মংগলবাৰে লোকসভাত শাসক-বিৰোধীৰ বাকযুদ্ধ তুংগত উঠে।
ৰাষ্ট্ৰদ্ৰোহীতাৰ গোচৰক লৈ এই বাকযুদ্ধ চলে।
বিৰোধী দল কংগ্ৰেছে শাসকীয় পক্ষৰ বিৰুদ্ধে অভিযোগ কৰি কয় যে ৰাষ্ট্ৰদ্ৰোহীতাৰ কঠোৰ আইনখনক বিজেপি চৰকাৰে অপব্যৱহাৰ কৰিছে।
লোকসভাৰ প্ৰশ্নোত্তৰ কালত তেলেংগানাৰ কংগ্ৰেছ সাংসদ আনুমুলা ৰেৱনাথ ৰেড্ডীয়ে যোৱা দহ বছৰত পঞ্জীয়ন হোৱা ৰাষ্ট্ৰদ্ৰোহীতাৰ গোচৰসমূহৰ বিষয়ে প্ৰশ্ন সুধি লোকসভাৰ অধ্যক্ষৰ দৃষ্টিগোচৰ কৰে।
তেওঁৰ এই প্ৰশ্নৰ মূলতে আছিল জলবায়ু কৰ্মী দিশা ৰৱী আৰু ২৬ জানুৱাৰীৰ ট্ৰেক্টৰ ৰেলীত অংশগ্ৰহণ কৰা কৃষক নেতাসকলৰ ওপৰত আৰোপ কৰা ৰাষ্ট্ৰদ্ৰোহীতাৰ গোচৰসমূহ।
কেন্দ্ৰৰ ৰাজ্যিক গৃহ মন্ত্ৰী জি কিষাণ ৰেড্ডীয়ে এই সম্পৰ্কে এটা লিখিত উত্তৰ সংসদত দাখিল কৰে।
মন্ত্ৰীজনে কয় যে ২০১৪ চনত ৪৭ টা, ২০১৫ চনত ৩০ টা, ২০১৬ চনত ৩৫টা, ২০১৭ চনত ৫১টা, ২০১৮ চনত ৭০টা আৰু ২০১৯ চনত ৯৩টাকৈ ৰাষ্ট্ৰদোহীতাৰ গোচৰ পঞ্জীয়ন কৰা হয়।
তথ্যসমূহ দাখিল কৰি মন্ত্ৰীজনে কয় যে এই গোচৰসমূহৰ ক্ষেত্ৰত কেন্দ্ৰীয় চৰকাৰে কোনো হস্তক্ষেপ তথা জড়িত হোৱা নাই।
আনহাতে, কংগ্ৰেছ সাংসদ আনুমুলা মন্ত্ৰীজনৰ এই উত্তৰত সন্তুষ্ট নহ’ল।
তেওঁ কয় যে তেওঁ যোৱা ১০ বছৰৰ তথ্যসমূহ দেখা পাইছে কিন্তু সংসদত মাত্ৰ ২০১৪ চনৰ পৰা ২০১৯ চনৰ তথ্যসমূহহে দাখিল কৰা হৈছে।
”অসম্পূৰ্ণ তথ্যৰে সংসদত বিপথে পৰিচালিত কৰা হৈছে।”- সাংসদজনে কয়।
তেওঁ কয় যে ২০১৪ চনৰ পৰা চৰকাৰৰ নীতিসমূহ যিসকলে সমালোচনা কৰি আহিছে, তেওঁলোকৰ ওপৰত ৰাষ্ট্ৰদ্ৰোহীতাৰ গোচৰ জাপি দিয়া হৈছে।
সাংসদজনৰ এই অভিযোগৰ উত্তৰ হিচাপে কেন্দ্ৰীয় মন্ত্ৰী ৰেড্ডীয়ে কয় যে এই সকলো তথ্য নেচনেল ক্ৰাইম ৰেকৰ্ডছ ব্যুৰোৱে দেশৰ সকলো ৰাজ্যৰ পৰা লাভ কৰা তথ্যৰ ভিত্তিত উপস্থাপন কৰা হৈছে।
কংগ্ৰেছক সমালোচনা কৰি মন্ত্ৰীজনে কয় যে বিজেপি চৰকাৰ অহাৰ আগলৈকে কংগ্ৰেছে ৰাষ্ট্ৰদোহীতাৰ গোচৰৰ সলনি এনেধৰণৰ গোচৰসমূহ ভাৰতীয় দণ্ডবিধি আইনতে সন্নিৱিষ্ট কৰিছিল, কিন্তু বিজেপি চৰকাৰ অহাৰ পাছত ৰাষ্ট্ৰদ্ৰোহীতাৰ গোচৰসমূহক স্বতন্ত্ৰতা প্ৰদান কৰা হয়।
তদুপৰি সামাজিক মাধ্যমৰ উত্থানৰ ফলত গণতন্ত্ৰৰ ওপৰত বক্তব্যপ্ৰদান কৰাৰ পাছতো বহুতক ৰাষ্ট্ৰদ্ৰোহী গোচৰ তুলনামূলকভাৱে অতি কম বুলি মন্ত্ৰীজনে কয়।
কংগ্ৰেছ সাংসদ মনিষ তেৱাৰীয়েও বিজেপি চৰকাৰক সমালোচনা কৰে।
তেওঁ কয় যে ভাৰতীয় দণ্ডবিধি আইনৰ ১২৪এ ধাৰাৰ ৰাষ্ট্ৰদ্ৰোহী গোচৰসমূহৰ ক্ষেত্ৰদত কেন্দ্ৰীয় চৰকাৰে অপব্যৱহাৰ কৰিছে।
ইয়াৰ দ্বাৰা বাকস্বাধিনতাক দমন কৰা হৈছে বুলি তেৱাৰীয়ে অভিযোগ কৰে।
ইয়াৰ প্ৰত্যুত্তৰত, কেন্দ্ৰীয় মন্ত্ৰী ৰেড্ডীয়ে কয় যে কংগ্ৰেছে এই ভাষণ দিয়াৰ প্ৰয়োজন নাই।
তেওঁ কয় যে বিৰোধী নেতা জয়প্ৰকাশ নাৰায়ণ আৰু অটল বিহাৰী বাজপেয়ীৰ ওপৰত মেইণ্টেনেন্স অৱ ইণ্টাৰনেল চিকিউৰিটী এক্ট (মিছা) জাপি দি কংগ্ৰেছে ইয়াৰ পূৰ্বেই এই আইনক অপব্যৱহাৰ কৰি থৈছে।