শনিবাৰে ‘দিচপুৰ চলৌ’ কাৰ্য্যসূচীৰে দিচপুৰ কঁপাবলৈ সাজু প্ৰায় ২০ হাজাৰ টেট শিক্ষক। পুৱা ১০ বজাত মহানগৰীৰ খানাপাৰাস্থিত পশু চিকিৎসা মহাবিদ্যালয় খেলপথাৰৰ পৰা দিচপুৰলৈ আহিব একাংশ প্ৰাথমিক টেট উত্তীৰ্ণ শিক্ষক।
নৰ্থ ইষ্ট নাওৰ সৈতে হোৱা কথা-বতৰাত এই কথা জানিবলৈ দিয়ে সদৌ অসম প্ৰাথমিক টেট উত্তীৰ্ণঁ শিক্ষক সমাজৰ বিত্ত সম্পাদক কুলজিত ঠাকুৰীয়াই।
উল্লেখ্য যে, বিনাচৰ্তে বেতন সুৰক্ষাসহ চাকৰি নিয়মীয়াকৰণৰ দাবীৰে বিভিন্ন সময়ত আন্দোলন কৰি অহা টেট শিক্ষকসকলে বৃ্হস্পতিবাৰে পুনৰ শিক্ষা মন্ত্ৰী সিদ্ধাৰ্থ ভট্টাচাৰ্য্যৰ সৈতে আলোচনাত মিলিত হৈছিল। আলোচনাৰ অন্তত শিক্ষা মন্ত্ৰীয়ে এই আলোচনাক সৌহাৰ্দ্যমূলক আখ্যা দিয়াৰ বিপৰীতে মূল দাবী ‘বিনাচৰ্তে বেতন সুৰক্ষাসহ চাকৰি নিয়মীয়াকৰণ’ বিষয়ৰ পৰা শিক্ষা মন্ত্ৰী আঁতৰি থকাত একাংশ টেট শিক্ষকে ইয়াক বিফল বুলি আখ্যা দিয়ে।
‘আমাক শিক্ষা মন্ত্ৰীৰ ফালৰ পৰা অনানুষ্ঠানিকভাৱে আলোচনাৰ বাবে নিমন্ত্ৰণ জনোৱাত আমাৰ কেইগৰাকীমান প্ৰতিনিধি গৈ তাত উপস্থিত হৈছিলগৈ। প্ৰায় দুঘন্টা ধৰি আলোচনা হৈছিল। কথা-বতৰাত শিক্ষা মন্ত্ৰী যোগাত্মক আছিল যদিও আমাৰ যি মূল দাবী– ‘বিনা চৰ্তে বেতন সুৰক্ষা’’– এই দাবীটো মানি লোৱা নাই। তাৰ সলনি তেওঁ আমাক কৈছে যে আপোনালোকে চাকৰি কৰিয়েই আছে, আপোনালোককটো খেদি দিয়া নাই।’ এইদৰে কয় ঠাকুৰীয়াই।
তেওঁ লগতে কয় যে টেট উত্তীৰ্ণ শিক্ষকসকলক ১১ মাহকৈ বৃদ্ধি কৰি কৰি চাকৰিত ৰাখি আছে আৰু ৰাষ্ট্ৰীয় শিক্ষা নীতি প্ৰযোজ্য হ’লে ঠিকাভিত্তিক শিক্ষকক ৰখা নহ’ব বুলি স্পষ্টকৈ উল্লেখ আছে।
‘যদি ২০২১ চনত আমাক ৰাষ্ট্ৰীয় শিক্ষানীতিৰ দোহাই দি চাকৰিৰ পৰা খেদি দিয়ে, তেন্তে কি হ’ব, তাতে কালি আলোচনাৰ সময়ত তেওঁ কোনো লিখিত প্ৰতিশ্ৰুতিও দিয়া নাই। গতিকে কাইলৈ দিচপুৰ চলৌ কাৰ্য্যসূচী কৰাৰ সিদ্ধান্ততে আমি অটল আছো।’ ঠাকুৰীয়াই কয়।
তাৎপৰ্য্যপূৰ্ণভাৱে, কালি হৈ যোৱাৰ আলোচনাৰ পাছতে বিভাজন ঘটে টেট শিক্ষক সমাজৰ মাজত। দুটা ফৈদত বিভক্ত হ’ল শিক্ষক সমাজ।
এক সূত্ৰই জানিবলৈ দিয়া মতে কাইলৈ প্ৰতিবাদত অংশগ্ৰহণ নকৰে অনুসূচিত জাতি-জনজাতি টেট শিক্ষক সন্থা আৰু ষ্টে’ট পুল টেট শিক্ষকে। অৱশ্যে ১১ হাজাৰ ষ্টেট পুল টেট শিক্ষকৰ ৬,৫০০ গৰাকী টেট শিক্ষক প্ৰাথমিক টেট উত্তীৰ্ণ শিক্ষক সমাজৰ লগতে আছিল বুলি দাবী কৰে সূত্ৰটোৱে।
‘১৮ জুনৰ উপায়ুক্তৰ কাৰ্য্যালয় ঘেৰাও কাৰ্য্যসূচীত ৪১ হাজাৰ টেট উত্তীৰ্ণ শিক্ষকে অংশগ্ৰহণ কৰিছিল। তাৰ পাছত কালি পৰিস্থিতি কিছু সলনি হ’ল। আমি নাজানো তেওঁলোক কাৰোবাৰ প্ৰৰোচনাৰ বলি হৈছে নে চৰকাৰে কিব দিম বুলি কৈছে? আজি তেওঁলোক পৃথকে শিক্ষা মন্ত্ৰীৰ লগত পুনৰবাৰ মিলিত হৈছিল। এই আলোচনাৰ পাছতে তেওঁলোক আমাৰ লগত নাথাকো বুলি আমাক জনাইছে।’ টেট শিক্ষকৰ মাজত বিভাজনৰ প্ৰসংগ সন্দৰ্ভত আমাৰ সাংবাদিকে সোধা প্ৰশ্নৰ উত্তৰত এইদৰে কয় ঠাকুৰীয়াই।
ইপিনে, বিভাজন হ’ল যদিও ষ্টেট পুল টেট শিক্ষকৰ ধুবুৰী জিলা সমিতি, বিশ্বনাথ জিলা কমিটিকে ধৰি অন্য কেইবাখনো জিলা সমিতি শনিবাৰৰ প্ৰতিবাদী কাৰ্য্যসূচীত অংশগ্ৰহণৰ বাবে আহিব বুলি ঠাকুৰীয়াই আমাৰ সাংবাদিকৰ আগত কয়।
