শ্ৰীভূমি জিলাত ভোট চুৰিৰ এক ভয়ংকৰ চাঞ্চল্য্যকৰ ঘটনা পোহৰলৈ আহিছে। জিলাখনৰ চৌধুৰী বজাৰ এলপি স্কুলৰ ভোট কেন্দ্ৰত ১৩৩ জন জীৱিত ভোটাৰক মৃত সজাই তেওঁলোকৰ নাম কৰ্তন কৰিবলৈ চলোৱা এক ষড়যন্ত্ৰ ফাদিল কৰি এতিয়া বি বিপদত পৰিছে বিএলঅ’ সুমনা চৌধুৰী।
অভিযোগ অনুসৰি চেলিম আহমেদ নামৰ এজন ব্যক্তিৰ জাল স্বাক্ষৰ কৰি ৭ নম্বৰ ফৰ্ম জমা দি এই নামবোৰ বাদ দিবলৈ চেষ্টা কৰা হৈছিল। সুমনা চৌধুৰীয়ে যোৱা ২১ জানুৱাৰীত সংবাদ মাধ্যমৰ আগত সদৰী কৰিছিল যে নিৰ্বাচনী বিষয়াৰ কাৰ্যালয়ৰ বীৰব্ৰত নামৰ এজন কৰ্মচাৰীয়ে তেওঁক এই কাম কৰিবলৈ হেঁচা দি আছিল। তেওঁৰ লগতে আন চাৰিজন বিএলঅ’ই একেই ধৰণৰ ঘটনা ঘটি থকা বুলি জানিবলৈ দিছিল।
এই ঘটনা পোহৰলৈ অহাৰ পিছতে চেলিম আহমেদে জিলা শাসকৰ ওচৰত এক স্মাৰকপত্ৰ দাখিল কৰে। তেওঁ স্পষ্টকৈ জনায় যে তেওঁ কাৰো নাম কৰ্তন কৰিবলৈ আবেদন জনোৱা নাই আৰু কোনে তেওঁৰ নামত জাল চহী কৰিছে তাৰ তদন্ত হোৱা উচিত।
এই ঘটনাক লৈ সমগ্ৰ ৰাজ্যতে তীব্ৰ প্ৰতিক্ৰিয়াৰ সৃষ্টি হয় আৰু বিৰোধী দলসমূহেও নিৰ্বাচন আয়োগৰ বিৰুদ্ধে সৰৱ হৈ পৰে। কিন্তু এই অনিয়মৰ বিৰুদ্ধে মাত মতাৰ বাবেহে শাস্তি ভোগ কৰিবলগীয়া হ’ল সুমনা চৌধুৰীয়ে। যোৱা ২৩ জানুৱাৰীত তেওঁক কিয় এইবোৰ কথা জনসমক্ষত প্ৰকাশ কৰিলে বুলি কাৰণ দৰ্শোৱাৰ জাননী জাৰি কৰা হৈছিল। যদিও সুমনা আৰু বাকী চাৰিজন বিএলঅ’ই ২৭ জানুৱাৰীত তেওঁলোকৰ উত্তৰ দাখিল কৰিছিল, কিন্তু নিৰ্বাচন বিষয়াই তেওঁলোকৰ সৈতে কোনো আলোচনা নকৰাকৈয়ে যোৱা ৫ ফেব্ৰুৱাৰীত সুমনা চৌধুৰীক চাকৰিৰ পৰা বৰখাস্ত কৰে।
জিলা শাসকে সুমনা চৌধুৰীক চাকৰিৰ পৰা বহিষ্কাৰ কৰাৰ আঁতত সংবাদ মাধ্যমৰ সৈতে কথা পতা, নিৰ্বাচন আয়োগৰ নিৰ্দেশ অমান্য কৰা আৰু কৰ্তব্যত অৱহেলা কৰাৰ দৰে যুক্তি দেখুৱাইছে। লক্ষ্যণীয় কথাটো হ’ল যে বাকী চাৰিজন বিএলঅ’ৰ বিৰুদ্ধে কোনো ব্যৱস্থা লোৱা হোৱা নাই। ইয়াৰ ফলত এইয়া এক উদ্দেশ্যপ্ৰণোদিত পদক্ষেপ বুলি অভিযোগ উঠিছে। সুমনা চৌধুৰীয়ে এতিয়া এই অন্যায়ৰ বিৰুদ্ধে আদালতৰ সহায় ল’ব বুলি জানিব পৰা গৈছে।
আনহাতে বিৰোধী দলসমূহে অভিযোগ কৰিছে যে কামৰূপ গ্ৰাম্য জিলাতো একেধৰণৰ ঘটনা ঘটিছে য’ত বিজেপিৰ কেইবাজনো নেতাই নিৰ্বাচন আয়োগৰ পাছৱৰ্ড ব্যৱহাৰ কৰি ভোটাৰৰ নাম কৰ্তন কৰিবলৈ ধৰা পৰিছিল। তেওঁলোকৰ বিৰুদ্ধে আৰক্ষীৰ ওচৰত এজাহাৰ দিয়াৰ পাছতো নিৰ্বাচন আয়োগে কোনো পদক্ষেপ গ্ৰহণ কৰা নাই। তাৰ বিপৰীতে যিয়ে ভোট চুৰিৰ ঘটনা ৰাইজৰ আগত ধৰা পেলাই দিলে, তেওঁৰ চাকৰি কাঢ়ি নিয়াটো অতি দুৰ্ভাগ্যজনক বুলি সকলোৱে ক্ষোভ প্ৰকাশ কৰিছে। এই ঘটনাই নিৰ্বাচন আয়োগৰ নিৰপেক্ষতাক লৈও ডাঙৰ প্ৰশ্নৰ সৃষ্টি কৰিছে।
