আসন্ন লোকসভা নিৰ্বাচনৰ অহা ১১ এপ্ৰিলত প্ৰথম পৰ্যায়ত অনুষ্ঠিত হ’ব লগা নিৰ্বাচনৰ বাবে ১৪নং লখিমপুৰ সমষ্টিত কংগ্ৰেছ প্ৰাৰ্থী হিচাপে অনিল বৰগোহাঁয়ে শুকুৰবাৰে মনোনয়ন পত্ৰ দাখিল কৰে। অসমৰ জনসাধাৰণৰ বাবে স্বল্পখ্যাত প্ৰাৰ্থীগৰাকীয়ে লোকসভাৰ নিৰ্বাচনৰ বাবে দাখিল কৰা তেওঁৰ শপতনামাত বহু নতুন তথ্য প্ৰকাশ পাইছে।
নিৰ্বাচন আয়োগৰ ওচৰত দাখিল কৰা তথ্য অনুসৰি বৰগোঁহাই এগৰাকী কোটিপতি প্ৰাৰ্থী।ধেমাজি জিলাৰ ধেমাজি নগৰৰ ৩নং ৱাৰ্ডৰ ষ্টেশ্যন ৰোডৰ বাসিন্দা অনিল বৰাগোহাঁয়ে ৰিটাৰ্নিং বিষয়াৰ ওচৰত মনোনয়ন-পত্ৰৰ সৈতে দাখিল কৰা তথ্য অনুসৰি তেওঁৰ মুঠতে ৬ কোটি টকা মূল্যৰ স্থাৱৰ-অস্থাৱৰ সম্পত্তি আছে।
পেছাত এগৰাকী প্ৰথম শ্ৰেণীৰ ঠিকাদাৰ অনিল বৰগোহাঁইৰ শিক্ষাগত অৰ্হতা মেট্ৰিক উত্তীৰ্ণ। তেওঁ দাঙি ধৰা তথ্য অনুসৰি ২০১৮-১৯ বৰ্ষত তেওঁৰ নিজৰ সম্পত্তিৰ বিপৰীতে ৩,৭৭,২২,৫২০ টকাৰ আয়কৰ পৰিশোধ কৰে।তদুপৰি, তেওঁৰ পত্নীৰ নামত ৫,৬১,৪৫৬ টকা আয়কৰ পৰিশোধ কৰা দেখুওৱা হৈছে।
আনহাতে, মনোনয়ন-পত্ৰ দাখিলৰ সময়ত কংগ্ৰেছ প্ৰাৰ্থী গৰাকীৰ ৮৫,০০০ টকা নগদ ধন হাতে জমা আৰু পত্নীৰ নগদ ৫০ হাজাৰ টকা হাতে জমা দেখুওৱা হৈছে। অৱশ্যে,ৰাজ্যৰ বিভিন্ন স্থানত তিনিখনকৈ বিলাসী হোটেল থকা বৰগোহাঁইৰ নামত কোনো বেংকৰ ঋণ নাই।
ইপিনে, তেওঁৰ পত্নীৰ নামত ৪ লক্ষাধিক টকাৰ সোণৰ অলংকাৰ থকাৰ বিপৰীতে অনিল বৰগোহাঁইৰ নামত ৩ লাখ ৫০ হেজাৰ টকা মূল্যৰ অলংকাৰ আছে। বৰগোহাঁইৰ নামত এখন XUV-500 বিলাসী গাড়ীৰ লগতে এখন ইণ্ডিকা, এখন এলট’ কে টেন, এখন ৱাগনাৰসহ আছে মুঠ ৪খন গাড়ী আছে।
বৰগোহাঁইৰ পত্নীৰ নামত ২৪ লাখ টকাৰ কৃষি ভূমি, তিনিকোটি টকাৰ ব্যৱসায়ী গৃহ (ঘৰ-মাটিসহ) আৰু ধেমাজি নগৰত ৪০ লাখ টকা মূল্যৰ এটা বাসগৃহ আছে। কিন্তু কংগ্ৰেছ প্ৰাৰ্থীগৰাকীৰ নামত কোনো ধৰণৰ অপৰাধমূলক গোচৰ নাই।
আনহাতে, অসম গ্ৰামীণ বিকাশ বেংকৰ একাউণ্টত বৰগোঁহাইৰ নিজৰ নামত জমা আছে ১,৯২,৬২৬ টকা, ভাৰতীয় ষ্টেট বেংকৰ ধেমাজি শাখাৰ একাউণ্টত ২,৩৯,৯৭৭ টকা, এপেক্স বেংকৰ শাখাত ৯৯,৬৬,০০৪ টকা আৰু আই ডি বি আইৰ একাউণ্টত ৭১৫৫০ টকা। ইয়াৰ বিপৰীতে পত্নীৰ এপেক্স বেংকৰ একাউণ্টত ১৯,৫৮,২৭১ টকা আৰু ভাৰতীয় ষ্টেট বেংকৰ একাউণ্টত ৪০,৬২,৯৫১ টকা জমা আছে।
