কলিয়াবৰৰ কেলিডেন চাহ বাগিছাত শনিবাৰে নিশা এক উত্তপ্ত পৰিস্থিতিৰ সষ্টি হয়। এটা চাৰিবছৰীয়া শিশুৰ মৃত্যুক কেন্দ্ৰ কৰিয়েই উত্তপ্ত পৰিস্থিতিৰ সৃষ্টি হয় চাহ বাগিছাখনত। নিহত শিশুটোৰ নাম ধ্ৰুপ তাঁতী।
বাগিছাখনৰ চিকিৎসকৰ চূড়ান্ত গাফিলতিৰ বাবেই শিশুটোৱে মৃত্যুক সাৱটিলে বুলি দাবী তুলিছে পৰিয়ালৰ লগতে গাওঁবাসীয়ে।
ঘটনাৰ বিৱৰণী মতে কেলিডেন চাহ বাগিছাৰ ১ নং লাইনৰ গুৰিয়া তাঁতীৰ চাৰি বছৰীয়া সন্তান ধ্ৰুপ তাঁতীক তিনি মাহ পূৰ্বে পথৰ দাঁতিত কুকুৰে কামুৰিছিল। পিছত পিতৃহীনা ধ্ৰুপক বাগিছাখনৰ চিকিৎসালয়ত মাতৃয়ে ভৰ্তি কৰে যদিও চিকিৎসকে টি টি বেজি এটা দিয়ে দায়িত্ব সামৰে।
লগতে পঢ়ক: অংগনবাড়ী কৰ্মী-সহায়িকাক মাননীৰ পৰিৱৰ্তে মজুৰি দিয়াৰ দাবী অংগনবাড়ী কৰ্মী-সহায়িকা সন্থাৰ
তিনি মাহৰ পিছত শিশুটোৰ স্বাস্থ্যৰ অৱনতি ঘটাত পুনৰ বাগিছাখনৰ চিকিৎসালয়লৈ নিয়া হয় যদিও চিকিৎসকে জখলাবন্ধা অসামৰিক চিকিৎসালয়লৈ প্ৰেৰণ কৰে।
জখলাবন্ধাৰ পৰা উন্নত চিকিৎসাৰ বাবে শিশুটোক লৈ যোৱা অৱস্থাতে শনিবাৰে মৃত্যুক সাবটি লয়। ইয়াৰ পিছতে পৰিস্থিতি উত্তপ্ত হৈ পৰে আৰু বাগিছাখনৰ চিকিৎসকৰ হেমাহিৰ দাবী তোলে স্থানীয় লোকসকলে।
লক্ষ্যণীয়ভাবে ধ্ৰুপৰ মৃতদেহটো চিকিৎসালয়খনলৈ অনাৰ পিছতো নিশাৰ ভাগত চিকিৎসালয়খনত এজনো চিকিৎসা কৰ্মী উপস্থিত নথকাত পৰিস্থিতি অধিক উত্তপ্ত হৈ পৰে।
স্থানীয় লোকসকলে চিকিৎসকজনৰ বদলিৰ দাবী তোলে। ইপিনে, ন্যায় বিচাৰি শোকত ভাগি পৰিছে পৰিয়ালবৰ্গ।