অষ্ট্ৰেলিয়াত দুটাকৈ ব্ৰঞ্জৰ পদকেৰে উজলিল অসম কন্যা তানিয়া চৌধুৰী
অষ্ট্ৰেলিয়াৰ গ’ল্ড কষ্টত অনুষ্ঠিত হৈ থকা এছিয়া পেচিফিক লন বলিং চেম্পিয়নশ্বিপত অসমৰ প্ৰতিভাৱান তানিয়া চৌধুৰীয়ে উন্নত প্ৰদৰ্শনৰ ধাৰাবাহিকতা অব্যাহত ৰাখি ২৭ জুন অৰ্থাৎ বৃহস্পতিবাৰে দ্বিতীয়টো পদক লাভ কৰে।
বৃহস্পতিবাৰে প্ৰতিযোগিতাখনৰ মহিলাৰ ট্ৰিপল’ছ শাখাত তানিয়াই ব্ৰঞ্জৰ পদক লাভ কৰি অসমলৈ গৌৰৱ কঢ়িয়াই আনিবলৈ সক্ষম হয়। তানিয়াৰ সৈতে ট্ৰিপল দলত থকা আন দুগৰাকী খেলুৱৈ হ’ল ঝাৰখণ্ডৰ সৰিতা তিৰ্কী আৰু ৰূপা ৰাণী তিৰ্কী।
অসমৰ এইগৰাকী প্ৰতিভাৱান জীয়ৰীয়ে এই প্ৰতিযোগিতাখনতে যোৱা ২১ জুনত ব্যক্তিগত শাখাত আনটো ব্ৰঞ্জৰ পদক লাভ কৰিছিল।
গুৱাহাটীৰ উজান বজাৰৰ নিবাসী অনুপ কমাৰ চৌধুৰী আৰু পংকজা বৰুৱাৰ কন্যা তানিয়াই ইতিমধ্যে ৰাষ্ট্ৰীয় চেম্পিয়নৰো খিতাপ দখল কৰি থৈছে। তেওঁৰ এই সাফল্যত পৰিয়ালৰ লোকৰ লগতে অসমবাসী উৎফুল্লিত হৈ পৰিছে।
উল্লেখ্য যে যিকোনো ৰাষ্ট্ৰীয় তথা আন্তঃৰাষ্ট্ৰীয় পৰ্যায়ৰ খেলতে যদি অসমৰ প্ৰতিভাৱান খেলুৱৈ সকলে ধাৰাবাহিকতা অব্যাহত ৰাখি এনেধৰণৰ প্ৰদৰ্শন আগবঢ়াই থাকে তেন্তে নিশ্চিতভাৱে আগন্তুক দিনত দেশৰ ক্ৰীড়া ক্ষেত্ৰৰ বাবে গুৰুত্বপূৰ্ণ হিচাপে বিবেচিত হ’ব অসম।