বিতৰ্কিত নাগৰিকত্ব (সংশোধন) আইনৰ ক্ষেত্ৰত কেৰালা, পাঞ্জাব, ৰাজস্থান, পশ্চিম বংগ আৰু পুডুচেৰীৰ পদাংক অনুকৰণ কৰি তেলেংগানায়ো আইনখনৰ বিৰুদ্ধে অনুৰূপ প্ৰস্তাৱ গ্ৰহণ কৰিব।
দেওবাৰে ৰাতি হোৱা দীঘলীয়া বৈঠকৰ পিছত ৰাজ্যখনৰ কেবিনেটে এই সিদ্ধান্তটোৰ কথা বিবৃতিৰ জৰিয়তে ঘোষণা কৰে।
প্ৰগতি ভৱন (মুখ্য মন্ত্ৰীৰ চৰকাৰী আৱাস)ত অনুষ্ঠিত বৈঠকত মুখ্য মন্ত্ৰী কে চন্দ্ৰশ্বেখৰ ৰাৱে অধ্যক্ষতা কৰিছিল।
তেলেংগানা কেবিনেটে লগতে কেন্দ্ৰীয় চৰকাৰলৈ ভাৰতীয় নাগৰিকত্বৰ বাবে ধৰ্মৰ ভিত্তিত বৈষম্য নকৰিবলৈ আহ্বান জনাইছে।
“আইনৰ দৃষ্টিত সকলো ধৰ্মক সমানে গ্ৰহণ কৰিব লাগিব। কেবিনেটে তাৰোপৰি কেন্দ্ৰক নাগৰিকত্ব (সংশোধন) আইন, ২০১৯ বাতিল কৰিবলৈও অনুৰোধ জনাইছে, যিখন আইনে নাগৰিকত্ব প্ৰদানৰ ক্ষেত্ৰত ধৰ্মৰ ভিত্তিত বৈষম্যৰ সৃষ্টি কৰিব, আৰু ফলস্বৰূপে সংবিধানত থকা ধৰ্মনিৰপেক্ষতাক সংকটত পেলাব”, বিবৃতিটোত কোৱা হয়।
মুখ্য মন্ত্ৰী চন্দ্ৰশ্বেখৰে পূৰ্বে সংবাদ মাধ্যমৰ আগত এটা মন্তব্যত কৈছিল যে আইনখনৰ বিৰোধিতা কৰিবলৈ তেওঁ দেশৰ আন আন আঞ্চলিক দলবোৰৰ সৈতেও কথা পাতিছে আৰু আঞ্চলিক দলবোৰ আৰু মুখ্য মন্ত্ৰীসকলৰ এখন বৈঠক আয়োজন কৰিব পাৰে।
প্ৰসংগক্ৰমে উল্লেখ কৰিব পাৰি যে শাসনাধিষ্ঠিত তেলেংগানা ৰাষ্ট্ৰ সমিতিয়ে সংসদত নাগৰিকত্ব সংশোধনী বিধেয়কখনৰ বিৰুদ্ধে ভোটদান কৰিছিল।
ইয়াৰ পূৰ্বে কেৰালাই প্ৰথমখন ৰাজ্য হিচাপে বিতৰ্কিত আইনখনৰ বিৰুদ্ধে প্ৰস্তাৱ গ্ৰহণ কৰিছিল।
পৰৱৰ্তী সময়ত ৰাজস্থান, পাঞ্জাব, পশ্চিম বংগ আৰু পুডুচেৰিয়েও অনুৰূপ প্ৰস্তাৱ গ্ৰহণ কৰে।
যোৱা বছৰৰ ডিচেম্বৰত কেন্দ্ৰৰ বিজেপি চৰকাৰে বিতৰ্কিত আইনখন আনিছিল আৰু এইখনৰ জৰিয়তে পাকিস্তান, বাংলাদেশ আৰু আফগানিস্তানৰ পৰা অবৈধভাৱে ভাৰতত প্ৰৱেশ কৰা অমুছলমান ৫টা সম্প্ৰদায় (হিন্দু, বৌদ্ধ, শিখ, পাৰ্চী, খ্ৰীষ্টান)ৰ লোকসকলক বিনাচৰ্তে নাগৰিকত্ব দিয়াৰ দিহা কৰা হৈছে।