অসমৰ জনসাধাৰণৰ হৃদস্পন্দন সদৃশ শিল্পী জুবিন গাৰ্গৰ মৃত্যুৰ ইমান দিনৰ পিছতো আৰু ৰাইজৰ ব্যাপক প্ৰতিবাদৰ পাছতো শ্যামকানু মহন্ত আৰু সিদ্ধাৰ্থ শৰ্মাকে ধৰি অভিযুক্ত সকলক আটক নকৰাৰ কাৰণে এছ এফ আই অসম ৰাজ্যিক কমিটিয়ে গভীৰ দুখ আৰু ক্ষোভ প্ৰকাশ কৰিছে। এক নিখুঁত তদন্তৰ বাবে অভিযুক্ত সকলক আটক কৰাটো অতীৱ প্ৰয়োজনীয়। অথচ জুবিন গাৰ্গৰ মৃত্যুৰ ন্যায় বিচাৰি প্ৰতিবাদ কৰা ৰাইজক লাঠী চালনা কৰি আঘাতপ্ৰাপ্ত কৰা চৰকাৰখনে এতিয়ালৈকে কিয় শ্যামকানু মহন্ত, সিদ্ধাৰ্থ শৰ্মাহতঁক আটক কৰা নাই, এয়া এক ডাঙৰ সাথঁৰ। কাৰ আশীৰ্বাদত এতিয়ালৈকে মুকলি আকাশত অভিযুক্ত সকলে বিচৰণ কৰি আছে ,সেই প্ৰশ্ন ও এছ এফ আই অসম ৰাজ্যিক কমিটিয়ে উথ্থাপন কৰিছে।
এছ এফ আই অসম ৰাজ্যিক কমিটিয়ে দাবী জনাই যে খুটঁ নথকাকৈ নিখুঁত ভাৱে তদন্ত প্ৰক্ৰিয়া সমাপন হোৱাৰ উদ্দেশ্য অনতিপলমে চৰকাৰে শ্যামকানু মহন্ত আৰু সিদ্ধাৰ্থ শৰ্মাকে ধৰি অভিযুক্ত আটাইকেইজন ব্যক্তিক আটক কৰক।
তেজপুৰ বিশ্ববিদ্যালয়ৰ ছাত্ৰ ছাত্ৰী সকলকে ধৰি প্ৰতিবাদকাৰী শিক্ষকসকল আৰু কৰ্মচাৰী সকলক এছ এফ আই অসম ৰাজ্যিক কমিটিয়ে সংগ্ৰামী অভিবাদন জ্ঞাপন কৰিছে। তেজপুৰ বিশ্ববিদ্যালয়ৰ উপাচাৰ্য গৰাকীৰ পদত্যাগ আৰু এখন সুস্থ স্বতন্ত্ৰ ছাত্ৰ একতা সভাৰ দাবী ৰে এই প্ৰতিবাদ চলি আহিছে। এছ এফ আই এ প্ৰত্যক্ষ কৰিছে যে বছব বছৰ ধৰি তেজপুৰ বিশ্ববিদ্যালয়ৰ কৰ্তৃপক্ষই তেজপুৰ বিশ্ববিদ্যালয়ৰ কেম্পাছৰ গণতান্ত্ৰিক ব্যৱস্থাটোক হত্যা কৰি আহিছে। এছ এফ আই অসম ৰাজ্যিক কমিটিয়ে দাবী জনাই যে-
ক) অসমৰ আৱেগক অসন্মান কৰা, ছাত্ৰ ছাত্ৰীৰ দাবী সমূহৰ সন্মুখীন হ‘বলৈ অপাৰগ পলাতক উপাচাৰ্য শম্ভু নাথ সিঙে অতিশীঘ্ৰেই পদত্যাগ কৰক।
খ) এক সুস্থ শৈক্ষিক বাতাবৰণৰ বাবে আৰু সমালোচনাত্মক চিন্তাধাৰাৰ বিকাশৰ বাবে এক সুস্থ গণতান্ত্ৰিক স্বতন্ত্ৰ ছাত্ৰ একতা সভাৰ দাবী অতি সোনকালেই কৰ্তৃপক্ষই কাৰ্যকৰী কৰক।
উপাচাৰ্য শম্ভু নাথ সিঙৰ ওপৰত ইমানবোৰ দুৰ্নীতিৰ অভিযোগ থকাৰ পাছতো কিহৰ তাড়নাত চৰকাৰ খনে তেনে এজন ব্যক্তিক তেজপুৰ বিশ্ববিদ্যালয়ৰ উপাচাৰ্য হিচাপে নিযুক্তি দিয়ে, সেই উত্তৰ চৰকাৰে অতি তাৎক্ষণিকভাৱে প্ৰদান কৰক।
জিএনবি উৰণীয়া সেতুখন ৰবীন্দ্ৰ ভৱনত বন্ধ হ’ব বুলি আদালতক আশ্বাস দিয়াৰ পাছতো এতিয়া ইয়াক জিলা পুথিভঁৰাল পইণ্টলৈ সম্প্ৰসাৰণ কৰাৰ পৰিকল্পনা কৰা হৈছে। এই সম্প্ৰসাৰণে দীঘলীপুখুৰীত প্ৰত্যক্ষ প্ৰভাৱ পেলোৱাৰ লগতেই অতিৰিক্ত গছ কটাৰ আশংকা নমাই আনিছে। শিল্পী জুবিন গাৰ্গে দীঘলী পুখুৰীৰ গছ কটাৰ বিৰূদ্ধে সংঘটিত সংগ্ৰাম খনত প্ৰত্যক্ষভাৱে জড়িত হৈছিল আৰু চৰকাৰক গছ নাকটিবৰ বাবে দাবী জনাইছিল। অথচ জুবিন গাৰ্গৰ মৃত্যুৰ এসপ্তাহ নহওঁতেই অতিৰিক্ত গছ কটাৰ চৰকাৰে যি ষড়যন্ত্ৰ কৰিছে, সেয়া অগণতান্ত্ৰিক, প্ৰকৃতি বিৰোধী আৰু জুবিন গাৰ্গৰ প্ৰতি অসন্মানজনক। এছ এফ আই অসম ৰাজ্যিক কমিটিয়ে এই বিষয় সম্পৰ্কত তীক্ষ্ণ দৃষ্টি ৰাখিব আৰু কোনো অতিৰিক্ত গছ কাটিলে এক তীব্ৰ আন্দোলন গঢ়ি তুলিব।
