আমেৰিকাত সপত্নীক বন্দী হৈ থকা ভেনিজুৱেলাৰ ৰাষ্ট্ৰপতি নিকোলাছ মাদুৰোক লৈ বিশ্ব ৰাজনীতিত তীব্ৰ চাঞ্চল্য অব্যাহত থকাৰ মাজতে ছুইজাৰলেণ্ড চৰকাৰে এক গুৰুত্বপূৰ্ণ পদক্ষেপ গ্ৰহণ কৰিছে। সোমবাৰে ছুইজাৰলেণ্ডৰ ফেডাৰেল কাউঞ্চিলে ঘোষণা কৰে যে ৰাষ্ট্ৰপতি মাদুৰো আৰু তেওঁৰ সৈতে জড়িত একাংশ ব্যক্তিৰ ছুইজাৰলেণ্ডত থকা সকলো সম্পত্তি তাৎক্ষণিকভাৱে ফ্ৰীজ অৰ্থাত জব্দ কৰা হৈছে।
এই সিদ্ধান্ত অনুসৰি, উক্ত সম্পত্তিসমূহ এতিয়াৰে পৰা বিক্ৰী, স্থানান্তৰ বা দেশৰ বাহিৰলৈ প্ৰেৰণ কৰিব নোৱাৰিব। অৱশ্যে ফেডাৰেল কাউঞ্চিলে স্পষ্ট কৰি দিছে যে এই ব্যৱস্থা কেৱল মাদুৰো আৰু তেওঁৰ ঘনিষ্ঠ একাংশ লোকৰ ক্ষেত্ৰতহে প্ৰযোজ্য হ’ব। ভেনিজুৱেলা চৰকাৰৰ অন্যান্য সদস্যসকল বৰ্তমান এই সিদ্ধান্তৰ আওতাত পৰা নাই।
উল্লেখ্য যে যোৱা ৩ জানুৱাৰীত আমেৰিকাই এক অতৰ্কিত অভিযান চলাই ভেনিজুৱেলাৰ ৰাজধানী কাৰাকাছৰ পৰা নিকোলাছ মাদুৰোক গ্ৰেপ্তাৰ কৰি নিউয়ৰ্কলৈ লৈ যায়। এই ঘটনাৰ পাছতে ভেনিজুৱেলাত চৰম ৰাজনৈতিক অস্থিৰতাই দেখা দিছে। ছুইজাৰলেণ্ড চৰকাৰেও দেশখনৰ এই সংকটপূৰ্ণ পৰিস্থিতিৰ ওপৰত সতৰ্ক দৃষ্টি ৰাখিছে বুলি জানিবলৈ দিছে।
ভেনিজুৱেলাত আমেৰিকাৰ সামৰিক হস্তক্ষেপৰ পাছত উদ্ভৱ হোৱা পৰিস্থিতিৰ প্ৰতি লক্ষ্য ৰাখি ছুইজাৰলেণ্ডে সকলো পক্ষকে উত্তেজনা হ্ৰাস কৰিবলৈ আৰু আন্তঃৰাষ্ট্ৰীয় আইন মানি চলিবলৈ আহ্বান জনাইছে। ইয়াৰ উপৰি দেশখনে শান্তি স্থাপনৰ বাবে মধ্যস্থতা কৰিবলৈও ইচ্ছা প্ৰকাশ কৰিছে।
কোন আইনৰ অধীনত এই সিদ্ধান্ত? ছুইজাৰলেণ্ড চৰকাৰে এই সম্পত্তিসমূহ FIAA (Federal Act on the Freezing and the Restitution of Illicit Assets) নামৰ আইনখনৰ অধীনত ফ্ৰীজ কৰিছে। এই আইন অনুসৰি, যদি কোনো বিদেশী নেতা বা প্ৰভাৱশালী ব্যক্তিয়ে অবৈধভাৱে উপাৰ্জন কৰা সম্পত্তি ছুইজাৰলেণ্ডৰ বেংকত থকা বুলি সন্দেহ কৰা হয়, তেন্তে তদন্ত সম্পূৰ্ণ নোহোৱালৈকে সেইসমূহ জব্দ কৰি ৰাখিব পাৰি।
চৰকাৰে জনাইছে যে এয়া এক সতৰ্কতামূলক পদক্ষেপ, যাতে ভৱিষ্যতে আইনগত তদন্তৰ সময়ত সম্পত্তিসমূহ অক্ষত থাকে। যদি তদন্তত এই সম্পত্তিসমূহ অবৈধ বুলি প্ৰমাণিত হয়, তেন্তে সেই ধন ভেনিজুৱেলাৰ জনসাধাৰণৰ কল্যাণৰ বাবে ব্যৱহাৰ কৰাৰ সম্ভাৱনা আছে।
