ধনবাদী আৰু অপহৰণৰ গোচৰত গ্ৰেপ্তাৰ হোৱা বীৰ লাচিত সেনাৰ দহজন অভিযুক্ত সদস্যৰ আজি চি আই ডিৰ জিম্মা সম্পূৰ্ণ হয়। ৫ দিনৰ মূৰত আজি তেওঁলোকক চি আই ডিৰ জিম্মাৰ পৰা গুৱাহাটী চি জে এম আদালতত হাজিৰ কৰা হয়।
এই গোটেই কেইজন ব্যক্তিক যোৱা ৭ নৱেম্বৰত দিছপুৰ আৰক্ষীয়ে গ্ৰেপ্তাৰ কৰিছিল। পিছদিনা ৮ নৱেম্বৰত অপৰাধ তদন্ত বিভাগে চাইবাৰ আৰক্ষী থানাৰ পৰা বীৰ লাচিত সেনাৰ পাঁচজন সদস্যক অধিক জেৰাৰ বাবে চিআইডিৰ মুখ্য কাৰ্যালয়লৈ লৈ যায় আৰু তাত তেওঁলোকক জিম্মাত ৰখা হয়।
গ্ৰেপ্তাৰ হোৱা লোকসকলৰ ভিতৰত আছে ৰণ্টুপানী ফুকন, বিকাশ অসম, তন্ময় চেতিয়া, উৎপল দত্ত, বিৰাজ বল্লভ, ৰিয়াজ আহমেদ, মোহন আলী, চিন্ময় দেৱ, বিশ্বজিৎ দলে, আৰু ইনামুল হক। অসমৰ বিভিন্ন জিলাৰ পৰা এই অভিযুক্তসকলক আটক কৰি সোধা-পোছাৰ বাবে গুৱাহাটীলৈ অনা হয়।
উল্লেখ্য যে ইয়াৰ পূৰ্বে চি আই ডিয়ে বীৰ লাচিত সেনাৰ বিৰুদ্ধে চি আই ডি থানাত আনুষ্ঠানিক গোচৰ ৰুজু কৰি বৃহৎ পৰিসৰৰ অভিযান আৰম্ভ কৰিছিল। দ্ৰুতগতিত কাম কৰি সংস্থাটোৱে ৰাজ্যখনৰ কেইবাখনো থানাত গোটটোৰ বিৰুদ্ধে দাখিল কৰা পুৰণি গোচৰৰ সৈতে জড়িত তদন্তৰ ফাইলসমূহ পুনৰ মুকলি কৰে।
পৰ্যালোচনাৰ পিছত একাধিক জিলাত অভিযান চলোৱা হয়, যাৰ ফলত সংগঠনটোৰ সৈতে জড়িত কমেও দহজন সদস্যক গ্ৰেপ্তাৰ কৰা হয়।
বিষয়াসকলৰ মতে, বৃহস্পতিবাৰে চি আই ডি থানাত বীৰ লাচিত সেনাৰ বিৰুদ্ধে ২০/২৫ নম্বৰৰ গোচৰ ৰুজু কৰা হয়। ইয়াৰ পিছত বিভাগটোৱে গোটটোৰ বিৰুদ্ধে দাখিল কৰা সকলো জিলা পৰ্যায়ৰ এফআইআৰ একত্ৰিত কৰি তদন্তক সুশৃংখলিত কৰিবলৈ একক আৰু বিস্তৃত তদন্ত আৰম্ভ কৰে।
