ৰাজ্য চৰকাৰে আহোম জনগোষ্ঠীলৈ আগবঢ়োৱা ২৫০ কোটিটকীয়া পেকেজক প্ৰলোভনৰ ৰাজনীতি বুলি আখ্যা দিলে আহোম জনগোষ্ঠীয় সংগঠনে। চৰকাৰে কা’ বিৰোধী আন্দোলনক স্তিমিত কৰিবলৈ ষড়যন্ত্ৰ কৰি এইদৰে প্ৰলোভনৰ ৰাজনীতি কৰিছে বুলি মন্তব্য কৰে পাঁচটাকৈ আহোম জনগোষ্ঠীয় সংগঠনে।
শিৱসাগৰৰ প্ৰেছ ক্লাবত অনুষ্ঠিত এখন সংবাদমেলত আহোম জাতীয় গণ মঞ্চ, আহোম সেনা, টাই আহোম যুৱ পৰিষদ, আহোম সভাকে ধৰি পাঁচ সংগঠনে এই অভিযোগ কৰে।
জনজাতিকৰণ আৰু স্বায়ত্ত শাসন টাই আহোম জনগোষ্ঠীৰ জন্মস্বত্ব আধিকাৰ, চৰকাৰৰ প্ৰলোভনৰ ৰাজনীতিত টাই আহোম জনগোষ্ঠীয়ে ভৰি নিদিয়ে বুলি উল্লেখ কৰি সংগঠন কেইটাই কা’ বিৰোধী আন্দোলন কোনো কাৰণতে বন্ধ নকৰে বুলি কয়।
২৫০ কোটি টকা দি আন্দোলন স্তিমিত কৰাৰ ষড়যন্ত্ৰৰে টাই আহোম জনগোষ্ঠীক ৰাজ্য চৰকাৰে উপলুঙা কৰিছে বুলি উল্লেখ কৰি সংবাদমেলৰ জৰিয়তে চৰকাৰক বিভাজনৰ ৰাজনীতি ত্যাগ কৰিবলৈ কয়।
আনহাতে আহোম জনগোষ্ঠীক জনজাতিকৰণত মন্ত্ৰী হিমন্ত বিশ্ব শৰ্মাই হেঙাৰ দি অহাৰ অভিযোগ সংগঠনকেইটাৰ। তেওঁলোকে হিমন্ত বিশ্ব শৰ্মাৰ বাবেই পাঁচজন চহিদ হোৱাৰ লগতে অসম জ্বলিল বুলি অভিযোগ কৰে।
টাই জনগোষ্ঠীক স্বায়ত্ত শাসন তথা জনজাতিকৰণৰ দাবী তুলি সংবাদমেলত টাই আহোম জনগোষ্ঠীয় সংগঠনসমূহে এককভাৱে বিকল্প ৰাজনৈতিক মঞ্চৰ চিন্তা-চৰ্চা কৰা বুলি উল্লেখ কৰি অসমৰ ৰাইজক শীঘ্ৰে এই সম্পৰ্কত অৱগত কৰিব বুলি জনায়।
ইয়াৰ উপৰি সংগঠন কেইটাই অখিল গগৈ, জিতেন দত্তকে ধৰি কা’ বিৰোধী আন্দোলনত গ্ৰেপ্তাৰ হোৱা সকলোকে শীঘ্ৰে মুকলি কৰি দিয়াৰ লগতে নিহতসকলক চৰকাৰে জাতীয় চহিদ হিচাপে ঘোষণা আৰু তেওঁলোকৰ পৰিয়ালক উপযুক্ত ক্ষতিপূৰণ দিবলৈ দাবী উত্থাপন কৰে।
আনহাতে আজিৰ এই সংবাদমেলত আটাছুৰ প্ৰতিনিধি অনুপস্থিত থাকে যদিও উপস্থিত থকা টাই আহোম জনগোষ্ঠীয় সংগঠন সমূহে আটাছুক পূৰ্বৰ দৰে বলিষ্ঠ ৰূপত কা’ বিৰোধী সংগ্ৰামত অংশ লবলৈ আহ্বান জনায়।
সংবাদমেলত টাই আহোম যুৱ পৰিষদৰ কেন্দ্ৰীয় সমিতিৰ সাধাৰণ সম্পাদক দিগন্ত তামুলী, আহোম সেনাৰ কেন্দ্ৰীয় সভাপতি অংকুৰণ ফুকন, আহেম জাতীয় গণ মঞ্চ অসমৰ কেন্দ্ৰীয় সভাপতি মহেন্দ্ৰ দিহিঙ্গীয়া আৰু আহোম সভাৰ নিৰ্মল বৰুৱা উপস্থিত থাকে।
