বাংলাভাষী মুছলমানক লৈ চলি থকা বিতৰ্কৰ মাজতে বৃহস্পতিবাৰে অসম বিধানসভাই ধ্বনি ভোটৰ দ্বাৰা অসম মুছলমান বিবাহ আৰু বিবাহ বিচ্ছেদ পঞ্জীয়ন আইন বাতিলৰ বিধেয়ক গৃহীত কৰে।
অসম বাতিল বিধেয়ক, ২০২৪ নামেৰে নামাকৰণ বিধেয়ক খনৰ দ্বাৰা বাতিল কৰা হয় ৮৯ বছৰীয়া মুছলমান বিবাহ পঞ্জীয়ন আৰু বিবাহ বিচ্ছেদ আইন।
বিধেয়কখনত বাল্যবিবাহ ৰোধ কৰাৰ লগতে মুছলমান বিবাহত কাজী প্ৰথা বিলুপ্ত কৰাৰ প্ৰস্তাৱ দিয়া হৈছে।
উল্লেখ্য যে যোৱা সপ্তাহতে এই বিধেয়কখন উত্থাপন কৰা হৈছিল যদিও আজি বিধেয়কখন সম্পৰ্কে পুনৰ আলোচনা কৰা হয়।
মুখ্যমন্ত্ৰী হিমন্ত বিশ্ব শৰ্মাই কয়, আমি কাজী ব্যৱস্থাৰ অন্ত বিচাৰো। এই কাজী প্ৰথা মুছলমান বিবাহত যুগ যুগ ধৰি চলি আহিছিল। একে সময়তে আমি ৰাজ্যত বাল্যবিবাহৰ অন্ত পেলাবলৈ বদ্ধপৰিকৰ।
অৱশ্যে কাজী ব্যৱস্থা বিলুপ্ত কৰা সিদ্ধান্তৰ বিৰোধিতা কৰিছে বিৰোধী মহলৰ একাংশ নেতাই।
এ আই ইউ ডি এফৰ নেতা আমিনুল ইছলামে কয়, আমিও বাল্যবিবাহৰ বিৰোধী। চৰকাৰে পূৰ্বৰ আইনখনত কিছু সংশোধনী আনিব পাৰিলেহেঁতেন। কিন্তু, ১৯৩৫ চনৰ মুছলমান বিবাহ আৰু বিবাহ বিচ্ছেদ পঞ্জীয়ন আইন বাতিল হ’ব নালাগিছিল। বিধানসভাত এই বিধেয়ক গৃহীত হ’লেও আমি ইয়াৰ বিৰুদ্ধে আদালতলৈ যাম।
অসম বাতিল বিধেয়কত কোৱা হৈছে যে এয়া ঔপনিৱেশিক আইন। এই আইনখন ব্ৰিটিছ চৰকাৰৰ অধীনত অসম প্ৰদেশৰ মুছলমানসকলৰ বাবে প্ৰণয়ন কৰা হৈছিল। এই আইনখনৰ প্ৰয়োজন আজিৰ তাৰিখত নাই।
স্মৰ্তব্য যে অসম বাতিল বিধেয়ক খন বিধান সভাত উত্থাপন কৰে ৰাজহ আৰু দুৰ্যোগ ব্যৱস্থাপনা মন্ত্ৰী যোগেন মোহনে।
