প্ৰতিশোধৰ ভাৱনাত উন্মত্ত পাকিস্তান। সেইদৰে তেওঁলোকে নিজৰ নিষ্ঠুৰতা পৰিচয় দি আফগানিস্তানৰ কাবুলৰ এখন ড্ৰাগছ ৰিহাব হাস্পতালত আক্ৰমণ চলালে। যাৰ ফলত মৃতকৰ সংখ্যা ৪০০ লৈ বৃদ্ধি পাইছে বুলি মঙলবাৰে পুৱা তালিবান চৰকাৰৰ মুখপাত্ৰ হামদুল্লা ফিত্ৰাটে প্ৰকাশ কৰে।
তেওঁ এক্সত এই বিষয়ে এটা পোষ্ট কৰিছে। তাত হামদুল্লাহ ফিত্ৰাটে কয় যে সোমবাৰে মাজ নিশা আক্ৰমণ সংঘটিত হৈছিল। বৰ্তমানলৈকে এই আক্ৰমণত ৪০০ জন লোকৰ মৃত্যু হৈছে। ইয়াৰ উপৰিও ২৫০ জন লোক আহত হৈছে।
ফিত্ৰাটে লগতে কয় যে উদ্ধাৰকাৰী দলে ইতিমধ্যে কাম আৰম্ভ কৰিছে। জুই নিয়ন্ত্ৰণ কৰাৰ লগতে ধ্বংসাৱশেষৰ তলৰ পৰা মৃতদেহ উদ্ধাৰৰ বাবে কাম কৰি আছে।
অৱশ্যে পাকিস্তানে চিকিৎসালয়খনক লক্ষ্য কৰি কৰা আক্ৰমণৰ কথা অস্বীকাৰ কৰিছে। তেওঁলোকে কয় যে সোমবাৰে কাবুল আৰু পূব আফগানিস্তানৰ কোনো অসামৰিক অঞ্চলত কোনো ধৰণৰ বিমান আক্ৰমণ হোৱা নাই।
কিন্তু আফগানিস্তানক এই আক্ৰমণৰ বিষয়ে আৰম্ভণিৰে পৰাই অৱগত কৰা হৈছে। তালিবানৰ স্বাস্থ্য মন্ত্ৰালয়ৰ মুখপাত্ৰ শ্বাৰাফত জামানে কয় যে এই আক্ৰমণত ২০০ৰো অধিক লোক নিহত হৈছে। স্থানীয় সংবাদ মাধ্যমৰ সৈতে হোৱা এক টেলিভিছন সাক্ষাৎকাৰত তেওঁ কয় যে, “ড্ৰাগছ ৰিহাব চেণ্টাৰটো সম্পূৰ্ণৰূপে ধ্বংস হৈ গৈছে।”
আফগান চৰকাৰৰ মুখপাত্ৰ জাবিউল্লাহ মুজাহিদেও এই সাক্ষাৎকাৰটো শ্বেয়াৰ কৰে। লগতে এই আক্ৰমণক গৰিহণা দি আফগানিস্তানৰ সাৰ্বভৌমত্ব উলংঘা বুলি অভিহিত কৰে। মুজাহিদে এক্সত পোষ্ট কৰি কয় যে, “মৃত আৰু আহতসকলৰ অধিকাংশই আছিল এই হাস্পাতালত চিকিৎসা গ্ৰহণ কৰা ৰোগী।”
স্থানীয় টেলিভিছনতো দেখা গৈছে সেই ভয়ংকৰ ছবি। ক্ষতিগ্ৰস্ত অট্টালিকাৰ ধ্বংসাৱশেষ জ্বলি থকা দেখা গৈছে। অগ্নিনিৰ্বাপক বাহিনীয়ে জুই নুমুৱাবলৈ চেষ্টা কৰিছে।
পাকিস্তানে অৱশ্যে এই অভিযোগ মানি ল’ব বিচৰা নাই। উগ্ৰপন্থী আন্তঃগাঁথনিৰ লক্ষ্যৰে তেওঁলোকে এই আক্ৰমণ চলোৱা বুলি দাবী কৰে। কোনো অসামৰিক অঞ্চলত আক্ৰমণ কৰা নাছিল।
প্ৰধানমন্ত্ৰী শ্বেহবাজ শ্বৰীফৰ মুখপাত্ৰ মুশ্বাৰফ জাইদীয়েও কাবুলৰ এখন চিকিৎসালয়ত আক্ৰমণৰ অভিযোগ খাৰিজ কৰে। তেওঁলোকে এই দাবীক “মিছা আৰু বিভ্ৰান্তিকৰ” বুলি অভিহিত কৰে।
তেওঁলোকে লগতে দাবী কৰে যে তেওঁলোকে অতি ভাল পৰিকল্পনাৰে আক্ৰমণ সংঘটিত কৰিছিল। তেওঁলোকে নিশ্চিত কৰিছিল যে কোনো সাধাৰণ নাগৰিকৰ যাতে ক্ষতি নহয়। তেওঁলোকৰ লক্ষ্য আছিল কেৱল সেনা ঘাটি আৰু উগ্ৰপন্থী ঘাটি। যদিও কোৱা বাহুল্য যে পাকিস্তানৰ এই দাবীৰ কোনো ভিত্তি নাই।
