‘সন্ত্রাসবাদী আক্রমণ’ সংঘটিত কৰাৰ অপৰাধত দোষী সাব্যস্ত হোৱাৰ পাছত ইৰাণে এগৰাকী ব্যক্তিৰ মৃত্যুদণ্ড কাৰ্যকৰী কৰিছে৷
এই ব্যক্তিজনৰ নাম জামছিদ শাৰমাহাদ। তেওঁ ইৰাণ আৰু জাৰ্মানীৰ দ্বৈত নাগৰিক। ইৰাণৰ চৰকাৰী সংবাদ মাধ্যমে সোমবাৰে তেওঁক মৃত্যুদণ্ড দিয়াৰ কথা নিশ্চিত কৰে।
জামছিদৰ আমেৰিকাত থকাৰো অনুমতি আছে। ২০২৩ চনত ‘বিশ্বৰ দুৰ্নীতি’ৰ অভিযোগত তেওঁক মৃত্যুদণ্ডৰ শাস্তি প্ৰদান কৰা হৈছিল। ইৰাণৰ ইছলামিক আইনত এই অপৰাধৰ সৰ্বোচ্চ শাস্তি হ’ল মৃত্যুদণ্ড।
লগতে পঢ়কঃ গোটেই অক্টোবৰজুৰি দেশবাসীয়ে গুগলত কি আটাইতকৈ বেছি চাৰ্চ কৰিছে জানেনে? চাওক তথ্য
ইৰাণত ৰাজতন্ত্ৰবাদী সমৰ্থক এটা গোটৰ নেতৃত্ব দিয়া বুলি তেওঁক অভিযুক্ত কৰিছিল তেহৰানে। ২০০৮ চনত এই গোটটোৱে মাৰাত্মক বোমা বিস্ফোৰণৰ অভিযোগ উত্থাপন কৰিছে ইৰাণে। ইয়াৰ উপৰিও দেশৰ অন্য ঠাইত আক্ৰমণৰ পৰিকল্পনা কৰাৰো অভিযোগ উত্থাপন হৈছিল।
সোমবাৰে জাৰ্মানীৰ চ্যান্সেলৰ অলাফ শ্বলট্জে এক্স (পূৰ্বৰ টুইটাৰ)ত দিয়া এটা পোষ্টত এই মৃত্যুদণ্ডক এক কলংকিত ঘটনা বুলি অভিহিত কৰে। শ্বলট্জে কয় যে জামছিদক বিচাৰত আত্মপক্ষ সমৰ্থনৰ সুযোগো দিয়া হোৱা নাছিল।
জাৰ্মানীৰ বৈদেশিক মন্ত্ৰী এনালেনা বিয়াৰবকেও এই মৃত্যুদণ্ডক গৰিহণা দিয়ে। তেওঁ ইৰাণৰ ‘অমানৱীয় শাসন ব্যৱস্থা’ক তীব্ৰ সমালোচনা কৰে। এনালেনাই এক বিবৃতিত কয় যে তেওঁলোকে তেহৰাণক বাৰে বাৰে স্পষ্ট কৰি দিছে যে জাৰ্মান নাগৰিকক মৃত্যুদণ্ড দিয়াৰ পৰিণতি ভয়াৱহ হ’ব।
লগতে পঢ়কঃ জিন বিকাশৰ অধ্যয়নত নতুন পোহৰৰ সন্ধান; গৱেষকসকলে দিছে গুৰুত্বপূৰ্ণ তথ্য
২০২০ চনত ইৰাণৰ চোৰাংচোৱা মন্ত্ৰালয়ৰ এক বিবৃতিত জামছিদক গ্ৰেপ্তাৰ কৰাৰ কথা ঘোষণা কৰা হৈছিল। বিবৃতিটোত জামছিদক ‘সন্ত্রাসবাদী’ গোটৰ মুৰব্বী বুলি অভিহিত কৰা হৈছিল৷ কোৱা হৈছিল যে তেওঁ আমেৰিকাত বহি ইৰাণত সশস্ত্ৰ আৰু সন্ত্ৰাসবাদী কাৰ্যকলাপৰ পৰিচালনা কৰিছিল।
আমেৰিকাৰ লছ এঞ্জেলছত ভিত্তিক ‘কিংডম এছেম্বলী অৱ ইৰাণ’ নামৰ এই গোটটো বৰ বেছি পৰিচিত নহয়। এই গোটটোৱে ইৰাণত ৰাজতন্ত্ৰ পুনৰুদ্ধাৰ কৰিব বিচাৰে।
উল্লেখ্য যে ১৯৭৯ চনত ইৰাণত সংঘটিত হয় ইছলামিক বিপ্লৱ। এই বিপ্লৱৰ জৰিয়তে ইৰাণত ৰাজতন্ত্ৰ উফৰাই পেলোৱা হয়।
এই গোটটোৱে বিদেশত ৰেডিঅ’ আৰু টেলিভিছন ষ্টেচন পৰিচালনা কৰে। ইৰাণৰ বিৰোধীৰ কণ্ঠস্বৰ হিচাপে কাম কৰে।
লগতে পঢ়কঃ শিল্পা শ্বেট্টীৰ ৰেষ্টুৰেণ্ট বাষ্টিয়ানত চুৰি, খাবলৈ আহি অতিথিয়ে হেৰুৱালে ৮০ লাখ টকীয়া গাড়ী
জাৰ্মানীৰ বিৰোধী দল খ্ৰীষ্টিয়ান ডেম’ক্ৰেটিক পাৰ্টিৰ নেতা ফ্ৰেড্ৰিখ মাৰ্টজে কয় যে জামছিদ তেওঁলোকৰ দেশৰ নাগৰিক। তেওঁৰ মৃত্যুদণ্ড এক জঘন্য অপৰাধ। এই ঘটনাত তেওঁ জাৰ্মান চৰকাৰক স্পষ্ট স্থিতি গ্ৰহণ কৰিবলৈ আহ্বান জনাইছে।
