্ধে অভিযোগ উত্থাপন হৈছিল।

শেহতীয়াকৈ এটা সাক্ষাৎকাৰৰ ভিডিঅ’ ছ’চিয়েল মিডিয়াত ভাইৰেল হৈছিল। তাত শুনা গৈছে যে তেওঁ হেনো ‘সঞ্জয় কুমাৰৰ মূৰ ফালি পেলাইছিল’। ভিডিঅ’টো প্ৰকাশ পোৱাৰ পিছতে প্ৰতিবাদকাৰীসকলে তেওঁক গ্ৰেপ্তাৰ কৰাৰ দাবী জনায়।

ইপিনে, দিল্লী আৰক্ষীয়ে ভৰদ্বাজৰ সন্ধানত অভিযান আৰম্ভ কৰে। কেইবাটাও দলে তেওঁৰ গতিবিধি অনুসৰণ কৰে। আৰক্ষীৰ সূত্ৰ অনুসৰি যুৱকজনে বুলেট মটৰবাইকেৰে নৈথালা গাঁৱৰ পৰা খুৰজা অভিমুখে ওলাই আহিছিল। আৰক্ষী তাত উপস্থিত হোৱাৰ আগতেই তেওঁ আঁতৰি যায়। হেলমেট পিন্ধি নিজৰ পৰিচয় লুকুৱাবলৈ চেষ্টা কৰিছিল। কিন্তু কাম নহ’ল, আৰক্ষীয়ে তেওঁক কৰায়ত্ত কৰে।

শুকুৰবাৰে ককৰোচ জনতা পাৰ্টিয়ে পাৰ্লিয়ামেণ্ট ষ্ট্ৰীট আৰক্ষী থানাৰ বাহিৰত প্ৰতিবাদ সাব্যস্ত কৰে। সঞ্জয় কুমাৰ কাণ্ডত তৎকালীনভাৱে আৰক্ষীৰ ব্যৱস্থা গ্ৰহণৰ লগতে অভিযুক্তক জিম্মাত লোৱাৰ দাবী উত্থাপন কৰে। অভিযোগৰ পিছত আৰক্ষীৰ ভূমিকাক লৈও প্ৰশ্ন উত্থাপন কৰে প্ৰতিবাদকাৰীসকলে।

অৱশ্যে ভৰদ্বাজে এই অভিযোগ অস্বীকাৰ কৰিছে। তেওঁ দাবী কৰে যে তেওঁ ইচ্ছাকৃতভাৱে সঞ্জয় কুমাৰক আঘাত কৰা নাছিল। বৰঞ্চ ১০-১৫ জন লোকে তেওঁক ঘেৰি ধৰাত পৰিস্থিতিৰ পৰা ৰক্ষা পাবলৈ তেওঁ আত্মৰক্ষাৰ ব্যৱস্থা গ্ৰহণ কৰে। তেওঁ দাবী কৰে যে সেই সময়ত সঞ্জয় কুমাৰৰ মূৰত আঘাত লাগিছিল। তেওঁ লগতে কয় যে তেওঁৰ বক্তব্যৰ সমৰ্থনত ভিডিঅ’ প্ৰমাণ আছে।

ভৰদ্বাজে ছ’চিয়েল মিডিয়াত প্ৰচাৰিত হোৱা প’ডকাষ্টৰ ভিডিঅ’ সম্পাদনা কৰা বা ভুৱা বুলিও দাবী কৰে। লগতে কংগ্ৰেছ নেতা ৰাহুল গান্ধীকে ধৰি একাংশ লোকে ইয়াক বিয়পাই দিয়াৰ অভিযোগ উত্থাপন কৰে। তেওঁৰ বক্তব্যৰ কিছু অংশ ব্যংগাত্মকভাৱে কোৱা বুলিও তেওঁ দাবী কৰে।

অভিযোগ, প্ৰত্যাভিযোগ আৰু ভাইৰেল ভিডিঅ’ক লৈ বিতৰ্কৰ মাজতে এতিয়া আৰক্ষীয়ে ভৰদ্বাজক গ্ৰেপ্তাৰ কৰিছে। ঘটনাৰ তদন্ত আগবাঢ়ি যোৱাৰ লগে লগে সেইদিনা প্ৰতিবাদত সঠিকভাৱে কি হৈছিল সেয়া আৰু স্পষ্ট হৈ পৰিব।