তেজপুৰ বিশ্ববিদ্যালয়ৰ দীৰ্ঘদিনীয়া অমীমাংসিত সমস্যাসমূহক কেন্দ্ৰ কৰি চলি থকা প্ৰতিবাদে ১০০ দিন অতিক্ৰম কৰাৰ সময়তে বিশ্ববিদ্যালয়ৰ অংশীদাৰসকলে এক ২৪ ঘণ্টীয়া অনশন কাৰ্যসূচী গ্ৰহণ কৰিছে। ২৯ ডিচেম্বৰৰ পুৱা ১২ বজাৰ পৰা নিশা ১১:৫৯ বজালৈ এই অনশন কাৰ্যসূচী ৰূপায়ণ কৰা হয়।
প্ৰতিবাদকাৰীসকলৰ মতে, শান্তিপূৰ্ণ প্ৰতিবাদ, স্মাৰকপত্ৰ দাখিল আৰু তদন্তৰ দাবীত বাৰে বাৰে আবেদন জনোৱাৰ পিছতো বিশ্ববিদ্যালয় প্ৰশাসনে কোনো ধৰণৰ কাৰ্যকৰী পদক্ষেপ গ্ৰহণ কৰা নাই। ইয়াৰ পৰিপ্ৰেক্ষিততে অংশীদাৰসকলে এই অনশনৰ দৰে চৰম পন্থা গ্ৰহণ কৰিবলৈ বাধ্য হৈছে।
বিশ্ববিদ্যালয় সমাজে অভিযোগ উত্থাপন কৰিছে যে বৰ্তমানৰ প্ৰশাসনিক ব্যৱস্থাই প্ৰতিষ্ঠানিক অখণ্ডতা ৰক্ষা বা ছাত্ৰ-ছাত্ৰীৰ স্বাৰ্থ সুৰক্ষাৰ পৰিৱৰ্তে ক্ষমতাত থকা ব্যক্তিসকলক সুৰক্ষা দিয়াতহে অধিক মনোনিৱেশ কৰা পৰিলক্ষিত হৈছে। তেওঁলোকে বিশেষভাৱে উপাচাৰ্য শম্ভু নাথ সিঙৰ দীৰ্ঘদিনীয়া অনুপস্থিতি আৰু বিশ্ববিদ্যালয় কৰ্তৃপক্ষৰ নিষ্ক্ৰিয়তাক ‘প্ৰশাসনিক পক্ষাঘাত’ বুলি অভিহিত কৰিছে, যিয়ে জনসাধাৰণৰ আস্থা ক্ষুণ্ণ কৰিছে বুলিও অভিযোগ তোলে।
অনশন কাৰ্যসূচীৰ জৰিয়তে অংশীদাৰসকলে ইয়াক ব্যৱস্থাগত শাসনৰ ব্যৰ্থতা বুলি অভিহিত কৰিছে, তেওঁলোকৰ মতে, এই ব্যৱস্থাত সত্যক অৱজ্ঞা কৰা হৈছে, ন্যায় প্ৰদানত বিলম্ব কৰা হৈছে আৰু গণতান্ত্ৰিক কণ্ঠক দমন কৰিবলৈ চেষ্টা চলোৱা হৈছে।
প্ৰতিবাদকাৰীসকলে কয় যে এই বিষয়টো কেৱল বিশ্ববিদ্যালয়খনৰ মাজতেই সীমাবদ্ধ নহয়; ই ৰাজহুৱা প্ৰতিষ্ঠানসমূহৰ বিশ্বাসযোগ্যতা আৰু শাসন ব্যৱস্থাৰ নৈতিকতাৰ সৈতে ওতপ্ৰোতভাৱে জড়িত। তেওঁলোকে দৃঢ়তাৰে ঘোষণা কৰে যে ন্যায়ৰ দাবীত তেওঁলোকৰ এই আন্দোলন অব্যাহত থাকিব আৰু কোনো পৰিস্থিতিতে তেওঁলোকৰ সংকল্প দুৰ্বল নহয়।
