সমাগত ২০২১ ৰ বিধান সভাৰ নিৰ্বাচন। বিগত চাৰে চাৰিটাতকৈ অধিক বছৰ চাহ শ্ৰমিকৰ মজুৰিৰ বৃদ্ধিৰ কথা চিন্তা নকৰা বিজেপি চৰকাৰে নিৰ্বাচনলৈ মাজত মাথো এমাহ থাকোতে সিদ্ধান্ত লৈছে চাহ শ্ৰমিকৰ মজুৰি বৃদ্ধি কৰা হ’ব।
আজি ৰাজ্য চৰকাৰৰ কেবিনেটে ১৬৭ টকাৰ পৰিৱৰ্তে ২১৭ টকা মজুৰি বৃদ্ধি কৰাৰ সিদ্ধান্ত গ্ৰহণ কৰিছে। অৰ্থাৎ পূৰ্বৰ তুলনাত ৫০ টকাকৈ বৃদ্ধি কৰা হ’ল চাহ শ্ৰমিকসকলৰ মজুৰি।
কেবিনেট বৈঠকৰ অন্তত এই কথা ঘোষণা কৰিছে ৰাজ্য চৰকাৰৰ মন্ত্ৰী চন্দ্ৰমোহন পাটোৱাৰীয়ে।
তাৎপয্যপূৰ্ণভাৱে চাহ শ্ৰমিকসকলে বা অন্যান্য চাহ জনগোষ্ঠীয় সংগঠন সমূহে দাবী কৰি আহিছিল যে চাহ শ্ৰমিকসকলৰ মজুৰি ৩৫১ টকালৈ বৃদ্ধি কৰিব লাগে। কিন্তু অতদিনে ১৬৭ টকা দৈনিক মজুৰি লাভ কৰি আহিছিল।
ইপিনে, বিজেপি চৰকাৰৰ দিনতে পূৰ্বতে ৩০ টকা আৰু এতিয়া ৫০ টকা সৰ্বমুঠ ৮০ টকা বৃদ্ধি হোৱা বুলি দাবী কৰে মন্ত্ৰী পাটোৱাৰীয়ে।
ইয়াৰোপৰি, ৰেচন বানচৰ ক্ষেত্ৰত দৈনিক ১০১ টকাকৈ লাভ কৰিব বুলিও তেওঁ জনায়। বানচ যোগ কৰি চাহ শ্ৰমিকসকলে সৰ্বমুঠ ৩১৮ টকা মজুৰি লাভ কৰিব।
ইপিনে, চৰকাৰৰ কেবিনেটে এই সিদ্ধান্ত লৈ ঘোষণা কৰিলে যদিও চাহ কোম্পানীবিলাকৰ মালিকক এইক্ষেত্ৰত ৰাজ্য চৰকাৰে বাধ্য কৰাব পাৰে নে নাই সেয়া সময়ত লক্ষণীয় হ’ব।
চাহ শ্ৰমিকসকলক মজুৰি ২১৭ টকা আৰু ৰেচন বানচ ১০১ টকাকৈ দিয়াৰ ক্ষেত্ৰত চাহ উদ্যোগৰ মালিক বা কৰ্তৃপক্ষই চৰকাৰৰ এই সিদ্ধান্ত মানি লৈ কাৰ্য্যকৰী কৰে নে নাই সেয়াহে সময়ত লক্ষ্যণীয় হৈ পৰিব।