অসাধাৰণ অভিনয়েৰে জগত জিনা ইৰফান খানৰ অকাল বিয়োগে পেলোৱা শোকৰ ছাঁৰ মাজতে পোহৰলৈ আহিছে অভিনেতাজনৰ সৈতে থকা অসমৰ এক সম্পৰ্ক।
ৰাষ্ট্ৰীয়, আন্তঃৰাষ্ট্ৰীয় বহু প্ৰখ্যাত ছবিত অভিনয় কৰা অভিনেতাজনে বীৰেন্দ্ৰ কুমাৰ ভট্টাচাৰ্য্যৰ জ্ঞানপীঠ বঁটা বিজয়ী উপন্যাস “মৃত্যুঞ্জয়”ক লৈ নিৰ্মিত এক হিন্দী ছিৰিয়েলত অভিনয় কৰিছিল।
চাৰুকমল হাজৰিকাই নিৰ্মাণ কৰা “মৃত্যুঞ্জয়”ত ইৰফান খান হৈছিল অসমীয়া “ধনপুৰ”।
১৯৯২-৯৩ চনত দূৰদর্শনৰ বাবে নিৰ্মিত উক্ত হিন্দী ছিৰিয়েলত ইৰফান খানে “ধনপুৰ”ৰ চৰিত্রটো ৰূপায়ণ কৰিছিল।
ইৰফান খানৰ উপৰি ছিৰিয়েলখনৰ মুখ্য “গোসাঁই” চৰিত্ৰটোত অভিনয় কৰিছিল অতি জনপ্ৰিয় ধাৰাবাহিক “ৰামায়ণ” “ৰাম” অৰুণ গোভিলে।
নয়নমণি বৰুৱাই সংগীত দিয়া ধাৰাবাহিকখনত দূৰদৰ্শনত সম্প্ৰচাৰ হৈছিল।
ইৰফান খান।
অসমীয়াৰ ধনপুৰ।১৯৯২-৯৩ চনত বীৰেন্দ্র কুমাৰ ভট্টাচার্য্যৰ বিখ্যাৎ অসমীয়া জ্ঞানপীঠ বিজয়ী উপন্যাস “মৃত্যুঞ্জয়”ৰ চাৰুকমল হাজৰিকাই কৰা দূৰদর্শন হিন্দী ছিৰিয়েলত ইৰফান খানে ধনপুৰৰ চৰিত্রটো ৰূপায়ণ কৰিছিল।
সেই ছিৰিয়েলৰ সৈতে জড়িত আছিলো, সেয়ে ইৰফানক ভালকৈ লগ পাইছিলো।
— Samudra G Kashyap (@samudragkashyap) April 29, 2020
নিউৰ’এণ্ড’ক্ৰাইন কেন্সাৰ নামৰ এক দুৰাৰোগ্য ৰোগত আক্ৰান্ত হৈ বহুদিন ইৰফান খান ছবিজগতৰ পৰা আঁতৰি আছিল।
লণ্ডনত তেওঁ চিকিৎসা গ্ৰহণ কৰিছিল। শেহতীয়াকৈ “অংগ্ৰেজি মিডিয়াম” নামৰ বলিউদ ছবিখনেই আছিল তেওঁৰ অন্তিম ছবি।
লাইফ অৱ পাইৰ পৰা লাঞ্চবক্স হৈ পান সিং তোমাৰলৈকে অসংখ্য ছবিত তেওঁ অভিনয় কৰি গৈছে। তেওঁৰ অভিনয়ে ছিনএসমূহত এক অন্য মাত্ৰা প্ৰদান কৰিছিল আৰু এচাম নতুন দৰ্শক আৰু অভিনেতাৰো সৃষ্টি কৰিছিল।
জানিব পৰা মতে পেটৰ গুৰুতৰ সমস্যাত ভুগি থকা ইৰফানক মঙলবাৰে সংকটজনক অৱস্থাত চিকিৎসালয়ত ভৰ্তি কৰা হৈছিল। অভিনেতাগৰাকীৰ কলন ইনফেকশ্যন হৈছিল।
চিকিৎসাধীন অৱস্থাতে মুম্বাইৰ কোকিলাবেন ধীৰুভাই আম্বানী চিকিৎসালয়তে তেওঁ শেষ নিশ্বাস ত্যাগ কৰে।
