বৃহস্পতিবাৰে সন্ধিয়া প্ৰধান মন্ত্ৰী নৰেন্দ্ৰ মোদী নেতৃত্বাধীন মন্ত্ৰীসভাৰ এগৰাকী ৰাজ্য মন্ত্ৰী হিচাপে শপত গ্ৰহণ কৰা অসমৰ সাংসদ ৰামেশ্বৰ তেলীয়ে খাদ্য সংসাধন উদ্যোগ বিভাগৰ ৰাজ্য মন্ত্ৰীৰ দায়িত্ব লাভ কৰিছে।
কেন্দ্ৰীয় মন্ত্ৰীসভাত অসমৰ পৰা একমাত্ৰ প্ৰতিনিধি ৰামেশ্বৰ তেলীয়ে এই দপ্তৰ লাভ কৰিছে। তেলীয়ে ডিব্ৰুগড় লোকসভা সমষ্টিৰ পৰা কংগ্ৰেছ প্ৰাৰ্থী পৱন সিং ঘাটোৱাৰক পৰাস্ত কৰি একেৰাহে দ্বিতীয়বাৰৰ বাবে সাংসদ হিচাপে নিৰ্বাচিত হয়।
আনহাতে, আজি মন্ত্ৰীসকলক বিতৰণ কৰা দপ্তৰসমূহৰ ভিতৰত উত্তৰ-পূৰ্বাঞ্চলৰ আন এগৰাকী প্ৰতিনিধি কিৰেন ৰিজিজুৱে লাভ কৰিছে ক্ৰীড়া আৰু যুৱ কল্যাণ বিভাগৰ স্বতন্ত্ৰ ৰাজ্য মন্ত্ৰীৰ দায়িত্ব। তদুপৰি, ৰিজিজুৱে সংখ্যালঘু পৰিক্ৰমা বিভাগৰ ৰাজ্য মন্ত্ৰীৰ দায়িত্বও লাভ কৰিছে।
ৰিজিজুৱে অৰুণাচল পশ্চিম লোকসভা সমষ্টিৰ পৰা কংগ্ৰেছ প্ৰাৰ্থী তথা অৰুণাচল প্ৰদেশৰ প্ৰাক্তন মুখ্য মন্ত্ৰী নাবাম টুকীক পৰাস্ত কৰি সাংসদ হিচাপে নিৰ্বাচিত হৈছিল। ৰিজিজুই প্ৰথম মোদী কেবিনেটত গৃহ বিভাগৰ ৰাজ্য মন্ত্ৰী হিচাপে দায়িত্ব পালন কৰিছিল।