কাৰ আশীৰ্বাদপুষ্ট হৈ এতিয়াও সুৰক্ষিত অৱস্থাত আছে জুবিন গাৰ্গৰ মেনেজাৰ সিদ্ধাৰ্থ শৰ্মা। কেইদিনমানৰ পূৰ্বে অসমৰ এজন জ্যেষ্ঠ সাংবাদিক শিৱাণু বৰাই সামাজিক মাধ্যমত ২০ ছেপ্টেম্বৰত গৰিমা শইকীয়া গাৰ্গে দিয়া ভিডিঅ’ সংক্ৰান্তত কিছু কথা কৈছিল।
বৰাই ফেচবুকযোগে লিখিছিল- ‘আমি শনিবাৰে জুবিনৰ ঘৰত উপস্থিত হোৱাৰ পূৰ্বে গৰিমাৰ ওচৰলৈ গৈছিল ৰাজ্যৰ দুগৰাকী জ্যেষ্ঠ আৰক্ষী বিষয়া । জুবিনৰ অনুৰাগীৰ নামত এচামে উদ্ভণ্ডালি সৃষ্টি কৰা বাবে এই আৰক্ষী বিষয়া দুগৰাকীয়ে গৰিমাক সকলোকে শান্তিৰে থাকিবলৈ আহ্বান জনাই এটা ভিডিঅ‘ প্ৰস্তুত কৰি সামাজিক মাধ্যমত দিবলৈ পৰামৰ্শ দিয়ে । এটা সময়ত আৰক্ষী বিষয়া দুগৰাকী গৰিমাৰ ওচৰৰ পৰা ওলাই গৈছিল । ইয়াৰ পিছত যেতিয়া গৰিমাই ভিডিঅ’টো ৰেকৰ্ডিং কৰিবলৈ লৈছিল তেতিয়া অনা অসমীয়া এগৰাকী ব্যক্তিয়ে গৰিমাক সিদ্ধাৰ্থ শৰ্মাৰ বিৰুদ্ধে দিয়া গোচৰ উঠাই ল’বলৈও ভিডিঅ’টোত ক’বলৈ কয় । জুবিনৰ সৈতে দীৰ্ঘদিন পাৰ কৰা এই অনা অসমীয়া ব্যক্তিজনে কোৱা বাবেই গৰিমাইও ভিডিঅ’টোত সিদ্ধাৰ্থ শৰ্মাৰ হকে কথাখিনি সংযুক্ত কৰি দিলে । আৰু তাৰ পিছতেই ভিডিঅ’টো জুবিন গাৰ্গৰ ফেচবুক পেজত আপলোড কৰি দিলে শেহতীয়াকৈ জনপ্ৰিয় হোৱা এখন ছবিৰ এগৰাকী প্ৰযোজকে । হয়তো জুবিনৰ পেজত দিলে অধিক লোকে এই ভিডিঅ’টো চাব বুলি ভাবিয়েই এই কামটো কৰা হৈছিল । কিন্তু ভিডিঅ’টো আপলোড হোৱাৰ পিছত গৰিমাৰ বিৰুদ্ধে সামাজিক মাধ্যমত আৰম্ভ হৈ গ’ল কিছুমান নিকৃষ্ট প’ষ্ট । অনা অসমীয়া সেই ব্যক্তিজনে গৰিমাক ভিডিঅ’টোত সিদ্ধাৰ্থ শৰ্মাৰ হকে কথাখিনি সংযুক্ত কৰিবলৈ নিদিয়াহেঁতেন হয়তো গৰিমাক লৈ চৰিত্ৰহননকে ধৰি তেওঁৰ বিৰুদ্ধে এচামে দিয়া প’ষ্টবোৰ আমি নেদেখিলোহেঁতেন । এতিয়া প্ৰশ্ন হৈছে এই অনা অসমীয়া ব্যক্তিজনে কিয় গৰিমাক সিদ্ধাৰ্থ শৰ্মাৰ হকে গৰিমাক কথাখিনি ক’বলৈ কৈছিল ? সেই সময়ত ছিংগাপুৰত থকা সিদ্ধাৰ্থ শৰ্মাই এই অনা অসমীয়া ব্যক্তিগৰাকীক তেনেকৈ গৰিমাক কোৱাবলৈ বাৰু কৈছিল নেকি ? ছিংগাপুৰত থকা চৰিত্ৰই গুৱাহাটীত থকা এই অনা অসমীয়া ব্যক্তিজনক সকলো কাম এনেদৰে পৰিচালনা কৰি থাকিবলৈ কৈছিল নেকি ? এয়াও আন এক ৰহস্যজনক প্ৰশ্ন ।’
শেহতীয়া এই সিদ্ধাৰ্থ শৰ্মাক বচাবলৈ চেষ্টা কৰা ৰহস্যময় লোকজনৰ নাম সদৰী কৰিছে সাংবাদিক শিৱাণু বৰাই। এক টেলিভিশ্যন সাক্ষাৎকাৰত সেই ব্যক্তিজন তাৰছেম মিট্টাল বুলি বৰাই উল্লেখ কৰে। কিন্তু ইতিমধ্যে গোচৰ ৰুজু হোৱা এজন অভিযুক্তক সুৰক্ষা প্ৰদান কৰাৰ অভিযোগ উঠা তাৰছেম মিট্টাল এতিয়া মুকলিকৈ ঘূৰি ফুৰিছে। তাৰছেমক জুবিন গাৰ্গৰ অন্ত্যোষ্টিক্ৰিয়াটো দেখা গৈছিল যদিও আজিকোপতি তাৰছেমক সিদ্ধাৰ্থৰ অৱস্থিতিৰ বিষয়ে CID-ৰ তদন্তকাৰী দলে সোধা-পোছা কৰা দেখা গ’ল।
