ৰাষ্ট্ৰীয় যক্ষ্মা দূৰীকৰণ আঁচনিৰ অধীনত গোৱালপাৰা জিলা যক্ষ্মা কেন্দ্ৰৰ উদ্যোগত দুধনৈত মঙলবাৰে এক যক্ষ্মা সজাগতামূলক সমদল উলিওৱা হয়।
‘যক্ষ্মা হাৰিব, দেশ জিকিব’ শীৰ্ষক শ্লোগানেৰে এই সমদল উলিওৱা হয়।
যক্ষ্মা ৰোগ সন্দৰ্ভত ৰাইজৰ মাজত সজাগতা সৃষ্টিৰ লক্ষ্যৰেই উলিওৱা এই সমদল দুধনৈ এফ আৰ ইউ হাস্পাতালৰ চৌহদৰ পৰা আৰম্ভ কৰি ১৭ নং ৰাষ্ট্ৰীয় ঘাইপথেৰে দুধনৈ চাৰিআলি হৈ পুনৰ দুধনৈ এফ আৰ ইউ হাস্পতাল চৌহদলৈ আহি সমাপ্ত হয়।
সমদলত স্বাস্থ্য কৰ্মী তথা স্বাস্থ্য বিভাগৰ বিষয়া-কৰ্মচাৰীসকলৰ উপৰি বিভিন্ন জনগোষ্ঠীয় কৃষ্টি দলে অংশগ্ৰহণ কৰে।
ইয়াৰ পাছতে দুধনৈৰ এফ আৰ ইউ চিকিৎসালয়ত এখন সজাগতা সভা অনুষ্ঠিত হয়।
ৰাজ্যৰ স্বাস্থ্য সেৱা সঞ্চালকালয়ৰ অতিৰিক্ত সঞ্চালক তথা ৰাজ্য যক্ষ্মা কাৰ্যক্ৰম বিষয়া নয়নজ্যোতি দাসৰ সভাপতিত্বত অনুষ্ঠিত হয় যক্ষ্মা দূৰীকৰণৰ এই সজাগতা সভা।
জিলা যক্ষ্মা বিষয়া জনবীৰ দাসে এই সভাখনৰ উদ্দেশ্য ব্যাখ্যা কৰে। এই সভাতে যক্ষ্মাৰোগ চিনাক্তকৰণত দিনে নিশাই অতন্দ্ৰ প্ৰহৰীৰ দৰে কাম কৰি থকা জিলাখনৰ মাটিয়া আৰু ৰংজুলি চিকিৎসালয়ৰ লেবেৰটৰী টেকনেচিয়ান ক্ৰমে মিজানুৰ ৰহমান আৰু মোজাম্মিল হকক একোখনকৈ ফুলাম গামোচা আৰু এটা জাপিৰে বিশেষভাৱে সম্বৰ্ধনা জনোৱা হয়।
