দেশৰ ক্ৰীড়াক্ষেত্ৰত লিংগ সমতাৰ এক যুগান্তকাৰী নিদৰ্শন দাঙি ধৰি আজি ভাৰতীয় ক্ৰিকেট নিয়ন্ত্ৰণ ব’ৰ্ডে ভাৰতীয় ক্ৰিকেট খেলুৱৈসকলক পুৰুষ-মহিলা নিৰ্বিশেষে সমান মাচুল আগবঢ়োৱা হ’ব বুলি ঘোষণা কৰাৰ পিছত বিচিচিআইৰ এই সিদ্ধান্তক আদৰণি জনাইছে বলীউড তাৰকা তাপসী পন্নু আৰু অনুষ্কা শৰ্মাই।
ভাৰতীয় মহিলা ক্ৰিকেট দলৰ প্ৰাক্তন অধিনায়ক তথা ক্ৰিকেট ইতিহাসৰ কিংবদন্তীত পৰিণত হোৱা মিতালী ৰাজৰ জীৱনৰ আধাৰত নিৰ্মিত বলীউডৰ “চাব্বাছ মিথু” শীৰ্ষক চলচ্চিত্ৰত মিতালী ৰাজৰ চৰিত্ৰত অভিনয় কৰা তাপসীয়ে ভাৰতীয় ক্ৰিকেট নিয়ন্ত্ৰণ ব’ৰ্ডৰ এই সিদ্ধান্তৰ বাবে ব’ৰ্ডৰ প্ৰতি কৃতজ্ঞতা জ্ঞাপন কৰে।
বিচিচিআইৰ এই সিদ্ধান্তক ধন্যবাদ জনাই তাপসী পন্নুৱে এক টুইট যোগে কয়, “সমান কামৰ বাবে সমান দৰমহাৰ দিশত এয়া এক বৃহৎ পদক্ষেপ। এক উদাহৰণ হৈ এই দিশত নেতৃত্ব দিয়াৰ বাবে বিচিচিআইক ধন্যবাদ।”
A huge step towards equal pay for equal work. Thank you BCCI for leading with example 👏🏾
— taapsee pannu (@taapsee) October 27, 2022
আনহাতে আনগৰাকী অভিনেত্ৰী তথা ভাৰতৰ তাৰকা ক্ৰিকেটাৰ বিৰাট কোহলীৰ পত্নী অনুষ্কা শৰ্মাই জনপ্ৰিয় সামাজিক মাধ্যম প্লেটফৰ্ম ইনষ্টাগ্ৰামৰ নিজা হেণ্ডেলত এক ষ্ট’ৰীত বিচিচিআইৰ সচিব জয় শ্বাহৰ টুইটৰ স্ক্ৰীণশ্বট শ্বেয়াৰ কৰে আৰু তিনিটা হাততালিৰ ইমোজিৰে এই সিদ্ধান্তলৈ সমৰ্থন আগবঢ়ায়।
বলীউডৰ জনপ্ৰিয় অভিনেত্ৰীগৰাকীয়ে বিশ্ব ক্ৰিকেটৰ আন এগৰাকী কিংবদন্তী তাৰকা তথা ভাৰতৰ সদ্য অৱসৰপ্ৰাপ্ত তাৰকা পেচাৰ ঝুলন গোস্বামীৰ জীৱনভিত্তিক আহিবলগীয়া ছবি “চাকদা এক্সপ্ৰেছ”ত মূখ্য চৰিত্ৰত অভিনয় কৰিছে।
উল্লেখ্য যে বিচিচিআই-এ আজি নতুনকৈ প্ৰৱৰ্তন কৰা নীতি অনুসৰি ভাৰতীয় মহিলা ক্ৰিকেটাৰসকলে এতিয়া পুৰুষ ক্ৰিকেটাৰসকলৰ দৰেই প্ৰতিখন টেষ্টত ১৫ লাখ টকা, প্ৰতিখন এদিনীয়াত ৬ লাখ টকা আৰু প্ৰতিখন টি-২০ ত ৩ লাখ টকা মাচুল লাভ কৰিব।
ইয়াৰ পূৰ্বে মহিলা খেলুৱৈসকলে এদিনীয়া আৰু টি-২০ ৰ বাবে ১ লাখ টকাকৈ লাভ কৰিছিল। আনহাতে এখন টেষ্ট মেচত মহিলা ক্ৰিকেটাৰসকলে লাভ কৰা পূৰ্ব মাচুল আছিল ৪ লাখ টকা।
