২০২০ চনত অনুষ্ঠিত হ’ব লগীয়া টকিঅ’ অলিম্পিক গেইমছলৈ যোগ্যতা অৰ্জন কৰিছে ভাৰতৰ তিনিজনীয়া পুৰুষ ৰিকাৰ্ভ আৰ্চাৰী দলে। এই দলটোত আছে ছিকিমৰ অভিজ্ঞ আৰ্চাৰ তৰুণদীপ ৰাই।
উল্লেখ্য যে নেডাৰলেণ্ডৰ ডেন বশ্ব (Den Bosch)ত অনুষ্ঠিত হৈ থকা ৱৰ্ল্ড আৰ্চাৰী চেম্পিয়নশ্বিপৰ এখন মেচত বুধবাৰে ভাৰতীয় দলটোৱে কানাডাক ৫-৩ ব্যৱধানত পৰাস্ত কৰাৰ লগে লগে তিনিওগৰাকী খেলুৱৈ ক্ৰমে তৰুণদীপ ৰাই, অতনু দাস আৰু প্ৰবীণ যাদৱে অলিম্পিকৰ বাবে কোটা সুৰক্ষিত কৰে।
অৱশেষত টকিঅ’ অলিম্পিকলৈ যোগ্যতা অৰ্জন কৰাত অতি আনন্দিত অৰ্জুন পুৰস্কাৰপ্ৰাপ্ত তৰুণদীপ ৰাইয়ে কয় ‘আমি আটাইয়ে ভাল প্ৰদৰ্শন কৰি আছো আৰু আশা কৰো আমাৰ এই প্ৰদৰ্শন ২০২০ৰ অলিম্পিক গেইমছলৈ অব্যাহত থাকিব’।
ইয়াৰ উপৰি তেওঁ কয়, ‘মই নিশ্চিত যে আমাৰ দৰে বিপক্ষয়ো সমান চাপ অনুভৱ কৰিছিল। সেই সময়ত আমি ধৈৰ্য সহকাৰে খেলত মনোনিৱেশ কৰিছিলো আৰু সেইবাবে সকলোবোৰ আমাৰ পক্ষত থাকিল’।
উল্লেখ্য যে ৩৫ বছৰীয়া তৰুণদীপ ৰাইৰ ঘৰ দক্ষিণ ছিকিমৰ নামচিত। তেওঁ ইতিমধ্যে দুবাৰকৈ অলিম্পিক গেইমছত ভাৰতৰ হৈ অংশ গ্ৰহণ কৰিছে।
