নাগৰিকত্ব বিধেয়কবিৰোধী প্ৰতিবাদে অসমত ব্যাপক ৰূপ লোৱাৰ মাজতে শাসক পক্ষৰ ছাত্ৰ সংগঠন অখিল ভাৰতীয় বিদ্যাৰ্থী পৰিষদে শনিবাৰে জনাইছে ওলোটা আহ্বান।
গুৱাহাটীত সমদল বাহিৰ কৰি সোঁপন্থী ছাত্ৰ সংগঠনটোৱে অসমৰ ৰাইজক বিধেয়কখনৰ সমৰ্থনত ওলাই আহিবলৈ আহ্বান জনাইছে।
“সকলো ৰাইজ নাগৰিকত্ব সংশোধনী বিধেয়কৰ সমৰ্থনত ওলাই আহিব লাগে। আজি আমি ছাত্ৰ সমাজক আহ্বান জনাইছো বিধেয়কৰ সমৰ্থনত ওলাই আহিবলৈ যাতে বিধেয়কখন আহে,” সমৰ্থনটোৰ নেতৃত্ব দিয়া এ বি ভি পি গুৱাহাটীৰ এজন নেতাই কয়।
তেওঁৰমতে, বৰ্তমান অসমত চলি থকা “বাতাৱৰণ”টোৱে ৰাইজক বিধেয়কখন সন্দৰ্ভত কাৰ্য্যতঃ এক অশুদ্ধ বাৰ্তা দিছে। আৰু তেওঁলোকে ৰাইজক তেওঁলোকৰ বক্তব্য জনাব খোজে।
“আমি ৰাইজক এইটো অনুভৱ (বাৰ্তা?) দিয়াব বিচাৰো যে এইখন বিল কেৱল অসমৰ কাৰণে নহয়, সমগ্ৰ দেশৰ কাৰণে,” ছাত্ৰনেতাজনে কয়।
(অসমৰ প্ৰতিবাদী সংগঠনসমূহে অৱশ্যে বিধেয়কখন কেৱল অসমত প্ৰযোজ্য হ’ব বুলি আপত্তি কৰা নাই।
অসমত বিদেশীৰ “সমস্যা” ভাৰত ৰাষ্ট্ৰস্বীকৃত। ছবছৰীয়া বিদেশী বিতাড়ন আন্দোলনৰ পিছত স্বাক্ষৰিত অসম চুক্তিয়ে বিদেশী চিনাক্তকৰণৰ ভিত্তি তাৰিখৰূপে ১৯৭১ চনৰ ২৪ মাৰ্চক স্বীকাৰ কৰিছে।)
সংগঠনটোৰ বেনাৰত তেওঁলোক বিধেয়কখনৰ “নৈতিক সমৰ্থন”ত ওলাই অহা বুলি লিখা দেখা গৈছিল আৰু “জয় আই অসম” ধ্বনিৰে ৰাইজৰ সমৰ্থন আহ্বান কৰিছিল।
এ বি ভি পি, সংঘ পৰিয়ালে ভাৰতক পৃথিৱীৰ সকলো হিন্দুৰ স্ব-ভূমি বুলি নীতিগতভাৱে মানে আৰু হিন্দু তেওঁলোকৰ বাবে “বিদেশী” নহয়।
নাগৰিকত্ব বিধেয়ক ২০১৬ই ভাৰতৰ চুবুৰীয়া পাকিস্তান, বাংলাদেশ আৰু আফগানিস্তানৰ অমুছলমান ধৰ্মীয় সংখ্যালঘু (হিন্দু, বৌদ্ধ, জেন, পাৰ্ছি, শিখ আৰু খ্ৰীষ্টান)ৰ ভাৰতীয়কৰণৰ চৰ্ত শিথিল কৰিব খুজিছিল।
কিন্তু, অসমৰ প্ৰতিবাদীৰ প্ৰধান আশংকা বিধেয়কে ভাৰতত থকা অবৈধ “হিন্দু বাংলাদেশী”ক নাগৰিকত্ব প্ৰদান কৰিব। বাংলাদেশৰ সংখ্যালঘুসকলকো প্ৰব্ৰজনৰ বাবে প্ৰৰোচিত কৰিব আৰু বিদেশী “সমস্যা”ত আক্ৰান্ত অসমৰ খিলঞ্জীয়া সংকটত পৰিব।
সংগঠনটোৱে অসমৰ ৰাইজক বিধেয়কৰ সমৰ্থনত ওলাই আহিবলৈ আহ্বান জনালেও দেখা গৈছে তেওঁলোকৰ সদস্যসকল বিষয়টো সন্দৰ্ভত ৱাকিবহাল নহয়।
সমদলকাৰী শিক্ষাৰ্থীসকলৰ সৈতে কথা-বতৰাত দেখা গৈছে তেওঁলোকৰ বিধেয়কখন সন্দৰ্ভত বিভ্ৰান্তিকৰ ধাৰণা আছে।
সবিশেষ জানিবলৈ ভিডিঅ’টো চাওক–