ফল-মূল স্বাস্থ্যৰ পক্ষে অত্যন্ত ভাল বুলি এক সৰ্বজনীন আৰু বিজ্ঞানসন্মত ধাৰণা আছে। পিছে ফল-মূলৰ নামত আমি বেছিসময়তেই বাচি লওঁ বাণিজ্যিকভাৱে উৎপাদিত আপেল, আঙুৰ আদি।
পিছে মুনাফাৰ লক্ষ্যৰে উৎপাদিত এই ফলবোৰত ৰাসায়নিক সাৰ-কীটনাশক, অপৈণত অৱস্থাতে ফল পকিবলৈ দৰৱ আদি অতিমাত্ৰাত প্ৰয়োগ কৰা হয়।
সু-স্বাস্থ্য আৰু পুষ্টিৰ বাবে এই দামী ফলবোৰৰ পিছত দৌৰাতকৈ আমি খাব পাৰোঁ অৱহেলিত কঁঠালগুটি। এই সময়ত বাৰীত উভৈনদী কঁঠালৰ গুটিকেইটাও আপোনাৰ পুষ্টিৰ আধাৰ।
চেলিব্ৰিটি পুষ্টিবিদ ৰুজুতা দিবাকৰেও বিগত কিছুবছৰ পূৰ্বে আগবঢ়াইছিল কঁঠালগুটি গ্ৰহণৰ দিহা। ৰুজুতা বলিউদ অভিনেত্ৰী কৰীনা কাপুৰৰ চাইজ জিৰ’-শৰীৰৰ আঁৰৰ ব্যক্তি বুলি বিখ্যাত।
ৰুজুতাৰ ভাষাত, কঁঠালগুটি ভাৰতীয় চুপাৰফুড। বতৰৰ ফল কঁঠালৰ গুটি কিদৰে অতি পুষ্টকৰ সেই বিষয়ত ৰুজুতাই মতো প্ৰকাশ কৰিছিল। লক্ষণীয়ভাৱে, ৰুজুতাৰ পৰামৰ্শ শাওণ মাহৰ লগত ৰজিতা খোৱা।
ভাৰতৰ বহু হিন্দুধৰ্মাৱলম্বী লোকৰ বাবে শাওন অতি পবিত্ৰ মাহ। সেয়ে তেওঁলোক বহুতেই শাওন মাহত ব্ৰত ৰাখে।ফলত, খাদ্য তালিকাৰ পৰা মাছ-মাংস অন্তৰ্ধান হয়।
কিন্তু কঁঠালগুটিয়ে শৰীৰ বৃদ্ধি আৰু পৰিচালনাৰ ক্ষেত্ৰত অতি প্ৰয়োজনীয় এমিন’ এচিদৰ যোগান অব্যাহত ৰাখে। তাৰোপৰি, অতি প্ৰয়োজনীয় ভিটামিনবোৰ, ফাইবাৰ আৰু মিনাৰেলসমূহৰ যোগান পূৰামাত্ৰাই ধৰিব পাৰে কঁঠালগুটিয়ে।
চাওঁ আহক কঁঠালগুটিৰ গুণ আৰু সুবিধা:
১/ বিভিন্ন ৰকমে খাব পাৰি কঁঠালগুটি– কঁঠালগুটি বইল কৰি জোল বনাই খাব পাৰি। বা নহ’লে সিদ্ধ গুটিত অলপ নিমখ দি আবেলিৰ জলপান হিচাপে খাব পাৰি।
২/ পুষ্টিদায়ক– কঁঠালগুটিত পলিফেনল থাকে, যি আপোনাক দিব পাৰে বয়সৰ চাপহীন ছাল আৰু শালমইনাৰ দৰে ছালৰ সমস্যাৰ পৰা পৰিত্ৰাণ। লগতে থাকে মেংগানিজ আৰু মেগনেছিয়াম, যি আন বহুটো দিশত উপকাৰী হোৱাৰ লগতে হাঁড় মজবুত কৰাত ভূমিকা লয়।
ইয়াত জিংক আৰু আন মাইক্ৰ’ মিনাৰেলো থাকে, যি উৰ্বৰতা বৃদ্ধি কৰে আৰু হৰম’নজনিত সু-স্বাস্থ্য ৰক্ষাত সহায় কৰে। থাকে ফাইবাৰ, ৰাইব’ফ্লেবিন আৰু সমৃদ্ধ ভিটামিন বি প্ৰফাইল, যি ৰক্তচাপ আৰু তেজৰ শৰ্কৰা(চুগাৰ) নিয়ন্ত্ৰণ, পেটৰ প্ৰদাহ (ইনফ্লেমে’চন) কমোৱাত সহায় কৰে।
ফাইবাৰে দীঘলীয়া সময়লৈকে ভোক নলগা কৰি ৰখাত সহায় কৰে, ফলত জাংক ফুডবোৰৰ পৰা আঁতৰি থকাত সহায় হয়। ভাল হৃদস্বাস্থ্য ৰক্ষাটো ই সহায় কৰে, কাৰণ ই বেয়া কলেস্তেৰল কমোৱাত সহায় কৰে।
3/ সস্তা আৰু সুলভ: স্বাভাৱিকতেই অসমৰ গাঁও অঞ্চলৰ বাসিন্দাসকলৰ বাৰীত কঁঠালৰ গছ এক সৰ্বপৰিচিত দৃশ্য। কঁঠাল বাৰীতে উপলব্ধ মানেই কঁঠালগুটি বিচাৰি আপুনি হাবাথুৰি খাব নালাগে।
আনহাতে টাউনীয়া অঞ্চলসমূহত যিহেতু কঁঠালৰ গছ থাকিব বুলি বিশেষ আশা কৰিব নোৱাৰি, সেয়ে বজাৰৰ পৰা ক্ৰয় কৰি অনা কঁঠালৰ পৰাই আপুনি সুবিধা ল’ব পাৰে। এফালে আপুনি কঁঠাল খোৱাৰ লগতে লাভ কৰিব গুটিও। এই গুটিসমূহ পেলাই নিদি আপুনি গ্ৰহণ কৰিব পাৰে খাদ্য হিচাপে।
