ক্ৰিকেটৰ জীৱন্ত কিংবদন্তি শচীন তেণ্ডুলকাৰে আজি অসমৰ কৰিমগঞ্জৰ এখন চিকিৎসালয়লৈ বৃহৎ পৰিমাণৰ চিকিৎসা সামগ্ৰী সাহায্য হিচাবে আগবঢ়োৱাৰ কথাই প্ৰাক্তন ক্ৰিকেটাৰ গৰাকীৰ মহানুভৱতাৰ কথাকে পুনৰ বাৰ প্ৰমাণ কৰিলে।
ইউনিচেফৰ গুডউইল এম্বেচাদৰ তেণ্ডুলকাৰে কৰিমগঞ্জৰ মকুন্দ হস্পিতাললৈ আগবঢ়োৱা বিভিন্ন ধৰণৰ চিকিৎসা সামগ্ৰীয়ে প্ৰায় ২০০০ হাজাৰ আৰ্থিক ভাবে দুৰ্বল পৰিয়ালৰ শিশুক উপকৃত কৰিব বুলি ভবা হৈছে।
মকুন্দ হস্পিতালৰ চিকিৎসক ডাঃ বিজয় আনন্দ ইছমাইলীয়ে শচীন তেণ্ডুলকাৰৰ মহানুভৱতাৰ শলাগ লৈ কয় যে চিকিৎসালয় খনৰ শিশু ৰোগ বিভাগলৈ তেওঁ আগবঢ়োৱা সাহায্যই বহু শিশুৰ প্ৰাণ ৰক্ষা কৰাত সহায় কৰিব।
উল্লেখ্য ক্ৰিকেটৰ যাদুকৰ গৰাকীয়ে তেণ্ডুলকাৰ ফাউণ্ডেছন আৰু ইকাম ফাউণ্ডেছনৰ জৰিয়তে এই সাহায্য আগবঢ়াইছে।
ইয়াৰ পূৰ্বেও তেণ্ডুলকাৰ ফাউণ্ডেছনে মধ্যপ্ৰদেশৰ অতি পিছ পৰা জনজাতীয় লোকসকলৰ কল্যাণৰ বাবে সাহায্য আগবঢ়াইছিল।
অদূৰ ভৱিষ্যতেও তেণ্ডুলকাৰ ফাউণ্ডেছনে অসম তথা উত্তৰ পূৰ্বাঞ্চলৰ উন্নয়নৰ বাবে সহায়ৰ হাত আগবঢ়াই যাব বুলি চিকিৎসক ইছমাইলীয়ে আশা প্ৰকাশ কৰে।
