ভাৰতীয় মহাকাশ গৱেষণা সংস্থাই প্ৰক্ষেপণ কৰা চন্দ্ৰযান-২ য়ে প্ৰায় ৩,৮৪,৪০০০ কিলোমিটাৰ দূৰত্ব অতিক্ৰম কৰি ৭ ছেপ্তেম্বৰত চন্দ্ৰৰ দক্ষিণ প্ৰান্তত প্ৰৱেশ কৰিব।
চন্দ্ৰপৃষ্ঠত অৱতৰণ কৰিবলগীয়া ‘চন্দ্ৰযান-২’ৰ সমগ্ৰ দৃশ্য দেশৰ প্ৰধান মন্ত্ৰী নৰেন্দ্ৰ মোদীৰ সৈতে একেলগে প্ৰত্যক্ষ কৰাৰ বাবে ‘ইছৰো’ৰ পৰা নিমন্ত্ৰণ লাভ কৰিছে তিনিচুকীয়াৰ তেজস্বীনি গজুৰেলে।
মেধাৱী ছাত্ৰী তেজস্বীনি গজুৰেল হ’ল জিলাখনৰ প্ৰাক্ ঐতিহাসিক শদিয়াৰ অন্তৰ্গত চূণপুৰা সৰুধনীয়া গাঁৱৰ নিবাসী পদ্মনাথ গজুৰেল আৰু কবিতা গজুৰেলৰ জীয়ৰী।
বৰ্তমান অৰুণাচল প্ৰদেশত চিকিৎসক হিচাপে কৰ্মৰত পদ্মৰাজ গজুৰেল আৰু কবিতা গজুৰেলৰ কন্যা তথা অৰুণাচল প্ৰদেশৰ নিৰজুলীস্থিত কেন্দ্ৰীয় বিদ্যালয়ৰ (নেৰিষ্ট) অষ্টম শ্ৰেণীৰ ছাত্ৰী তেজস্বীনী গজুৰেলে অহা ৭ ছেপ্টেম্বৰত বেংগাৰুলৰ ইছৰোৰ সদৰৰ পৰা চন্দ্ৰপৃষ্ঠত অৱতৰণ কৰিবলগীয়া চন্দ্ৰযান-২ ৰ অৱতৰণৰ সমগ্ৰ দৃশ্যৰ সাক্ষী হৈ ৰব।
প্ৰধান মন্ত্ৰীৰ সৈতে একেলেগে মেধাৱী ছাত্ৰী গৰাকীয়ে চন্দ্ৰযান-২ ৰ সমগ্ৰ অৱতৰণৰ দৃশ্য উপভোগ কৰিবলৈ সুযোগ লাভ কৰাৰ খবৰে পৰিয়ালৰ লোক আৰুশদিয়াবাসীৰ লগতে অৰুণাচলবাসী ৰাইজক অধিক আনন্দিত কৰি তুলিছে।
তাৰোপৰি চেৰাপুঞ্জীৰ ৰামকৃষ্ণ মিছনৰ ছাত্ৰ ৰিৱাইট ফাৱাৰেও ‘চন্দ্ৰযান-২’ৰ অৱতৰণৰ দৃশ্য প্ৰত্যক্ষ কৰিবলৈ নিমন্ত্ৰণী লাভ কৰিছে।
