নিৰ্বাচনত কাৰচুপি বা ভোট চুৰিৰ অভিযোগ তুলি বিৰোধী শিবিৰৰ ইণ্ডিয়া মিত্ৰজোঁটে এইবাৰ পোণপটীয়াভাৱে দেশৰ মুখ্য ন্যায়াধীশলৈ চিঠি প্ৰেৰণ কৰাৰ সিদ্ধান্ত লৈছে। প্ৰায় দুবছৰৰ মূৰত সোমবাৰে দিল্লীত অনুষ্ঠিত হোৱা এই গুৰুত্বপূৰ্ণ বৈঠকত দেশৰ ২৫ টা বিৰোধী দলৰ শীৰ্ষ নেতাসকলে অংশগ্ৰহণ কৰে। লোকসভাৰ বিৰোধী দলপতি ৰাহুল গান্ধী, সমাজবাদী পাৰ্টিৰ অখিলেশ যাদৱ, জম্মু-কাশ্মীৰৰ মুখ্যমন্ত্ৰী ওমৰ আব্দুল্লা, পিডিপি নেত্ৰী মেহবুবা মুফতি আৰু তৃণমূল কংগ্ৰেছৰ নেত্ৰী মমতা বেনাৰ্জীৰ দৰে আগশাৰীৰ নেতাসকলৰ উপস্থিতিত এই বৈঠক ৰাজনৈতিকভাৱে অতি তাৎপৰ্যপূৰ্ণ হৈ পৰিছে।
বৈঠকৰ অন্তত কংগ্ৰেছৰ সভাপতি মল্লিকাৰ্জুন খাৰ্গেয়ে জনায় যে এতিয়াৰে পৰা দীঘলীয়া বিৰতি লোৱা নহ’ব, বৰঞ্চ প্ৰতি দুমাহৰ মূৰে মূৰে ইণ্ডিয়া মিত্ৰজোঁটৰ বৈঠক অনুষ্ঠিত হ’ব আৰু পৰৱৰ্তী বৈঠকখন হায়দৰাবাদত অনুষ্ঠিত কৰা হ’ব। দেশৰ বৰ্তমানৰ পৰিস্থিতিক লৈ কেন্দ্ৰৰ মোডী চৰকাৰক তীব্ৰ সমালোচনা কৰি খাৰ্গেয়ে দাবী কৰে যে দেশৰ ভয়াবহ অৰ্থনৈতিক অৱস্থা, নিবনুৱা সমস্যা, মূল্যবৃদ্ধি আৰু কৃষকৰ সংকটৰ বিষয়ে আলোচনা কৰিবলৈ কেন্দ্ৰই অনতিপলমে সৰ্বদলীয় বৈঠক আহ্বান কৰিব লাগে। একে সময়তে নিট আৰু চিবিএছই পৰীক্ষাত প্ৰশ্নকাকত ফাদিল আৰু দুৰ্নীতিৰ বাবে লাখ লাখ ছাত্ৰ-ছাত্ৰীৰ ভৱিষ্যত বিপন্ন কৰাৰ অভিযোগত কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত সমগ্ৰ দেশজুৰি ধাৰাবাহিক আন্দোলন চলাই যোৱাৰো সিদ্ধান্ত লৈছে বিৰোধী মঞ্চই।
অৱশ্যে এই বৃহৎ বৈঠকৰ ঠিক আগতেই বিৰোধী মিত্ৰজোঁটৰ ভিতৰচৰাত থকা ফাঁট আৰু তীব্ৰ ক্ষোভৰ ছবিখনো পোহৰলৈ আহে। কংগ্ৰেছৰ ভূমিকাক লৈ চিপিআই(এম) দলে লিখিতভাৱে গুৰুতৰ আপত্তি দৰ্শাইছে। খাৰ্গেলৈ প্ৰেৰণ কৰা এখন চিঠিত চিপিআই(এম)ৰ সাধাৰণ সম্পাদক এম এ বেবিয়ে ক্ষোভ প্ৰকাশ কৰি কয় যে বাস্তৱিকতে বিভিন্ন ৰাজ্যত হয়তো মিত্ৰ দলবোৰে ইটোৱে সিটোৰ বিৰুদ্ধে নিৰ্বাচন খেলিব পাৰে, কিন্তু কেৰালাত কংগ্ৰেছৰ শীৰ্ষ নেতাসকলে যিদৰে ধাৰাবাহিকভাৱে চিপিআই(এম)ক আক্ৰমণ কৰি আছে আৰু বিজেপিৰ সৈতে মিত্ৰতা থকাৰ কাল্পনিক অভিযোগ তুলিছে, সেয়া কেতিয়াও মানি ল’ব নোৱাৰি। কেৰালাৰ নিৰ্বাচনী প্ৰচাৰত স্বয়ং ৰাহুল গান্ধীয়ে তেতিয়াৰ মুখ্যমন্ত্ৰী পিনাৰাই বিজয়নৰ বিৰুদ্ধে ইডিৰ তদন্তৰ দাবী তুলিছিল। চিপিআই(এম)ৰ স্পষ্ট মত হ’ল যে কংগ্ৰেছৰ এই দুমুখীয়া আচৰণৰ সঠিক উত্তৰ নাপালে ইণ্ডিয়া মিত্ৰজোঁটৰ প্ৰাসংগিকতাই প্ৰশ্নৰ সন্মুখীন হ’ব।
সেইদিনা বৈঠকত অংশগ্ৰহণ কৰিবলৈ যোৱাৰ সময়ত সংবাদ মাধ্যমৰ আগত চিপিআই(এম)ৰ সাংসদ জন ব্ৰিটাসেও কংগ্ৰেছৰ বিৰুদ্ধে তেওঁলোকৰ আপত্তিৰ কথা দোহাৰে। অৱশ্যে একে সময়তে কেন্দ্ৰৰ এনডিএ চৰকাৰৰনীতিক কঠোৰ সমালোচনা কৰি তেওঁ কয় যে এই চৰকাৰে দেশৰ আভ্যন্তৰীণ আৰু বৈদেশিক নীতিলৈ বিপৰ্যয় কঢ়িয়াই আনিছে। এটাৰ পিছত এটাকৈ সাংবিধানিক প্ৰতিষ্ঠানৰ ওপৰত বুলডজাৰ চলোৱা হৈছে, যাৰ ফলত প্ৰতিটো নিৰ্বাচনেই নিজৰ স্বচ্ছতা হেৰুৱাই পেলাইছে। বিজেপিয়ে কেৱল ক্ষমতাত টিকি থাকিব বিচৰাই নহয়, বৰঞ্চ বিৰোধীৰ ৰাজনৈতিক স্থানখিনিও জোৰকৈ দখল কৰিব বিচাৰিছে, যাৰ এক ডাঙৰ উদাহৰণ হৈছে পশ্চিমবঙ্গ। ব্ৰিটাসৰ মতে, এই স্বৈৰাচাৰী আক্ৰমণ প্ৰতিহত কৰিবলৈ আৰু জনসাধাৰণৰ ক্ষোভক সঠিক দিশলৈ নিবলৈ এই মুহূৰ্তত সকলো বিজেপি বিৰোধী দল একগোট হৈ আন্দোলনত নমাটো অতিশয় জৰুৰী।
